Read መ/ቅዱስ ትግርኛ, Tigrigna Bible, 1 ኢዮብ 6 Bible Online

ኢዮብ 6 - መ/ቅዱስ ትግርኛ, Tigrigna Bible, 1 bible

ኢዮብ 6

¹ሽዑ ኢዮብ ከምዙይ ኢሉ መለሰ፦

²“ወዮ፥ ትካዘይ እንተ ዝምዘን፥ ኵሉ መከራይውን ኣብ ሚዛን እንተ ዝምዘን!

³ካብ ሑፃ ባሕሪ ምኸበደ ነይሩ፤ ስለዙይ ቃለይ ምግታእ እስእን ኣለኹ።

⁴ናይ እቲ ዅሉ ዝኽእል እግዚኣብሄር ፍላፃ፥ ኣብ ውሽጢ ስጋይ እዩ፤ ነፍሰይ ድማ መርዚ ትሰቲ ኣላ፤ ናይ እግዚኣብሄር ድንጋፀ ኣብ ልዕለይ ተሰሊፉ ኣሎ።”

⁵“ንምዃኑ ኣድጊ በረኻዶ፥ ሳዕሪ እንተለዎ ይሃልል እዩ? ብዕራይከ፥ ሓሰር እንተለዎዶ እምባሕ ይብል እዩ?

⁶መቐረት ዘይብሉ ብልዒ ብዘይ ጨውዶ ይብላዕ እዩ? ማይ እንቍላሊሕኸ ጣዕሚዶ ኣለዎ እዩ?

⁷ሰብነተይ ክትነኽኦ እምቢ በለቶ፤ ከም ዘፀይፍ ብልዒ ኾነኒ።”

⁸“ኣየ፥ ኣበይሞ ፀሎተይ እንተ ዝስማዕ! እግዚኣብሄር ዝምነዮ እንተ ዝህበኒ!

⁹ኣበይሞ እግዚኣብሄር ፍቓዱ ኾይኑ እንተ ዝሰባብረኒ! ኢዱ ዘርጊሑ ኸዓ እንተ ዘጥፍአኒ!

¹⁰ንቓል እቲ ቕዱስ ኣይከሓድኩዎን እሞ፥ ምተፀናናዕኹ ነይረ፤ ስቓይ እኳ እንተ በርትዐኒ ታሕጓስ ምገበርኩ ነይረ።

¹¹ክፅመምስ ሓይለይ እንታይ እዩ? ንኽዕገስከ መወዳእታይ እንታይ እዩ?

¹²ሓይለይዶ ሓይሊ እምኒ እዩ? ስጋይከ ከም ነሃስ ድዩ?

¹³ብሓቂ ረድኤት ኣባይ ከም ዘየለ፥ ኵሉ ጥበብውን ካባይ ከም ዝተባረረዶ ኣይኮነን?

¹⁴እቲ ንብፃዩ ምሕረት ዘይገብረሉ፥ ንፍርሓት እቲ ዅሉ ዝኽእል ይሓድጎ።

¹⁵ኣሕዋተይ ግና ኸምቲ ዝነፅፍ ሩባታትን፥ ከም ዝሓልፍ ውሕጅን ጠለምቲ ኾኑኒ።

¹⁶እቶም ሩባታት ብዝሓቅቕ በረድ ይፅልሙ፤ ብዝሓቅቕ ኣስሓይታውን ይመልኡ።

¹⁷ፀሓይ ምስ በርትዐት ይነቕፁ፤ ሃሩር ምስ በርትዐ፥ ካብ ስፍራኦም ይጠፍኡ።

¹⁸ብወሰኖም ዝኸዱ ነጋዶ ድሕር ይብሉ፤ ናብ ምድረ በዳ ወፂኦም ከዓ ይጠፍኡ።

¹⁹ናይ ቴማን ነጋዶ ናብኡ የማዕድዉ፤ ናይ ሳባ ሓለፍቲ መንገዲውን ንኡኡ ተስፋ ይገብሩ።

²⁰ብኣኣቶም ተስፋ ገይሮም ነይሮም እዮም እሞ፥ ሓፈሩ፤ ናብኡ ምስ በፅሑ ሕፍረት ሓዞም።

²¹ሕዚ እውን ንስኻትኩም ከምኡ ፍረ ዘይብልኩም ኢኹም፤ መከራይ ርኢኹም ፈራሕኹም።

²²ብሓቂ ኣነዶ ‘ዝኾነ ነገር ኣምፅኡለይ፥ ወይ ካብ ሃብትኹም ውህብቶ’ ኣቕርቡለይ?

²³ወይ ‘ካብ ኢድ ፀላእየይ ኣናግፉኒ፤ ወይ ካብ ኢድ መጨነቒ ኣድሕኑኒዶ’ ኢለኩም እየ?”

²⁴“መሃሩኒ እሞ ኣነውን ስቕ ክብል እየ፤ እቲ ዝተጋጌኽዎ ድማ ኣፍልጡኒ።

²⁵ቃል ቅንዕና ኸመይ ሓያል እዩ፤ ምጕትኩም ግና እንታይ ይግስፅ?

²⁶ተስፋ ናይ ዝቘረፀ ሰብ ዘረባ ኸም ንፋስ እዩሞ፥ ንቓለይ ክትግስፁዶ ትሓስቡ ኣለኹም?

²⁷ኣብ ልዕሊ ደኽታም ዕፃ ትዋደቑ፤ ንፈተውትኹምውን ጕድጓድ ትዅዕቱ ኣለኹም።

²⁸በይዛኻትኩም ሕዚ እውን ናባይ ተመልከቱ፤ ኣብ ቅድሜኹም ሓሰት ኣይዛረብን እየ።

²⁹በይዛኻትኩም ተመለሱ ደኣ፥ በደል ኣይኹን፤ ፅድቀይ በዝ ነገር እዙይ እዩሞ ሓደ ጊዜ ተመለሱ።

³⁰ብሓቂ ኣብ ኣንደበተይዶ በደል ይርከብ? ኣፈይከ ተንዀል ክፈሊዶ ኣይኽእልን እዩ?”