Read መ/ቅዱስ ትግርኛ, Tigrigna Bible, 1 ዳዊት 109 Bible Online

ዳዊት 109 - መ/ቅዱስ ትግርኛ, Tigrigna Bible, 1 bible

ዳዊት 109

¹ኦ ኣምላኽ፥ ንልመናይ ሸለል ኣይትበል።

²ኣፍ ሓጥእን ኣፍ ዓማፅን ኣብ ልዕለይ ተኸፊቶም እዮምሞ፤ ኣብ ልዕለይውን ብሓሰት ኣንደበት ተዛረቡ።

³ብቓል ፅልኢ ኸበቡኒ፤ ብኸንቱውን ተዋግኡኒ።

⁴ክንዲ ዘፍቀርክዎም ተፃረሩኒ፤ ኣነ ግና እፅሊ ኣለኹ።

⁵ክንዲ ሰናይ ክፉእ፥ ክንዲ ዘፍቀርክዎም ከዓ ፅልኢ ፈደዩኒ።

⁶ኣብ ልዕሊኡ ሓጢኣተኛ ሹም፤ ሰይጣንውን ኣብ የማኑ ይቑም።

⁷ኣብ ዝማጐተሉ ጊዜውን ተረቲዑ ይውፃእ፤ ፀሎቱውን ሓጢኣት ትኹኖ።

⁸ መዋዕሉውን ውሑዳት ይኹና፤ ንሽመቱውን ካልእ ይውሰዳ።

⁹ውሉዱ ደኽታማት ይኹኑ፤ ሰበይቱውን መበለት ትኹን።

¹⁰ደቁ ኸርተት ይበሉ፤ ለማኖውን ይኹኑ፤ ካብ ኣባይቶምውን ይስጐጕዎም።

¹¹ንዅሉ ገንዘቡ በዓል ዕዳ ይውረሮ፤ ንዅሉ ዝደኸመሉውን ባዕዲ ይዝመቶ።

¹²ዝረድኦውን ኣይርከብ፤ ንደኽታማት ደቁ ዝርህርሀሎም ኣይሃሉ።

¹³ደቁ ይጥፍኡ፤ ብሓደ ትውልዲ ስሙ ይደምሰስ።

¹⁴በደል ኣቦታቱ ኣብ ቅድሚ እግዚኣብሄር ትዘከር፤ ሓጢኣት እኖኡ ኸዓ ኣይደምሰስ።

¹⁵ኣብ ቅድሚ እግዚኣብሄር ኵልሻዕ ይሃሉ፤ መዘከርታኡውን ካብ ምድሪ ይጥፋእ።

¹⁶ምሕረት ክገብር ኣይሓሰበንሞ፤ ንሽግረኛን ንምስኪንን ሰጐጐ፤ ልቡ ንዝተሰብሮ ሰብ ንምቕታልውን ልቡ ጨካን እዩ።

¹⁷ንመርገም ፈተዋ፤ ናብኡ ድማ መፀት፤ ንበረኸት ኣይመረፃን፤ ካብኡ ድማ ረሓቐት።

¹⁸ንመርገም ከም ክዳን ተኸደና፤ ከም ማይ ናብ መዓንጣኡ፥ ከም ቅብኢውን ናብ ኣዕፅምቱ ሰረፀት።

¹⁹ከምቲ ዝውንዘፎ ልብስን፥ ከምቲ ዅልሻዕ ዝዕጠቖ ቅናትን ይኹኖ።

²⁰እዝ ግብሪ እዙይ ኣብቶም ምስ እግዚኣብሄር ዘፃልኡኒ፥ ኣብ ልዕሊ ነፍሰይውን ክፉእ ዝናገሩ እዩ።

²¹ኦ ጐይታ ኣምላኸይ፥ ንስኻ ግና ምእንቲ ስምካ ኢልካ፥ ምሕረትካ ኣብ ልዕልይ ግበር፤ ምሕረትካ ሰናይ እዩሞ ኣድሕነኒ።

²²ኣነ ምስኪንን ድኻን እየ እሞ፤ ልበይውን ኣብ ውሽጠይ ደንገፀኒ።

²³ከም ዝሓለፈ ፅላሎት ሃለቕኩ፤ ከም ኣንበጣውን ረገፍኩ።

²⁴ኣብራኸይ ብፆም ደኸማ፤ ስጋይውን ቅብኣት ብምስኣን ዓበረ።

²⁵ ኣነ ኸዓ መላገፂኦም ኮንኩ፤ እንትሪኡኒውን ርእሶም ይንቕንቑ።

²⁶ኦ ጐይታ ኣምላኸይ፥ ርድአኒ፤ ከም መጠን ምሕረትካውን ኣድሕነኒ።

²⁷ኦ ጐይታ፥ እዚኣ ኢድካ ኸም ዝኾነት፥ ንስኻውን ነዙይ ከም ዝገበርካ ይፍለጡ።

²⁸ንሳቶም ይራገሙ፤ ንስኻ ግና ባርኽ፤ እቶም ኣባይ ዝለዓሉ፥ ይሕፈሩ፤ ባርያኻ ግና ይተሓጐስ።

²⁹እቶም ዘፃልኡኒ ሓፍረትን ውርደትን ይከደኑ፤ ንነውሮምውን ከም ነፀላ ይወንዘፍዎ።

³⁰ንእግዚኣብሄር ብኣፈይ የመና ኸመስግኖ እየ፤ ኣብ ማእኸል ብዙሓትውን ክውድሶ እየ።

³¹ካብቶም ንነፍሱ ዝዅንንዋ ምእንቲ ኸድሕና፥ ኣብ የማን እቲ ድኻ ቖይሙ እዩ እሞ።