Read መ/ቅዱስ ትግርኛ, Tigrigna Bible, 1 ኢዮብ 37 Bible Online

ኢዮብ 37 - መ/ቅዱስ ትግርኛ, Tigrigna Bible, 1 bible

ኢዮብ 37

¹“ስለዙይውን ልበይ ኣንቀጥቀጠ፤ ኣብ ስፍራኡ ኸዓ ተወሳወሰ።

²ነቲ ምህማም ድምፂ ስምዑ፤ ነቲ ኻብ ኣፉ ዝወፅእ ዘሎ ነጐድጓድ ስምዑ።

³ንእኡ ናብ ትሕቲ ዅሉ ሰማይ፥ ንብርሃኑውን ካብ ሓደ ወሰን፥ ናብቲ ሓደ ወሰን ምድሪ ይሰዶ።

⁴ብድሕሪኡ ድምፂ ይጓዝም፤ ብድምፂ ግርማኡውን የንጐድጕድ፤ ድምፂ ምስ ተሰምዐ ንመብረቕ ኣይኽልክሎን።

⁵ኣምላኽ ብዘደንቕ ኵነታት ብድምፁ የንጐድጕድ፤ ንሕና ዘይነስተውዕሎ ዓበይቲ ነገራት ድማ ይገብር።

⁶ንበረድን ዝናምን ንብርቱዕ ፀፍዕን ናብ ምድሪ ኽወርዱ ይእዝዞም።

⁷ኵሎም ሰባት ተግባሩ ምእንቲ ኽፈልጡ፥ ንኢድ ወዲ ሰብ ይሓትሞ።

⁸ኣራዊት ነናብ መሕብኢኦም ይኣትዉ፤ ኣብ በብዓቶም ድማ ይቕመጡ።

⁹ኣውሎ ንፋስ ካብቲ ሕቡእ ስፍራኡ፤ ዛሕሊ ድማ ኻብ ሰሜን ይወፅእ።

¹⁰ካብ እስትንፋስ እግዚኣብሄር ኣስሓይታ ተውሂቡ፤ ስፍሓት ማያት ከዓ ይፀብብ።

¹¹ንደመናታት ማይ ይፅዕኖም፤ ንናይ መብረቕ ደመናታትውን ይብትኖም።

¹²እዚኣቶም ነቲ ዅሉ ንሱ ዝእዝዞም ዘበለ፥ ኣብ ልዕሊ ዅሉ ገፅ ምድሪ ምእንቲ ኽገብሩስ፥ ብእኡ እናተመርሑ ናብ ኵሉ ዓለም ይዞሩ ኣለዉ።

¹³እግዚኣብሄር ንመቕፃዕቲ፥ ወይ ንምድሪ፥ ወይ ንምሕረት የውርዶም።”

¹⁴“እምበኣርከስ፥ ኦ ኢዮብ! ነዙይ ስማዕ፤ ቁም፤ ንተኣምራት እግዚኣብሄርውን ህድእ ኢልካ ኣስተንትኖ።

¹⁵ኣምላኽ ከመይ ገይሩ ኸም ዝእዝዞም፥ እቲ ናይ ደመና ብርሃን ከመይ ከም ዘብርህ ፈሊጥካ ዲኻ?

¹⁶ነቲ ምድልዳል ደበና፥ ወይ ናይቲ ፍልጠቱ ፍፁም ዝኾነ ዘደንቕ ግብሪኸ ትፈልጦ ዲኻ?

¹⁷ምድሪ ብንፋስ ደቡብ ፀጥ ምስ በለት፥ ክዳውንትኻ ዝሞቐካ ኣታ ንስኻ፥ ተስተውዕሎ ዲኻ!

¹⁸ነቶም ከም ዝመኸኸ መስትያት ንዝኾኑ ሰማያት፥ ምስኡ ዄንካ ኽትዝርግሕ ምኸኣልካዶ ኔርካ?

¹⁹ንሕና ኻብ ፀልማት ዝተልዓለ፥ ብስርዓት ክንዛረብ ኣይንኽእልን ኢና እሞ፥ እንብሎ ንስኻ ኣፍልጠና።

²⁰ዝኾነ ብዛዕባኡ እንተ ተናገረ ፈፂሙ ይወሓጥ እዩሞ፤ ኣነ ኽናገር እንተ ዝደሊ፥ ሰብዶ ይነግሮ እዩ?”

²¹“ሕዚ ድማ ንፋስ ሓሊፉ ምስ ኣፅረዮም፥ ሰብ ነቲ ኣብ ሰማይ ዘብርህ ብርሃን ክጥምቶ ኣይኽእልን።

²²ወርቂ ዝመስል ብርሃን ብወገን ሰሜን ይወፅእ፤ ኣምላኽ ከዓ ብዘፍርሕ ግርማኡ ተኸቢቡ ኣሎ።

²³ነቲ ዅሉ ዝኽእል እግዚኣብሄር ክንረኽቦ ኣይንኽእልን፤ ንሱ ብሓይሊ ብፍርዲ ብፍትሒ ዓብዪ እዩ፤ ንሓደኳ ኣይጭቁንን።

²⁴ሰባትውን በዙይ እዮም ዝፈርሕዎ፤ ነቶም ብልቦም ብልህታት ኢና ዝብሉ ኸዓ፥ ንሱ ኣየቕልበሎምን እዩ።”