Read መ/ቅዱስ ትግርኛ, Tigrigna Bible, 1 ኢዮብ 39 Bible Online

ኢዮብ 39 - መ/ቅዱስ ትግርኛ, Tigrigna Bible, 1 bible

ኢዮብ 39

¹“ጤል በረኻ እትወልደሉ ጊዜዶ ትፈልጦ ኢኻ? እራብ ቅልውላው እትተሓዘሉ ጊዜኸ ትምልከቶ ዲኻ?

²ክንደይ ኣዋርሕ መላኣት ኮይነን ከም ዝፀንሓ፥ መኣዝውን ከም ዝወልዳ ትፈልጥ ዲኻ?

³ብርክኽ ኢለን ደቀን ይወልዳ፤ ካብ ፃዕረንውን ይዓርፋ።

⁴መሓስአን ይድልድላ፤ ኣብ በረኻ ይዓብያ፤ ይወፃ እሞ ናብኣተን ኣይምለሳን።”

⁵“ንኣድጊ በረኻ ሓራ ዘውፅአ መን እዩ? ነቲ ኣድጊ በረኻኸ ኻብ መእሰሪኡ ዝፈትሖ መን እዩ?

⁶ንፀምፀም በረኻ ስፍራኡ፥ ምድሪ ጨው ከዓ መንበሪኡ ክኸውን ዝሃብክዎ ኣነ እየ።

⁷ብናይ ከተማ ጫውጫውታ ይስሕቕ፤ ደሃይ ኰብኳቢውን ኣይሰምዕን።

⁸ንእምባታት ከም መዋፈሪ ይምልከቶ፤ ለምለም ዝኾነ ነገር ከዓ ይደሊ።”

⁹“ብዕራይ በረኻ ሕራይ ኢሉዶ ይግዝአካ እዩ? ኣብ ደምቤኻኸ ይሓድረልካዶ?

¹⁰ምእንቲ ኽትልመልካዶ ንጐባይ ትፀምዶ ኢኻ? ወይ ከዓ ኣብ ሕሩስዶ ደድሕሬኻ ይጕልጉል እዩ?

¹¹ሓይሉ ብርቱዕ ስለ ዝኾነዶ ትእመኖ ኢኻ? ተግባርካኸ ንእኡ ትሓድግ ዲኻ?

¹²እኽልኻ ኽእክበልካ፥ ካብ ዓውዲውን ከእትወልካዶ ተኣምኖ ኢኻ?”

¹³“ሰገን ንኣኽናፋ ብሓጐስ ተንገብግቦ እያ፤ ክንፋን ክንቲታን ግና ኸም ራዛ ኣይነፍርን።

¹⁴እንቍላሊሓ ኣብ ምድሪ ተውድቕ፤ በቲ ሙቐት ሑፃ ድማ ተሙቖ።

¹⁵‘እግሪ ከይጭፍልቐለይ፥ ኣራዊትውን ከይረግፀለይ’ ኢላ ኣይትሓስብን።

¹⁶ንውሉዳ ኸም ዘይናታ ትቘፅሮ፤ ፃዕረይ ከንቱ ኸይኸውን ኢላ ድማ ኣይትግደስን።

¹⁷እዙይ ድማ እግዚኣብሄር ጥበብ ስለ ዝኸልከላን ምስትውዓልውን ስለ ዘይዓደላን እዩ።

¹⁸ንላዕሊ፥ ልዕል ልዕል ምስ በለት፥ ንፈረስን ፈረሰኛን ትስሕቖም።”

¹⁹“ንፈረስ ሓይሊ ሂብካዮ ዲኻ? ንኽሳዱኸ ጋማ ኣልቢስካዮ ዲኻ? ከም ኣንበጣኸ ኣፈናጢርካዮ ዲኻ?

²⁰ከም ኣንበጣዶ ተሰራስሮ ኢኻ? እቲ ዕቡይ ኵርፍታኡ ዘፍርሕ እዩ።

²¹ኣብ ጐልጐል ብሸዀናኡ እናፃሕተረ ብሓይሉ ይሕጐስ፤ ናብ ውግእውን ክገጥም ይወፅእ።

²²ኣብ ልዕሊ ፍርሓት ይስሕቕ፤ ኣይድንግፅንውን፤ ካብ ሰይፊ ድማ ድሕር ኣይብልን እዩ።

²³ኣብ ዝባኑ ናይ ፍላፃ ጕልድባ፥ ብልጭልጭ ዝብል ኲናትን ስሕለትን ጭዋሕዋሕ ይብል።

²⁴ብጭካነን ብቝጥዓን ንመሬት ይውሕጣ፤ መለኸት ክንፋሕ እንተሎ ኣይቐውምን።

²⁵መለኸት እንትሰምዕ ይሕምሕም፤ ንውግእን ንወኻዕታ ሰራዊትን ካብ ርሑቕ የጫንዎ፤ ንፈኸራ ኣሕሉቑ ኻብ ርሑቕ ይሰምዖ።”

²⁶“ሊሎ ንላዕሊ ዝመጥቕ፥ ኣኽናፉውን ንደቡብ ኣቢሉ ዝዝርግሕኸ፥ ብጥበብካ ድዩ?

²⁷ንስሪ ንላዕሊ ዝዓርግ፥ ቤቱውን ኣብ በሪኽ ዝሰርሕኸ ብትእዛዝካ ድዩ?

²⁸ኣብ ገደል ይነብር፤ ኣብ ገምገም ገደልን ኣብ ፀግዑን ይሓድር፤

²⁹ኣብኣ ኾይኑ ዝንጠቕ የማዕዱ፤ ኣዒንቱ ኽሳዕ ርሑቕ ይጥምታ።

³⁰ ጫቚታቱ ደም ይሰትዩ፤ ኣብቲ ገምብታት ዘለውዎ፥ ንሱ ኣብኡ ይርከብ።”