Read መ/ቅዱስ ትግርኛ, Tigrigna Bible, 1 ኢዮብ 5 Bible Online

ኢዮብ 5 - መ/ቅዱስ ትግርኛ, Tigrigna Bible, 1 bible

ኢዮብ 5

¹“ሕዚ እውን ፀውዕ፥ ዝምልሰልካ ኣሎዶ? ካብ ቅዱሳንከ ናብ ኣየንኦም ግልፅ ክትብል ኢኻ?

²ንሰነፍ ሰብ፥ ቍጥዓ ይቐትሎ፤ ንሰነፍ ከዓ ቕንኣት የጥፍኦ።

³ሰነፍ ሰብ ሱር ሰዲዱ ረአኽዎ፤ ብድንገትውን ንቤቱ ረገምክዋ።

⁴ደቁ ኻብ ድሕነት ርሒቖም እዮም፤ ኣብ ውሽጢ በሪ ተረጊፆም፥ ዘናግፎምውን የለን።

⁵ነቲ ዝኣከቦውን ዝጠመየ ይበልዖ፤ እኳ ደኣ ኻብ ውሽጢ ዕሾኽ የውፅኦ፤ ዝፀምአ ነቲ ሃብቶም ይውሕጦ።

⁶መከራ ኻብ ሓመድ ኣይመፅእን እዩሞ፥ ሽግርውን ካብ ምድሪ ኣይበቍልን።

⁷ናይ ኣሞራ ጫቚታት ንላዕሊ እናነፈሩ ልዕል ከም ዝብሉ፥ ከምኡውን ሰብ ንመከራ እዩ ዝውለድ።”

⁸“ኣነ ግና ንእግዚኣብሄር ምለመንኩ፤ ነገረይውን ናብ እግዚኣብሄር መቕረብኩ።

⁹ንሱ ዘይምርመር ዓብዪ ነገርን፥ ዘይቝፀር ተኣምራትን ይገብር።

¹⁰ኣብ ልዕሊ ምድሪ ዝናም የዝንም፤ ኣብ ልዕሊ ገራሁውን ማይ ይልእኽ።

¹¹ንዝተዋረዱ ናብ ላዕሊ የደይቦም፤ ንሕዙናት ንድሕነት ልዕል ልዕል የብሎም።

¹²ነቲ ዝመኸርዎ፥ ኣእዳዎም ከይፍፅሞ፥ ንሓሳብ ተንኰለኛታት ከንቱ ይገብሮ።

¹³ንጠቢባን ብተንኰሎም ይሕዞም፤ ንምኽሪ ጠዋያት ድማ ይብትኖ።

¹⁴ብፀሓይ፥ ቀትሪ ይፅልምቶም፤ ብቐትሩ ድማ ኸም ብለይቲ ሃሰስ ይብሉ።

¹⁵ንምስኪን ካብ ሰይፊ ኣፎም፥ ካብ ኢድ ሓያልውን የድሕኖም።

¹⁶ስለዙይ ነቲ ምስኪን ተስፋ ኣለዎ፤ ክፍኣትውን ኣፋ ኽትዓፁ እያ።”

¹⁷“እንሆ፥ እቲ እግዚኣብሄር ዝግስፆ ሰብስ ብፁእ እዩ፤ ስለዙይ ናይቲ ዅሉ ዝኽእል ኣምላኽ ተግሳፅ ኣይትንዓቕ።

¹⁸ንሱ ይሰብር፤ ይፅግንውን፤ የቝስል፤ ኣእዳዉ ኸዓ ይፍውሱ።

¹⁹ካብ ሽዱሽተ ኽፉእ ነገር ከድሕነካ እዩ፤ ኣብ መበል ሻውዓይ ግና ኽፉእ ኣይነኽአካን እዩ።

²⁰ብዘመን ጥሜት ካብ ሞት፥ ብጊዜ ውግእ ካብ ሰይፊ፥ ከድሕነካ እዩ።

²¹ካብ ጭጕራፍ መልሓስ ክትስወር ኢኻ፤ ጥፍኣት ክመፅእ እንተሎ፥ ኣይትፈርሕን ኢኻ።

²²ኣብ ልዕሊ ጥፍኣትን ጥሜትን ክትስሕቕ፥ ካብ ኣራዊት ምድሪ እውን ኣይትፈርሕን።

²³ቃል ኪዳንካ ምስ ኣእማን በረኻ ክኸውን እዩሞ፥ ምስ ኣራዊት በረኻ ብሰላም ክትነብር ኢኻ።

²⁴ድንኳንካውን ብሰላም ከም ዘሎ ኽትፈልጥ ኢኻ፤ ንደምበኻ ክትምልከቶ ኢኻ፤ ሓደኳ ኣይጐድለካን።

²⁵ዘርእኻውን ዓብዪ ኸም ዝኸውን፥ ትውልድኻ ድማ፥ ከም ሳዕሪ ምድሪ ኸም ዝኸውን ክትፈልጥ ኢኻ።

²⁶ኵልሱስ እኽሊ ብጊዜኡ ኸም ዝኣቱ፥ ዕድመ ፀጊብካ ኽትቅበር ኢኻ።”

²⁷“እንሆ ነዙይ መርመርና፤ ዝሰማዕናዮውን እዙይ እዩ፤ ንስኻ ግና ዝኾነ ሰሪሕኻ እንተ ዄንካ ንባዕልኻ ፍለጦ።”