Read መ/ቅዱስ ትግርኛ, Tigrigna Bible, 1 ዳዊት 119 Bible Online

ዳዊት 119 - መ/ቅዱስ ትግርኛ, Tigrigna Bible, 1 bible

ዳዊት 119

¹ብመንገዶም ንፁሃን ዝኾኑ፥ ብሕጊ እግዚኣብሄር ዝኸዱ ቡሩኻት እዮም።

²ምስክርነቱ ዝሕልዉ፥ ብምሉእ ልቦምውን ዝደልይዎ ዝተባረኹ እዮም።

³ንሳቶም ዓመፅ ኣይገብሩን፤ ብመንገድታቱ ኸዓ ይኸዱ።

⁴ንትእዛዛትካ ተጠንቂቕና ምእንቲ ኽንሕልዎ፥ ንስኻ ኣዘዝካና።

⁵ስርዓታትካ ንኽሕሉ፥ መንገድታተይ ክቐንዐለይ ምፈተኹ ነይረ።

⁶ኵሉ ትእዛዛትካ እንትምልከት፥ ሽዑ ኣይሓፍርን እየ።

⁷ኦ ጐይታ ነቲ ቕኑዕ ፍርድኻ ምስ ተምሃርኩ፥ ብቕኑዕ ልቢ ኸመስግነካ እየ።

⁸ስርዓታትካ ኽሕሉ እየ፤ ፈፂምካ ኣይትደርብየኒ።

⁹መንእሰይ መንገዱ ብምንታይ የንፅህ? ቃልካ ብምሕላው እዩ።

¹⁰ብምሉእ ልበይ ደለኹኻ፤ ካብ ትእዛዝካ ኣይተርሕቐኒ።

¹¹ንኣኻ ምእንቲ ኸይብድል፥ ንቓልካ ኣብ ልበይ ዓቘርክዎ።

¹²ኦ ጐይታ፥ ንስኻ ቡሩኽ ኢኻ፤ ስርዓታትካ መሃረኒ።

¹³ኵሉ ፍርዲ ኣንደበትካ፥ ብኸንፈረይ ነገርኩ።

¹⁴ከም ኵሉ ሃብቲ፥ ብመንገዲ ምስክርነትካ ደስ በለኒ።

¹⁵ንትእዛዛትካ አስተንትኖ ኣለኹ፤ ንመንገድኻውን እደልዮ ኣለኹ።

¹⁶ብትእዛዛትካ እሕጐስ፤ ንቓልካውን ኣይርስዖን እየ።

¹⁷ብህይወት ክነብር፥ ቃልካውን ክሕሉስ፥ ንኣገልጋሊኻ ሰናይ ግበረለይ።

¹⁸ኣዒንተይ ክፈተለይ፤ ካብ ሕግኻውን ተኣምራትካ ኽርኢ እየ።

¹⁹ኣነ ኣብዛ ምድሪ ጋሻ እየ፤ ትእዛዛትካ ኻባይ ኣይትሰውር።

²⁰ነፍሰይ ኵልሻዕ ንፍርድኻ የመና ናፈቐት።

²¹ነቶም ካብ ትእዛዛትካ ዝሰሓቱ ትዕቢተኛታትን ርጉማትን ገሰፅካዮም።

²²ምስክርነትካ ደልየ እየ እሞ፥ ፀርፍን ንዕቐትን ካባይ ኣርሕቕ።

²³መሳፍንቲ ድማ ተቐሚጦም ነኣይ ሓመዩኒ፤ ኣገልጋሊኻ ግና ሕግታትካ የስተንትን ነበረ።

²⁴ምስክርነትካ ነኣይ ሓጐሰይ እዩ፤ ስርዓትካውን መኻርየይ እዩ።

²⁵ነፍሰይ ናብ ምድሪ ተፀግዐት፤ ከም ቃልካ ህያው ግበረኒ።

²⁶መንገድኻ ነገርኩ፤ ንስኻውን ሰማዕኻኒ፤ ስርዓታትካ መሃረኒ።

²⁷መንገዲ ስርዓትካ ኸስተውዕል ግበረኒ፤ ንተኣምራትካውን ከስተንትኖ እየ።

