Read መ/ቅዱስ ትግርኛ, Tigrigna Bible, 1 ኢዮብ 41 Bible Online

ኢዮብ 41 - መ/ቅዱስ ትግርኛ, Tigrigna Bible, 1 bible

ኢዮብ 41

¹ “ነቲ ሓርገፅ ዝበሃል ኣራዊት ባሕሪ ብመቝለብ ክተውፅኦ፥ ንመልሓሱ ኸዓ ብገመድ ክትኣስሮዶ ትኽእል ኢኻ?

²ወይ ናብ ኣፍንጫኡ ሰንቀ ኽተእትወሉ፥ ንምንጋጋኡ ድማ ብመቝለብ ክተንኵሎዶ ትኽእል ኢኻ?

³ወይ ብሓቂ ኻባኻዶ ኣብዚሑ ይልምን እዩ? ብጥዑም ቃል ይዛረበካ ድዩ?

⁴ንሓዋሩ ባርያኻ ኽትገብሮስ፥ ምሳኻዶ ኺዳን ዝኣቱ ይመስለካ?

⁵ከምቲ ምስ ዒፍ እትፃወት፥ ምስኡ ትፃወት ዲኻ? ወይ ነግራድካ መፃወቲ ኽትኣስሮ እትኽእልዶ ይመስለካ?

⁶ኣስገርቲዶ ብእኡ ይከራኸሩ እዮም? ወይ ከዓ ነጋዶ የካፍልዎ ድዮም?

⁷ንቘርበቱ ብኲናት፥ ንባዕሉ ድማ ብመቓጥን ዓሳዶ ኽትመልኦ ትኽእል ኢኻ?

⁸ኢድካ ኣብ ልዕሊኡ ኣንብር፤ ነቲ ሰልፊ ድማ ዘክር፤ መሊስካውን ኣይትድገም።

⁹እንሆ ተስፋኡ ኸንቱ እዩ፤ ኵሉ ዝረአዮ ኣብ ቅድሚኡ ይዋረድ።

¹⁰ንእኡ ኽቕስቅሶ ዝደፍር የለን፤ ኣብ ቅድመይ ክቐውም ዝኽእል መን እዩ?

¹¹እቲ ኣቐዲሙ ዝሃበኒ እሞ ኣነ ዝመልሰሉ መን እዩ? ኵሉ ኣብ ትሕቲ ሰማይ ዘሎ ናተይ እዩ።”

¹²“ስለ ኣካላቱን ስለ ብርቱዕ ሓይሉን፥ ስለ ፅባቐ ሰብነቱን ስቕ ኣይብልን።

¹³ነቲ ላዕለዋይ ክዳኑ ኽቕንጥጦ ዝኽእል መን እዩ? ኣብ መንጎ ኽልቲአን ምንጋጋኡ ኽኣቱ ዝኽእልከ መን እዩ?

¹⁴ንመዓፁ ገፁ ክኸፍት ዝኽእል መን እዩ? ኣብ ዙርያ ኣስናኑ ግርማ ኣሎ።

¹⁵እቶም ጠንካራታት ዋልታታቱ ትዕቢቱ እዮም፤ ከም ብፀቢብ ማሕተም ዝተጋጠሙ እዮም።

¹⁶ንስንሳቱ ተላጊቡ እዩ፤ ንፋስ እኳ ብመንጎኡ ክኣቱ ኣይኽእልን እዩ።

¹⁷እቲ ሓደ ምስቲ ሓደ ግጡም እዩ፤ ንስንሳቶም ከዓ ዝተተሓሓዙ እዮም፤ ክፈልዮም ዝኽእልውን የለን።

¹⁸ክህንጥስ እንተሎ ብርሃን የንፀባርቕ፤ ኣዒንቱውን ከም ወጋሕታ እየን።

¹⁹ካብ ኣፉ ፋና ሓዊ ይወፅእ፤ ካብኡ ድማ ትንታግ ሓዊ ይነጥር።

²⁰ከም ዝፈልሕ ቍራዕን ከም ዝቃፀል ሸምበቆን፥ ካብ ኣፍንጫኡ ትኪ ይወፅእ።

²¹እስትንፋሱ ንሕመት የጕህሮ፤ ካብ ኣፉውን ሃልሃልታ ይወፅእ።

²²ኣብ ክሳዱ ሓይሊ ይሓድር፤ ኣብ ቅድሚኡ ድማ ግርማ ይሰራሰር።

²³ስጋኡ ተደራሪቡ ዝገጠመ ስለ ዝኾነ፥ ሰብነቱ ፅኑዕ ዘይነቓነቕ እዩ።

²⁴ልቡ ኸም እምኒ ተሪር እዩ፤ ከም እምኒ መጥሓን ከዓ ፅኑዕ እዩ።

²⁵ንሱ ምስ ተልዓለ ጀጋኑ ይሽበሩ፤ ካብ ፍርሒ ዝተልዓለውን ይዓብዱ።

²⁶ሰይፊ ወይ ኲናት ወይ ፍላፃ ወይ መውግኢ እንተ ረኸብዎ ኣየሸንፍዎን።

²⁷ንሱ ንሓፂን ከም ሓሰር፤ ንነሃስውን ከም ዝቘንቈነ ዕንፀይቲ ይቘፅሮ።

²⁸ፍላፃ ኣየህድሞን፤ እምኒ ወንጭፍውን ከም ሓሰር ኾይኑ ይስምዖ።

²⁹ንጐመድ ከም ብርዒ ይቘፅሮ፤ ኲናት እንተ ወርወሩሉ ድማ ይስሕቖም።

³⁰ኣብ ትሕቲ ኸብዱ በሊሕ ስሕለት ኣለዎ፤ ኣብ ጭቃ ኸዓ ኣሰር በላሕቲ ጫፍ ይሓድግ።

³¹ንሱ ንቓላይ ከም ድስቲ የፍልሖ፤ ንባሕሪ ድማ ኸም ቍራዕ ሽቱ ይገብሮ።

³²ደድሕሪኡ ንመንገዲ የብርሆ፤ እቲ ቓላይ ድማ ሲበት ይመስል።

³³ከምኡ ኾይኑ ብዘይ ፍርሓት ዝተፈጠረ፥ ኣብ ምድሪ የለን።

³⁴ልዕል ንዝበለ ዅሉ ንዒቑ ይጥምቶ፤ ኣብ ልዕሊ ዅሎም ትዕቢተኛታትውን ንጉስ እዩ።”