Read መ/ቅዱስ ትግርኛ, Tigrigna Bible, 1 ዳዊት 116 Bible Online

ዳዊት 116 - መ/ቅዱስ ትግርኛ, Tigrigna Bible, 1 bible

ዳዊት 116

¹እግዚኣብሄር ድምፂ ልመናይ ሰሚዑኒ እዩሞ ፈተኽዎ።

²እዝኑ ናባይ ኣቢሉ እዩሞ፥ ብዅሉ ዘመን ህይወተይ ክፅውዖ እየ።

³ፃዕሪ ሞት ሓዘኒ፤ ሕማም ሲኦልውን ረኸበኒ፤ ጭንቀትን መከራንውን ረኸበኒ።

⁴ሽዑ ኣነ፦ “ኦ ጐይታ፥ ንነፍሰይ ኣድሕና” ኢለ፥ ስም እግዚኣብሄር ፀዋዕኹ፤

⁵እግዚኣብሄር መሓርን ፃድቕን እዩ፤ ኣምላኽናውን ይቕረ በሃላይ እዩ።

⁶እግዚኣብሄር ንህፃናት ይሕልዎም፤ ተሸገርኩ፤ ንሱውን ኣድሓነኒ።

⁷እግዚኣብሄር ሰናይ ገይሩልኪ እዩ እሞ፥ ኦ ነፍሰይ ናብ ዕረፍትኺ ተመለሲ።

⁸ንነፍሰይ ካብ ሞት፥ ነዒንተይ ካብ ንብዓት፥ ነእጋረይ ካብ ምንድልሃፅ ኣድሒንካየን ኢኻሞ።

⁹ኣነውን ኣብ ቅድሚ እግዚኣብሄር ኣብ ሃገር ህያዋን ክነብር እየ።

¹⁰ ኣመንኩ፤ ስለዙይ ተናገርኩ፤ ኣነውን የመና ተጨነቕኩ።

¹¹ካብ ድንጋፀ ዝተልዓለውን፥ ኵሉ ሰብ ሓሳዊ እዩ በልኩ።

¹²ክንዲ እቲ ዅሉ ንኣይ ዝገበረለይ፥ ንእግዚኣብሄር እንታይ ክመልሰሉ እየ?

¹³ናይ ምድሓን ፅዋዕ ክቕበል እየ፤ ስም እግዚኣብሄርውን ክፅውዕ እየ።

¹⁴ኣብ ቅድሚ ዅሉ ህዝቡ፥ መብፅዓይ ንእግዚኣብሄር ክፍፅም እየ።

¹⁵ሞት ፃድቕ ኣብ ቅድሚ እግዚኣብሄር ክቡር እዩ።

¹⁶ኦ ጐይታ፥ ኣነ ባርያኻ እየ፤ ኣነ ባርያኻ ወዲ ኣንስተይቲ ባርያኻ እየ፤ መዋቕሐይ ሰበርካ።

¹⁷ንኣኻ መስዋእቲ ምስጋና ኽስውአልካ እየ፤ ስም እግዚኣብሄርውን ክፅውዕ እየ።

¹⁸ኣብ ቅድሚ ዅሉ ህዝቢ፥ ኣብ ኣደባባይ ቤት እግዚኣብሄር፥ ኦ ኢየሩሳሌም ኣብ ማእኸልኪውን። መብፅዓይ ንእግዚኣብሄር ክፍፅም እየ። ሃሌ ሉያ።