²⁸ካብ ሓዘን ዝተልዓለ ነፍሰይ ተታኸሰት፤ ብቓልካ ኣፅንዐኒ።

²⁹መንገዲ ዓመፅ ካባይ ኣርሕቕ፤ ሕግኻውን መሃረኒ።

³⁰መንገዲ ሓቂ መረፅኩ፤ ፍርድኻውን ኣይረሳዕኹን።

³¹ኦ ጐይታ፥ ናብ ምስክርነትካ ተፀጊዐ እየሞ ኣይተሕፍረኒ።

³²ንልበይ ምስ ኣስፋሕኻዮ፥ ብመንገዲ ትእዛዛትካ ጐየኹ።

³³ኦ ጐይታ፥ መንገዲ ስርዓታትካ መሃረኒ፤ ኣነ ኸዓ ኽሳዕ መወዳእታ ኽሕልዎ እየ።

³⁴ምስትውዓል ሃበኒ፤ ኣነ ኸዓ ንሕግኻ ኽደልዮ፥ ብምሉእ ልበይውን ክሕልዎ እየ።

³⁵ንኣኣ ፈትየ እየ እሞ፥ ብመንገዲ ትእዛዝካ ምርሐኒ።

³⁶ልበይ ናብ ስስዐ ዘይኮነስ፥ ናብ ምስክርነትካ ኣዘምብሎ።

³⁷ነዒንተይ ከንቱ ነገር ካብ ምጥማት ምለሰን፤ ብመንገድኻውን ህያው ግበረኒ።

³⁸ምእንቲ ክፈርሐካ፥ ንባርያኻ ብቓልካ ኣፅንዓዮ።

³⁹ፍርድኻ ሰናይ እዩሞ፥ ንዝፈርሖ ፀርፊ ኻባይ ኣርሕቕ።

⁴⁰እንሆ ትእዛዛትካ ናፈቕኩ፤ ብፅድቅኻ ህያው ግበረኒ።

⁴¹ኦ ጐይታ፥ ከምቲ ቓልካ፥ ምሕረትካን ምድሓንካን ይምፅኡኒ።

⁴²ብቓልካ ተኣሚነ እየሞ፥ ነቶም ዝፀርፉኒ ብነገር መልሲ ኽህቦም እየ።

⁴³ብፍርድታትካ ተኣሚነ ኣለኹሞ፥ ቃል ሓቂ ኻብ ኣፈይ ፈፂምካ ኣይተርሕቕ።

⁴⁴ክሳዕ ዘለኣለመ ኣለም፥ ንሕግኻ ዅልሻዕ ክሕልዎ እየ።

⁴⁵ንትእዛዛትካውን ደልየ እየሞ፥ ኣስፊሐ ክኸይድ እየ።

⁴⁶ኣብ ቅድሚ ነገስታት ምስክርነትካ ኽናገር እየ፤ ኣይሓፍርንውን።

⁴⁷በቶም የመና ዝፈትዎም፥ ትእዛዛትካ ደስ ይብለኒ።

⁴⁸ናብቶም ዝፈትዎም ትእዛዛትካ ኣእዳወይ ከልዕል እየ፤ ንስርዓታትካውን ከስተንትን እየ።

⁴⁹ነቲ ንኣይ ንኣገልጋሊኻ ዘተስፈኻዮ ቓል ዘክር፤ ቃልካ ህያው ገይሩኒ እዩ እሞ።

⁵⁰እዚኣ ብመከራይ ኣሐጐሰትኒ።

⁵¹ዕቡያት የመና ዓመፁ፤ ኣነ ግና ኻብ ሕግኻ ኣየግለስኩን።

⁵²ኦ ጐይታ፥ ነቲ ኻብ ጥንቲ ዝነበረ ፍርድታትካ እዝክሮ፤ ብእኡውን እፀናናዕ።

⁵³ካብቶም ሕግኻ ዝሓደጉ ሓጢኣተኛታት ዝተልዓለ፥ ሓዘን ሓዘኒ።

⁵⁴ተሰዲደ ኣብ ዝኸድኩሉ ዓዲ፥ ስርዓታትካ መዝሙር ኮነኒ።

⁵⁵ኦ ጐይታ፥ ብለይቲ ስምካ ዘከርኩ፤ ሕግኻውን ሓለኹ።

⁵⁶ንትእዛዛትካውን ደልየ ኣለኹሞ፤ ንሳውን ኮነትኒ።

⁵⁷እግዚኣብሄር፥ ግደይ ኢኻ፤ ኣነ ኸዓ ሕግኻ ኽሕሉ እየ በልኩ።

