Read መ/ቅዱስ ትግርኛ, Tigrigna Bible, 1 ኢዮብ 4 Bible Online

ኢዮብ 4 - መ/ቅዱስ ትግርኛ, Tigrigna Bible, 1 bible

ኢዮብ 4

¹ድሕሪዙይ ኤሊፋዝ በዓል ቴማን ከምዙይ ኢሉ መለሰ፦

²“ኢዮብ ሓደ ሰብ ምሳኻ ኽናገር እንተ ፈተነዶ ትቕየም ኢኻ? ዘረባኡ ኻብ ምዝራብ ዝዓግትከ መን እዩ?

³እንሆ፥ ንስኻ ንብዙሓት ሰባት ትምህር ነበርካ፤ ንዝደኸማ ኣእዳው ከዓ ተበርትዕ ነበርካ።

⁴ቃልካ ነቶም ሰንከልከል ዝብሉ ይድግፎም ነበረ፤ ንስኻውን ረይረይ ንዝብሉ ኣብራኽ ተፅንዕ ነበርካ።

⁵ሕዚ ግና ኣብ ልዕሌኻ መፀ፤ ንስኻውን ደኸምካ፤ ኣባኻ በፅሐ፤ ንስኻውን ተሸገርካ።

⁶ንእግዚኣብሄር ምፍራሕኻ፥ ምፅንናዕካ፥ መንገዲ ቕንዕናኻውን ተስፋኻዶ ኣይኮነን?”

⁷“በይዛኻ ኣስተውዕል፥ ንፁህ እንተሎ ዝጠፍአ፤ ልቡ ቅኑዕ ኾይኑ ድማ ዝተደምሰሰ መንዩ?

⁸ኣነ ኸም ዝረአኹዎ፦ እቶም ሓጢኣት ዝሓርሱ፥ መከራውን ዝዘርኡ፥ ንእኡ እዮም ዝዓፅዱ።

⁹ንሳቶም ብእስትንፋስ እግዚኣብሄር ይጠፍኡ፤ ብመንፈስ ቍጥዓኡውን ይድምሰሱ።

¹⁰ምጕዛም ኣንበሳ፥ ድምፂ እቲ ጓዛሚ ኣንበሳ፥ ኣስናን ደቦል ኣንበሳ ተሰባበረ።

¹¹ኣረጊት ኣንበሳ ሃደን ስኢኑ ይመውት፤ ኰራዅር እታ ዋዕሮ ኸዓ ፋሕ ይብሉ።”

¹²“ንኣይ ግና ብሕቡእ ቃል መፀኒ፤ እዝነይ ድማ ነቲ ሕሽዅሹኽ ሰምዐት።

¹³ ብሕልሚ ለይቲ ሓሳብ እንትለዓል፥ ዝኸበደ ድቃስውን ኣብ ልዕሊ ሰባት እንትወድቕ፥

¹⁴ንዅሉ ኣዕፅምተይ ዘናወፁ፥ ድንጋፀን ምንቅጥቃጥን ወደቑኒ።

¹⁵መንፈስውን ብቕድመይ ሓለፈ፤ ፀጕሪ ስጋይ ቆመ።

¹⁶ንሱ ቖመ፤ መልክዑ ግና ኣየለለኽዎን፤ ምስሊ ኣብ ቅድሚ ዓይነይ ነበረ፤ ህድኣት ኮነ፤ ድምፂ ድማ ሰማዕኹ።

¹⁷ብሓቂ ሰብዶ ኣብ ቅድሚ እግዚኣብሄር ፃድቕ ክኸውን፥ ወይ ከዓ ሰብ ኣብ ቅድሚ ፈጣሪኡ ኽነፅህዶ ይኽእል እዩ?

¹⁸እንሆ፥ ንኣገልገልቱ እኳ ኣይተኣማመኖምን፤ ንመላእኽቱውን ስንፍና ይኸሶም።

¹⁹እምበኣርከስ እቶም ኣብ ጭቃ ቤት ዝነብሩ፥ መሰረቶምውን ኣብ ውሽጢ ሓመድ ዝኾነ፥ ከም ሓሰኻ እውን ዝጭፍለቑ ኸመይ ይኾኑ!

²⁰ኣብ መንጎ ጊሓትን ምሸትን ይሰባበሩ፤ ማንም እንተይሓሰቦ ንዘለኣለም ይጠፍኡ።

²¹እቲ ገመድ ድንኳኖም ይብተኽ፤ ብዘይ ጥበብ ከዓ ይሞቱ።”