Read መ/ቅዱስ ትግርኛ, Tigrigna Bible, 1 ኢዮብ 9 Bible Online

ኢዮብ 9 - መ/ቅዱስ ትግርኛ, Tigrigna Bible, 1 bible

ኢዮብ 9

¹ድሕሪዙይ ኢዮብ ከምዙይ ኢሉ መለሰ፦

² ከምኡ ምዃኑስ ብርግፅ እፈልጥ እየ፤ ግና ሰብ ኣብ ቅድሚ እግዚኣብሄር፥ ከመይ ኢሉ ፃድቕ ክኸውን ይኽእል?

³ሰብ ምስ እግዚኣብሄር ክማጐት እንተ ደለየ፥ ካብ ሽሕ ነገር ንሓደ እኳ ኽመልስ ኣይምኸኣለን ነይሩ።

⁴ንሱ ልቡ ጥበበኛ፥ ሓይሉውን ዓብዪ እዩ፤ ተቓዊምዎስ ዝሰለጦ መን እዩ?

⁵ንሱ ንእምባታት እንተይፈለጡ ይነቕሎም፤ ብብርቱዕ ቝጥዓኡውን ይገለባብጦም።

⁶ንሱ ንምድሪ ኻብ ቦታኣ የናውፃ፤ ኣዕምዳውን የንቀጥቅጡ።

⁷ንሱ ንፀሓይ ይእዝዛሞ ኣይትበርቕን፤ ንኸዋኽብቲውን ይሓትሞም።

⁸ንሱ በይኑ ንሰማያት ዘርግሖ፤ ኣብ ልዕሊ ማዕበል ባሕሪ ኸዓ ይኸይድ።

⁹ድቢ ንዝበሃል ኮኸብን ኣርዮ ንዝበሃል ኮኸብን፥ ንሸውዓተ ከዋኽብትን ብወገን ደቡብ ንዘለዉ መሕደሪታት ከዋኽብቲ ዝፈጠረ ንሱ እዩ።

¹⁰ንሱ ዘይምርመሩን ዓበይቲ ነገራትን ይገብር፤ ቍፅሪ ዘይብሉ ተኣምራትውን ይገብር።

¹¹እንሆ፥ ንሱ እንተ መፀኒ፥ ኣነ ኣይሪኦን፤ መሊሱ እንትሓልፈኒውን ኣየስተብህሎን?

¹²እንሆ፥ ንሱ ቐልጢፉ እንተ መንጠለ መን ክኽልክሎ ይኽእል? “ንእኡኸ እንታይ ትገብር ኣለኻ?” ኽብሎ ዝኽእል መን እዩ?

¹³እግዚኣብሄር ንቝጥዓኡ ኣይመልሶን እዩ፤ ኣብ ትሕቲኡ እቶም ንረዓብ [1] ዝሕግዙ ኽዋረዱ እዮም።

¹⁴እምበኣርከስ ክምልሰሉ፥ ቃለይውን ኣብ ቅድሚኡ ኽመርፅ ዝኽእል ኣነ መን እየ?

¹⁵ፃድቕ እንተ ዝኸውን፥ ንፈራድየይ ምሕረት ደኣ ምለመንክዎ እምበር፥ ኣይምመለስኩሉን።

¹⁶ፀዊዐዮ እንተ ዝምልሰለይ እኳ፥ ንድምፀይ ፅን ከም ዝበሎ ኣይምኣመንኩን።

¹⁷ንሱ ብንፋስ ኣውሎ ወቕዐኒ፤ ብዘይ ምኽንያት ድማ ንቝስለይ የብዝሖ።

¹⁸ንሱ ምረት ደኣ የፅግበኒ ኣሎ እምበር፥ ክትንፍስ ኣይሓደገንን።

¹⁹ብሓይሊ እንተ ኾይኑ፥ ንሱ ሓያል እዩ፤ ብፍርዲ እንተ ኾይኑ ኸዓ ጊዜ ዝውስን መን እዩ?

²⁰ፃድቕ እንተ ዝኸውን እኳ ኣፈይ ይወቕሰኒ፤ ፍፁም እንተ ዝኸውንውን ዓማፂ ምገበረኒ ነይሩ።

²¹ኣነ ፍፁም እየ፤ ግና ብዛዕባ ነፍሰይ ግዲ የብለይን፤ ንህይወተይውን እንዕቓ ኣለኹ።

²²እዝ ዅሉ ሓደ እዩ፤ ስለዙይ፦ “ንፍፁማንን ንሓጥኣንን ብሓደ የጥፍኦም እብል ኣለኹ።”

²³መቕሰፍቱ ቐልጢፉ እንተ ቐተለ፥ ንሱ ብፈተና እቶም ንፁሃት የላግፅ።

²⁴ምድሪ ኣብ ኢድ ሓጥኣን ተውሂባ ኣላ፤ ገፅ እቶም ፈራዶ እውን ሸፈነ፤ ንሱ እንተ ዘይኮይኑ ደኣ መን እዩ?

²⁵መዋእለይ፥ ካብ ጐያዪ ሰብ ይቕልጥፋ፤ ፅቡቕ ነገር እንተይረአያ ድማ ይሃድማ ኣለዋ።

²⁶ንሳተን ከም ቅልጥፍቲ ጃልባ ሸምበቆ፥ ዝበልዖ ኽምንጥል ከም ዝውንጨፍ ንስሪ ይሓልፋ።

²⁷ኣነ “ሓዘነይ ረሲዐ፥ ገፀይ ኣብሪሀ፥ ክሕጐስ ደኣ” እንተ በልኩ፥

²⁸ንፁህ ከም ዘይትገብረኒ ኣነ እፈልጥ ኣለኹሞ፥ ካብ ኵሉ መከራይ እፈርሕ ኣለኹ።

²⁹እምበኣር ከም በደለኛ ዝቝፀር እንተ ደኣ ኾይነ፥ ስለ ምንታይ ደኣ ንኸንቱ ዝደክም?

³⁰ብማይ በረድ እንተ ዝሕፀብ፥ ኣእዳወይውን ኣፀቢቐ እንተ ዘፅሪ እኳ፥

³¹ንስኻ ኣብ ውሽጢ ዓዘቕቲ ተስጥመኒ፤ ክዳውንተይ እኳ ይፅየፈኒ።

³²ንሱ ኸማይ ሰብ ስለ ዘይኮነ ኣይምልሰሉን፤ ክማጐቶውን ኣይክእልን እየ።

³³ኢዱ ኣብ ልዕሊ ኽልቴና ዘንብር ዳኛ፥ ኣበይሞ ኣብ መንጎና ኸም ተረኽበ።

³⁴በትሩ ኻባይ የርሕቕ፤ ግርማኡውን ኣየፍርሐኒ፤

³⁵ክናገርውን ኣይምፈራሕኽዎን ነይረ፤ ኣነ ግና ብባዕለይ ኸምኡ ኣይኮንኩን።