⁵⁸ብፍፁም ልበይ ናብ ገፅካ ተማህለልኩ፤ ከም ቃልካውን መሓረኒ።

⁵⁹ብዛዕባ መንገድታተይ ሓሰብኩ፤ ኣእጋረይውን ናብ ምስክርነትካ መለስኩ።

⁶⁰ትእዛዛትካ ንምሕላው ጨከንኩ እምበር፥ ኣይደንጐኹን።

⁶¹ገመድ ሓጥኣን ተጠምጠመኒ፤ ንሕግኻ ግና ኣይረሳዕኹን።

⁶²ስለ እቲ ቅኑዕ ፍርድኻ ኸመስግነካ፥ ፍርቂ ለይቲ እትስእ።

⁶³ኣነ ብፃይ እቶም ኵሎም ዝፈርሑኻን፥ ንትእዛዛትካ ዝሕልዉን እየ።

⁶⁴ኦ ጐይታ፥ ምሕረትካ ኣብ ኵሉ ምድሪ መሊኣ እያ፤ ስርዓታትካ መሃረኒ።

⁶⁵ኦ ጐይታ፥ ከም ቃልካ፥ ነገልጋሊኻ ሰናይ ገበርካሉ።

⁶⁶ብትእዛዛትካ ተኣሚነ ኣለኹ እሞ፥ ሰናይ ምኽርን ፍልጠትን መሃረኒ።

⁶⁷ቅድሚ ምጭናቐይ ሰሓትኩ፤ ሕዚ ግና ቓልካ እሕሉ ኣለኹ።

⁶⁸ንስኻ ሰናይ ኢኻሞ፥ ሰናይ ትገብር ኣለኻ፤ ብሕያዋይነትካውን ስርዓትካ መሃረኒ።

⁶⁹ዓመፅ ትዕቢተኛታት ኣብ ልዕለይ በዝሐ፤ ኣነ ግና ብምሉእ ልበይ ትእዛዛትካ እደሊ ኣለኹ።

⁷⁰ልቦም ከም ፀባ ረግአ፤ ኣነ ግና ብሕግኻ እሕጐስ ኣለኹ።

⁷¹ስርዓትካ ምእንቲ ኽመሃር፥ እቲ ዘጨነቕካኒ ፅቡቕ ኮነለይ።

⁷²ካብ ኣእላፋት ወርቅን ብሩርን ሕጊ ኣፍካ ይሕሸኒ።

⁷³ኣእዳውካ ሰርሓኒ ኣመዓራረያኒውን፤ ትእዛዛትካ ኽመሃርስ ምስትውዓል ሃበኒ።

⁷⁴ብቓልካ ተኣሚነ እየሞ፥ እቶም ዝፈርሑኻ ንኣይ ሪኦም ክሕጐሱ እዮም።

⁷⁵ኦ ጐይታ፥ ፍርድኻ ሓቂ ኸም ዝኾነት፥ በቲ ሓቂኻውን ከም ዘጨነቕካኒ ፈለጥኩ።

⁷⁶ምሕረትካ ንምፅንናዐይ ትኹን፤ ከምቲ ቓልካውን ንባርያኻ ይኹኖ።

⁷⁷ሕግኻ ደስታይ እዩ እሞ፥ ብህይወት ምእንቲ ኽነብር፥ ምሕረትካ ይምፅአኒ።

⁷⁸ዕቡያት ብዓመፅ ጠውዮምኒ እዮም እሞ ይሕፈሩ፤ ኣነ ግና ብትእዛዝካ እፃወት ኣለኹ።

⁷⁹እቶም ዝፈርሑኻን፥ ምስክርነትካ ዝፈልጡን ናባይ ይመለሱ።

⁸⁰ኣነ ምእንቲ ኸይሓፍር፥ ልበይ ብስርዓታትካ ቕኑዕ ይኹን።

⁸¹ነፍሰይ ምድሓንካ ናፈቐት፤ ብቓልካውን ተኣመንኩ።

⁸²“መኣዝ ኢኻ እተፀናንዐኒ?” እናበልኩ ኣዒንተይ ስለ ቓልካ ፈዘዛ፤

⁸³ኣብ ልዕሊ ትኪ ኸም ዝተሰቕለ ለቘታ ኾይነ እየሞ፤ ስርዓታትካ ግና ኣይረሳዕኹን።

⁸⁴ዘመን ባርያኻ ኽንደይ እየን? ኣብ ልዕሊ እቶም ዘሳጕጉኒኸ መኣዝ ክትፈርደለይ ኢኻ?

