Read መ/ቅዱስ ትግርኛ, Tigrigna Bible, 1 ኢዮብ 40 Bible Online

ኢዮብ 40 - መ/ቅዱስ ትግርኛ, Tigrigna Bible, 1 bible

ኢዮብ 40

¹መሊሱ ኸዓ እግዚኣብሄር ንኢዮብ ከምዙይ በሎ፦

²“ኢዮብ፥ ብሓቂ፥ ዝማጐት ሰብ፥ ምስቲ ዅሉ ዝኽእል እግዚኣብሄርዶ ይማጐት እዩ? እቲ ምስ እግዚኣብሄር ዝማጐት ንሱ ይመልሰሉ።”

³ሽዑ ኢዮብ ንእግዚኣብሄር ከምዙይ ኢሉ መለሰሉ፦

⁴“እንሆ ጐይታይ፥ ኣነ ኸንቱ ዝኾንኩ ሰብ እየ፤ እንታይ ኢለ ደኣ ኽምልሰልካ? ኣፈይ ብኢደይ ሒዘ ኣለኹ።

⁵ሓደ ሻዕ ተዛሪበ ነይረ፤ ሕዚ ግና ኣይምልስን እየ፤ ኣነ ኽልተ ሻዕ ተዛሪበ ነይረ፤ ግና ኣይደግምን እየ።”

⁶መሊሱ እግዚኣብሄር ኣብ ውሽጢ ኣውሎ ንፋስ ኮይኑ፥ ንኢዮብ ከምዙይ በሎ፦

⁷“ሕዚ እምበኣር ከም ሰብኣይ ሕቘኻ ተዓጠቕ፤ ኣነ ኽጥይቐካ እየ፤ ንስኻውን መልሰለይ።

⁸ንርእስኻ ምእንቲ ኽተፅድቕ ንፍርደይ ከንቱ ኽትገብሮ፥ ንኣይ ድማ ኽትኵንነኒዶ ትደሊ ኣለኻ?

⁹ከም ቅልፅም እግዚኣብሄር ዝበለ ቕልፅምዶ ኣለካ እዩ? ከም ድምፁ ጌርካዶ ኸተንጐድጕድ ትኽእል ኢኻ?

¹⁰እምበኣርከስ ክብረትን ልዕልናን ተሸለም፤ ክብርን ግርማን ከዓ ልበስ።

¹¹ዕቡይ ንዝኾነ ዅሉ ኣትኲርካ ረአዮ እሞ፥ ቍጥዓኻ ኣፍሲስካ ኣዋርዶ።

¹²እወ፥ ዕቡይ ንዝኾነ ትሕት፥ ትሕት ኣብሎ፤ ንኽፉኣት ሰባትውን ኣብ ቦታኦም እንተለዉ ርገፆም።

¹³ንዅሎም ብሓድነት ኣብ ምድሪ ሰውሮም፤ ኣብ ሕቡእ ስፍራውን ገፆም ሸፍን።

¹⁴ሽዑ ኣነ የማነይቲ ኢድካ፥ ክተድሕነካ ኸም እትኽእል ክምስክረልካ እየ።”

¹⁵“ነቲ ምሳኻ ዝፈጠርኩዎ፥ ብሄሞት ረአዮ፤ ንሱ ኸም ብዕራይ ሳዕሪ ይበልዕ፤

¹⁶እንሆ ድማ፥ ሓይሉ ኣብ ሕቘኡ፥ ምብርታዑ ኣብ ጅማት ከብዱ እዩ ዘሎ።

¹⁷ንጭራኡ ኸም ኦም ሊባኖስ ይነንዎ፤ ጅማውቲ ሰለፉውን ፅኑዕ ትንጎ እዩ።

¹⁸ኣዕፅምቱ ኸም ነሃስ ሓያል እዩ፤ ኣካላቱ ኸም በትሪ ሓፂን እዩ።”

¹⁹“ንሱ ኣውራ ፍጥረት እግዚኣብሄር እዩ፤ ሰራሒኡውን ሰይፉ ሃቦ።

²⁰እቲ ዅለን እንስሳ በረኻ ዝፃወታሉ እምባ፥ ዝብላዕ ሳዕሪ የብቍለሉ።

²¹ኣብ ትሕቲ ፅላል ኣእዋም ለጥ ይብል፤ ኣብ ውሽጢ ሰልሰላን ረግረግን ድማ ይድቅስ።

²²ፅላል ዘለዎ ኦም ብፅላሉ ይስውሮ፤ ኣእዋም ሩባ ዂሓውን ይኸብዎ።

²³ውሕጅ ብሓይሊ ደፊኡ እንተ መፀ እኳ ኣይድንግፅን፤ ዮርዳኖስ ክሳዕ ኣፉ እንተ መልአውን ኣይሰግእን።

²⁴ኣዒንቱ እናረአያዶ ይተሓዝ እዩ? ንኣፍንጫኡ ኣንኲሉ ሰንቀል ዘእትወሉኸ መን እዩ?”