Read መ/ቅዱስ ትግርኛ, Tigrigna Bible, 1 ዳዊት 105 Bible Online

ዳዊት 105 - መ/ቅዱስ ትግርኛ, Tigrigna Bible, 1 bible

ዳዊት 105

¹ንእግዚኣብሄር ኣመስግንዎ፤ ስሙውን ፀውዑ፤ ግብርታቱውን ንኣህዛብ ንገሩ።

²ኣመስግኑ፤ ዘምሩሉ፤ ኵሉ ተኣምራቱውን ተናገሩ።

³ብቅዱስ ስሙ ተመክሑ፤ እቲ ንእግዚኣብሄር ዝደሊ ልቢ ይተሓጐስ።

⁴ንእግዚኣብሄር ድለይዎ፥ ክትብርትዑ ኢኹም፤ ኵልሻዕውን ገፁ ድለዩ።

⁵ኣቱም ዘርኢ እቲ ባርያ እግዚኣብሄር ዝኾነ ኣብርሃም፥ ኣቱም ሕሩያቱ ውሉድ ያእቆብ፥ ዝገበሮ መስተንክር ግብርታቱን ተኣምራቱን፥ ካብ ኣፉ ዝወፀ ፍርዱን ዘክሩ።

⁷ንሱ እግዚኣብሄር ኣምላኽና እዩ፤ ፍርዱውን ኣብ ኵሉ ምድሪ እዩ።

⁸ናይ ዘለኣለም ኪዳኑን፥ እቲ ኽሳዕ ሽሕ ትውልዲ ዝኣዘዞ ቓሉን ዘከረ።

⁹ ነቲ ንኣብርሃም ዝገበሮን፥ ነቲ ንይስሓቅ ዝመሓሎን፥

¹⁰ንያእቆብ ስርዓት ክኸውን፥ ንእስራኤል ድማ ኺዳን ዘለኣለም ክኸውን ኣፅንዖ።

¹¹ከምዙይ ድማ በለ፦ “ንኣኻ ምድሪ ከነዓን፥ ብፅሒት ርስትኻትኩም ክትኮነኩም ክህብ እየ።”

¹²እዙይ ዝኾነ ንሳቶም ስደተኛታት፥ ብቝፅሪውን ውሑዳት ሰባት፥ እንተለዉ እዩ።

¹³ካብ ህዝቢ ናብ ህዝቢ፥ ካብ መንግስቲ እውን ናብ ካልእ ህዝቢ ሓለፉ።

¹⁴“ነቶም ዝቐባእኽዎም ኣይትንክእዎም፤ ንነቢያተይ ድማ ኽፉእ ኣይትግበርዎም” ኢሉ፥ ሰብ፥ ግፍዒ ኽፍፅመሎም ኣይፈቐደን።

¹⁶ምእንትኣቶም ንነገስታት ገሰፀ፤ ኣብ ልዕሊ ምድሪ ጥሜት ኣምፅአ፤ ንዅሉ ሓይሊ እኽሊ ኣጥፍአ።

¹⁷ቀቅድሚኣቶም ሰብ ለኣኸ፤ ዮሴፍ ንባርነት ተሸጠ።

¹⁸ኣእጋሩ ብመቝሕ ደኸማ፤ ነፍሱውን ካብ መቝሕ ኣምለጠት።

¹⁹ቃሉ ኽሳዕ ዝመፀሉ፥ ቃል እግዚኣብሄር ፈተኖ።

²⁰ ንጉስ፥ ልኢኹ ፈትሖ፤ እቲ ሓለቓ ኣህዛብውን ኣፍትሖ።

²¹ ጐይታ ቤቱ ገበሮ፤ ኣብ ልዕሊ ዅሉ ጥሪቱውን ኣዛዚ ገበሮ።

²²ነሕሉቕ ከም ድላዩ ኽግስፅ፥ ነቶም መማኽርቱውን ጥበበኛታት ምእንቲ ኽገብሮም እዩ።

²³ እስራኤል ናብ ግብፂ ኣተወ፤ ያእቆብውን ኣብ ምድሪ ካም ተቐመጠ።

²⁴ንህዝቡ የመና ኣብዝሖም፤ ካብ ፀላእቶምውን ኣበርትዖም።

²⁵ንህዝቡ ኽፀልእዎም፥ ንባሮቱ ኽተናዀልዎም ልቦም ለወጠ።

²⁶ ንባርያኡ ንሙሴን ነቲ ዝሓረዮ ኣሮንን ለኣኸ።

²⁷ናይ ተኣምራቱ ምልክት ኣብ ልዕሊኣቶም፥ ዘደንቕ ነገርውን ኣብ ምድሪ ካም ገበረ።

²⁸ ፀልማት ሰደደ፤ ፀልመቶምውን፤ ንቓሉውን ዓመፁ።

²⁹ንማያቶም ናብ ደም ለወጠ፤ ንዓሳታቶም ከዓ ቐተለ።

³⁰ ምድሮምን፥ ኣብያተ ነገስታቶምን ብጭንቍራዕ መልኡ።

³¹ ተናገረ፤ ዕስለ ፅንፅያን ቃርማን ናብ ወሰና ወሰኖም መፁ።

³²ንዝናሞም በረድ ገበሮ፤ ሓዊ ኣብ ምድሮም ተባርዐት።

³³ ንወይኖምን ንበለሶምን ኣጥፍአ፤ ንዅሉ ኣእዋም ዓዶምውን ሰባበረ።

³⁴ተናገረ እሞ፥ ስፍሪ ቝፅሪ ዘይብሉ ኣንበጣን ኵብኵብታን መፀ፤

³⁵ ንዅሉ ተኽልታት ሃገሮም በልዖ፤ ንዅሉ ፍረ ምድሮምውን በልዐ።

³⁶ ንዅሉ በዅሪ ሃገሮም፥ ንዅሉ በዅሪ ሓይሎም ቀተለ።

³⁷ምስ ወርቅን ብሩርን ኣውፅኦም፤ ኣብ ማእኸል ነገዳቶም ደዌ ኣይነበረን።

³⁸ ፈሪሖምዎም ነይሮም እዮምሞ፥ ብምውፃኦም ግብፂ ተሓጐሰት።

³⁹ ደመና ንመጋረዲ ዘርግሐሎም፤ ሓዊ ድማ ብለይቲ ኸብርሀሎም ዘርግሐ።

⁴⁰ለመኑ ብርንሂጎታት ድማ ኣምፅአሎም፤ ብሕብስቲ ሰማይውን ኣፅገቦም።

⁴¹ ኰዅሒ ሰንጠቐ፤ ማያትውን ኣውሓዘ፤ ወሓይዝ ብበረኻ ኸዱ።

⁴²ነቲ ቕዱስ ቃሉን፥ ነቲ ባርያኡ ኣብርሃምን፥ ዘኪሩ እዩ እሞ።

⁴³ንህዝቡ ብሓጐስ፥ ነቶም ዝተመረፁ ኸዓ ብዕልልታ ኣውፅኦም።

⁴⁴ ሃገራት ኣህዛብውን ሃቦም፤ ንናይ ባዕዲ ድኻምውን ወረሱ።

⁴⁵ትእዛዛቱ ምእንቲ ኽሕልዉን፥ ሕጉውን ምእንቲ ኽፍፅሙን እዩ። ሃሌ ሉያ።