⁸⁵ሓጢኣተኛታት ፀወታ ነገሩኒ፥ ኦ ጐይታ ኸም ሕግኻ ግና ኣይኮነን።

⁸⁶ኵሉ ትእዛዛትካ ሓቂ እዩ፤ ብዓመፅ የሳጕጉኒ ኣለዉ እሞ፥ ርድአኒ።

⁸⁷ካብ ምድሪ ኸጥፍኡኒ ቑሩብ ተሪፍዎም ነይሩ፤ ኣነ ግና ትእዛዛትካ ኣይሓደግኩን።

⁸⁸ከም ምሕረትካ ህያው ግበረኒ፤ ኣነውን ናይ ኣፍካ ምስክርነት ክሕሉ እየ።

⁸⁹ኦ ጐይታ፥ ቃልካ ኣብ ሰማይ ንዘለኣለም ይነብር።

⁹⁰ሓቅነትካውን ንውሉድ ወለዶ እዩ፤ ንምድሪ መስረትካያ፤ ንሳውን ትነብር።

⁹¹ኵሎም ኣገልገልትኻ እዮምሞ፥ እቲ መዓልቲ ብትእዛዝካ ይነብር።

⁹²ሕግኻ መሐጐስየይ እንተ ዘይኸውን፥ ቀደም ብዕብራነይ ምጠፋእኹ ነይረ።

⁹³ብእኡ ህያው ጌርካኒ ኢኻ እሞ፥ ፍርድታትካ ንዘለኣለም ኣይርስዕን።

⁹⁴ኣነ ናትካ እየ፤ ፍርድታትካ ደልየ ኣለኹሞ ኣድሕነኒ።

⁹⁵ሓጢኣተኛታት ከጥፍኡኒ ይፀናተዉኒ ኣለዉ፤ ኣነ ግና ምስክርነትካ መርመርኩ።

⁹⁶ናይ ኵሉ ስራሕ ፍፃሜ ረአኹ፤ ትእዛዛትካ ግና የመና ሰፊሕ እዩ።

⁹⁷ኦ ጐይታ፥ ንሕግኻ ኽንደይ ፈተኹዎ! ምሉእ መዓልቲ እውን አስተንትኖ ኣለኹ።

⁹⁸ትእዛዛትካ ንዘለኣለም ምሳይ እዩ እሞ፥ ካብ ፀላእተይ ብዝበለፀ ኣለበመኒ።

⁹⁹ምስክርነትካ ስለ ዘስተንትን፥ ካብ ኵሎም ዝመሃሩኒ ዝበለፀ ኣስተውዓልኩ።

¹⁰⁰ትእዛዛትካ ሓልየ እየሞ፥ ካብ እቶም ሽማግለታት ዝበለፀ መስተውዓሊ ኾንኩ።

¹⁰¹ቃልካ ምእንቲ ኽሕሉ፥ ካብ ኵሉ ኽፉእ መንገዲ እግረይ ከልከልኩ።

¹⁰²ንስኻ ምሂርካኒ ኢኻሞ፥ ካብ ፍርድታትካ ኣይረሓቕኩን።

¹⁰³ቃልካ ንጐረሮይ ጥዑም እዩ፤ ንኣፈይ ካብ መዓርን ካብ ወለላን ዝበለፀ መቀረኒ።

¹⁰⁴ካብ ትእዛዛትካ ዝተልዓለ ኣስተውዓልኩ፤ ስለዙይ ኵሉ መንገዲ ሓሰት ፀላእኹ።

¹⁰⁵ቃልካ ንእግረይ መብራህቲ፥ ንመንገደይ ብርሃን እዩ።

¹⁰⁶ንፍርድታት ፅድቅኻ ክሕሉ መሓልኩ፤ ኣፅናዕኽዎውን።

