Read መ/ቅዱስ ትግርኛ, Tigrigna Bible, 1 ዳዊት 118 Bible Online

ዳዊት 118 - መ/ቅዱስ ትግርኛ, Tigrigna Bible, 1 bible

ዳዊት 118

¹ ንእግዚኣብሄር ኣመስግኑ፥ ሕያዋይ እዩሞ፤ ምሕረቱ ንዘለኣለም እዩ እሞ።

²ሕያዋይ ከም ዝኾነ፥ ምሕረቱውን ንዘለኣለም ከም ዝኾነ፥ ህዝቢ እስራኤል ሕዚ ይንገሩ።

³ሕያዋይ ከም ዝኾነ፥ ምሕረቱ ንዘለኣለም ከም ዝኾነ፥ ቤት ኣሮን ሕዚ ይንገሩ።

⁴ሕያዋይ ከም ዝኾነ፥ ምሕረቱ ንዘለኣለም ከም ዝኾነ፥ ኵሎም እቶም ንእግዚኣብሄር ዝፈርሑ ሕዚ ይንገሩ።

⁵ኣብ ጊዜ መከራይ ንእግዚኣብሄር ፀዋዕኽዎ፤ ሰምዐኒ፤ ኣስፍሐለይውን።

⁶ እግዚኣብሄር ረዳእየይ እዩ፤ ኣይፈርሕን፤ ሰብ እንታይ ክገብረኒ ይኽእል?

⁷እግዚኣብሄር ረዳእየይ እዩ፤ ኣነውን ኣብ ልዕሊ ፀላእተይ ክርኢ እየ።

⁸ብሰብ ካብ ምትእምማን፥ ብእግዚኣብሄር ምትእምማን ይበልፅ።

⁹ብገዛእቲ ተስፋ ኻብ ምግባር፥ ብእግዚኣብሄር ተስፋ ምግባር ይበልፅ።

¹⁰ኵሎም ኣህዛብ ከበቡኒ፤ ግና ብስም እግዚኣብሄር ኣሰነፍኩዎም።

¹¹ምኽባብስ ከበቡኒ፤ ግና ብስም እግዚኣብሄር ኣሰነፍኩዎም።

¹²ንህቢ ንመዓር ከም ዝኸብብ ከበቡኒ፤ ሓዊ ኣብ ውሽጢ እሾኽ ከም ዝነድድ ነደዱ፤ ብስም እግዚኣብሄር ድማ ኣሰነፍኩዎም።

¹³ደፋእኻኒ፥ ንኽወድቕውን ገድገድ በልኩ፤ እግዚኣብሄር ግና ሓገዘኒ።

¹⁴ ሓይለይን መዝሙረይን እግዚኣብሄር እዩ፤ ንሱውን መድሓኒየይ ኮነ።

¹⁵ድምፂ ዕልልታን መድሓኒትን፥ ኣብ ድንኳን ፃድቃን እዩ፤ “የማነይቲ ኢድ እግዚኣብሄር፥ ብርቱዕ ሓይሊ ገበረት።

¹⁶የማነይቲ ኢድ እግዚኣብሄር፥ ልዕል ልዕል ኣበለትኒ፤ የማነይቲ ኢድ እግዚኣብሄር፥ ሓይሊ ገበረት።”

¹⁷ብህይወት ክነብር እየ እምበር፥ ኣይመውትን፤ ንስራሕ እግዚኣብሄር ከዓ ኽነግር እየ።

¹⁸ምግሳፅስ እግዚኣብሄር ገሰፀኒ፤ ንሞት ግና ኣሕሊፉ ኣይሃበንን።

¹⁹ብኣኣተን ኣትየ ንእግዚኣብሄር ከመስግኖስ፥ በርታት ፅድቂ ኽፈቱለይ።

²⁰እዚኣ ናይ እግዚኣብሄር ኣፍ ደገ እያ፤ ፃድቃንውን ናብኣ ይኣትዉ።

²¹ስለ ዝሰማዕኻንን፥ መድሓኒየይውን ስለ ዝኾንካንን፥ አመስግነካ ኣለኹ።

²² እቲ ነደቕቲ ዝነዓቕዎ እምኒ፥ ንሱ ርእሲ መኣዝን ኮነ።

²³ እዙይ ኻብ እግዚኣብሄር ኮነ፤ ነዒንትናውን ዘደንቕ እዩ።

²⁴እግዚኣብሄር ዝሰርሓ መዓልቲ እዚኣ እያ፤ ብኣኣ ንተሓጐስ፤ ደስውን ይበለና።

²⁵ ኦ ጐይታ፥ በይዛኻ ሕዚ ኣድሕን፤ ኦ ጐይታ፥ በይዛኻ ኣቕንዐልና።

²⁶ እቲ ብስም እግዚኣብሄር ዝመፅእ ቡሩኽ እዩ፤ ካብ ቤት እግዚኣብሄር ባረኽናኩም።

²⁷እግዚኣብሄር ኣምላኽ እዩ፤ ንሱውን ኣብርሀልና፤ ክሳዕ ኣቕርንቲ እቲ መሰውኢ፥ ነቲ መስዋእቲ በዓል ብገመድ ኣሰርዎ።

²⁸ንስኻ ኣምላኸይ ኢኻ፤ አመስግነካ ኣለኹ፤ ንስኻ ኣምላኸይ ኢኻ፤ ልዕል ልዕል ከብለካ እየ፤ ሰሚዕኻኒ ኢኻሞ፥ መድሓኒትውን ኴንካኒ ኢኻሞ አመስግነካ ኣለኹ።

²⁹ሰናይ እዩሞ፥ ምሕረቱውን ንዘለኣለም እዩሞ፥ ንእግዚኣብሄር ኣመስግንዎ።