¹⁰⁷ኦ ጐይታ፥ የመና ተጨኒቐ ኣለኹሞ፥ ከም ቃልካ ህያው ግበረኒ።

¹⁰⁸ኦ ጐይታ፥ እቲ ካብ ኣፈይ ዝወፅእ ቃል ባህ የብልካ፤ ፍርድኻውን መሃረኒ።

¹⁰⁹ነፍሰይ ኵልሻዕ ኣብ ኢደይ እያ፤ ሕግኻ ግና ኣይርስዕን እየ።

¹¹⁰ሓጢኣተኛታት መፈንጠር ኣፃወዱለይ፤ ኣነ ግና ትእዛዛትካ ኣይጠሓስኩን።

¹¹¹ናይ ልበይ ሓጐስ እዩ እሞ፥ ምስክርነትካ ንዘለኣለም ወረስኩ።

¹¹²ንዘለኣለም ክሳዕ መወዳእታውን፥ ትእዛዛትካ ኽገብር ንልበይ ኣዘንበልኩ።

¹¹³ንዓመፅቲ ፀላእኩ፤ ሕግኻ ግና ፈተኹ።

¹¹⁴ንስኻ ረዳእየይን መፀግዕየይን ኢኻ፤ ብቓልካውን ተኣማመንኩ።

¹¹⁵ትእዛዛት ኣምላኸይ ክደልስ፥ ኣቱም ዓመፀኛታት ካባይ ረሓቑ።

¹¹⁶ብህይወት ክነብርስ፥ ከም ቃልካ ደግፈኒ፤ ብተስፋይ ድማ ኣይተሕፍረኒ።

¹¹⁷ርድአኒ፤ ክድሕን ድማ እየ፤ ንስርዓታትካውን ኵሉ ጊዜ ኽምርምር እየ።

¹¹⁸ድልየቶም ዓመፅ እዩ እሞ፥ ካብ ስርዓታትካ ንዝርሕቑ ዅሎም ኣሕሰርካዮም።

¹¹⁹ንዅሎም ሓጢኣተኛታት ምድሪ፥ ከም ጐሓፍ ትጕሕፎም፤ ስለዙይ ምስክርነትካ ፈተኹ።

¹²⁰ስጋይ ንኣኻ ኻብ ምፍራሕ ዝተልዓለ ደንገፀ፤ ካብ ፍርድኻ ዝተልዓለ እፈርሕ ኣለኹ።

¹²¹ፍርድን ፅድቅን እገብር ኣለኹ፤ ንዘጨንቑኒ ኣሕሊፍካ ኣይተሃበኒ።

¹²²ንባርያኻ ብሰናይ ሓልዎ፤ ዕቡያት ኣይዳፍኡኒ።

¹²³ኣዒንተይ ንምድሓንካን ንሓቀኛ ቓልካን ብምፅባይ ፈዘዛ።

¹²⁴ንኣይ ንባርያኻ ኸም ምሕረትካ ግበረለይ፤ ስርዓታትካ ኸዓ መሃረኒ።

¹²⁵ኣነ ባርያኻ እየ፤ ምስክርነትካ ምእንቲ ኽፈልጥስ፥ ከስተውዕል ግበረኒ።

¹²⁶ንእግዚኣብሄር ጊዜ ስራሕ እዩ፤ ንሕግኻውን ሰዓርዎ።

¹²⁷ስለዙይ ንትእዛዛትካ ኻብ ወርቂ፥ ካብ ፅሩይ ዕንቊ ኣብሊፀ ፈተኹ።

¹²⁸ስለዙይ ናብ ኵሉ ትእዛዝካ ኣምራሕኹ፤ ንዅሉ መንገዲ ዓመፅውን ፀላእኹ።

¹²⁹ምስክራትካ ዘደንቑ እዮም፤ ስለዙይ ነፍሰይ ትደልዮም።

¹³⁰ምግላፅ ቃልካ ብርሃን ይህብ፤ ንህፃናት ድማ መስተውዓልቲ ይገብሮም።

¹³¹ንትእዛዝካ ናፊቐ ኣለኹሞ፥ ኣፈይ ከፈትኩ፤ ሃረርውን በልኩ።

¹³²ከምቲ ነቶም ስምካ ዝፈትዉ እትገብሮ ፍርዲ፥ ናባይ ተመልከት፤ መሓረኒውን።

¹³³ኣካይዳይ ከምቲ ቓልካ ኣቕንዕ፤ ኵሉ ሓጢኣትውን ኣይግዝአኒ።

¹³⁴ትእዛዛትካ ምእንቲ ኽሕሉ፥ ካብ ዝገፍዑኒ ሰባት ኣድሕነኒ።

¹³⁵ኣብ ልዕሊ ባርያኻ ገፅካ ኣብርህ፤ ስርዓታትካ ኸዓ መሃረኒ።

¹³⁶ሕግኻ ኣይሓለኹንሞ፥ ንብዓተይ ከም ወሓዚ ማይ ይፈስስ ኣሎ።

¹³⁷ኦ ጐይታ፥ ንስኻ ፃድቕ ኢኻ፤ ፍርድኻውን ቅኑዕ እዩ።

¹³⁸ምስክርነትካ ብፅድቂ ኣዘዝካ፤ የመናውን ቅኑዕ እዩ።

¹³⁹ፀላእተይ ትእዛዝካ ስለ ዝረስዑ፥ ቅንኣት ቤትካ በልዐኒ።

¹⁴⁰ቃልካ የመና ፅሩይ እዩ፤ ባርያኻውን ይፈትዎ።

¹⁴¹ኣነ ንኡስን ንዑቕን እየ፤ ትእዛዛትካ ግና ኣይረሳዕኹን።

¹⁴²ፅድቅኻ ናይ ዘለኣለም ፅድቂ እዩ፤ ቃልካውን ሓቂ እዩ።

¹⁴³መከራን ሽግርን ረኸቡኒ፤ ትእዛዛትካ ግና ሓጐሰይ እዮም።

¹⁴⁴ምስክርነትካ ንዘለኣለም ፅድቂ እዩ፤ ከስተውዕል ግበረኒ፤ ብህይወትውን ኣንብረኒ።

¹⁴⁵ኦ ጐይታ፥ ብምሉእ ልበይ እምህለል ኣለኹሞ ስምዐኒ፤ ስርዓታትካውን ክሕሉ እየ።

¹⁴⁶ናባኻ ኣእዌኹ፤ ኣድሕነኒ፤ ምስክርነትካውን ክሕሉ እየ።

¹⁴⁷ኣንጊሐ ኣእዌኹ፤ ንቓልካውን ተስፋ ገይረ ኣለኹ።

¹⁴⁸ቃልካ ምእንቲ ኸስተንትን፥ ኣዒንተይ ንምግስጋስ ቐደማ።

¹⁴⁹ኦ ጐይታ፥ ከም ምሕረትካ ቓለይ ስማዕ፤ ከም ፍርድኻውን ህያው ግበረኒ።

¹⁵⁰እቶም ብዓመፅ ዘሳጕጉኒ ቐረቡ፤ ካብ ሕግኻ ኸዓ ረሓቑ።

¹⁵¹ኦ ጐይታ፥ ንስኻ ቐረባ ኢኻ፤ ኵሎም መንገድታትካውን ቅኑዓት እዮም።

¹⁵²ካብ ዘለኣለም ከም ዝመስረትካዮ፥ ካብ ጥንቲ ጀሚረ ኻብ ምስክርነትካ ዝተልዓለ ፈለጥኩ።

¹⁵³ሕግኻ ኣይረሳዕኹን እሞ፥ መከራይ ርኢኻ ኣናግፈኒ።

¹⁵⁴ፍርደይ ፍረድሞ ኣናግፈኒ፤ ስለ ቓልካውን ህያው ግበረኒ።

¹⁵⁵ስርዓትካ ኣይደለዩን ኢዮምሞ፥ ድሕነት ካብ ሓጥኣን ርሑቕ እዩ።

¹⁵⁶ኦ ጐይታ፥ ርህራሄኻ የመና ብዙሕ እዩ እሞ፥ ከም ፍርድኻ ህያው ግበረኒ።

¹⁵⁷ዘሳጕጉንን ዘጨነቑንን ብዙሓት እዮም፤ ግና ኻብ ምስክርነትካ ድሕር ኣይበልኩን።

¹⁵⁸ቃልካ ኣይሕልዉን እዮም እሞ፥ ንሰነፋት ሪአ ሓዘንኩ።

¹⁵⁹ኦ ጐይታ፥ ንትእዛዛትካ ኸም ዝፈትዎ ረአ፤ ኦ ጐይታ፥ ብምሕረትካ ህያው ግበረኒ።

¹⁶⁰ናይ ቓልካ መጀመርታ ሓቂ እዩ፤ ኵሉ ፍርዲ ፅድቅኻውን ንዘለኣለም እዩ።

¹⁶¹ገዛእቲ ብኸንቱ ኣሳጐጕኒ፤ ካብ ቓልካ ዝተልዓለ ግና ልበይ ደንገፀኒ።

¹⁶²ብዙሕ ምርኮ ኸም ዝረኸበ፥ ብቓልካ እሕጐስ ኣለኹ።

¹⁶³ንዓመፃ ፀላእኹ፤ ተፀየፍኩውን፤ ንሕግኻ ግና ኣፍቅሮ ኣለኹ።

¹⁶⁴ስለ እቲ ፍርዲ ፅድቅኻ፥ ኣብ መዓልቲ ሸውዓተ ሻዕ አመስግነካ ኣለኹ።

¹⁶⁵እቶም ንሕግኻ ዘፍቅሩ ብዙሕ ሰላም ኣለዎም፤ ዘዕንቅፎምውን የለን።

¹⁶⁶ኦ ጐይታ፥ ምድሓንካ ተስፋ ገበርኩ፤ ንትእዛዛትካ ድማ ሓለኹ።

¹⁶⁷ነፍሰይ ንምስክርነትካ ትሕሉ ኣላ፤ የመናውን ትፈትዎ ኣላ።

¹⁶⁸ኵሉ መንገደይ ኣብ ቅድሜኻ እዩ እሞ፥ ትእዛዛትካን ምስክርነትካን እሕሉ ኣለኹ።

¹⁶⁹ኦ ጐይታ፥ ፀሎተይ ናብ ቅድሜኻ ትብፃሕ፤ ከም ቃልካውን ምስትውዓል ሃበኒ።

¹⁷⁰ምህለላይ ኣብ ቅድሜኻ ትብፃሕ፤ ከም ቃልካውን ኣናግፈኒ።

¹⁷¹ስርዓታትካ ምሂርካኒ ኢኻ እሞ፥ ከናፍረይ ምስጋና የውፅኣ።

¹⁷²ኵሉ ትእዛዛትካ ፅድቂ እዩ እሞ፥ ኣንደበተይ ቃልካ ተናገረ።

¹⁷³ንትእዛዛትካ መሪፀ ኣለኹሞ፥ ኢድካ ዘድሕነኒ ይኹን።

¹⁷⁴ኦ ጐይታ፥ ምድሓንካ እናፍቕ ኣለኹ፤ ሕግኻውን ሓጐሰይ እዩ።

¹⁷⁵ነፍሰይ ትንበረለይ፤ ክተመስግነካውን እያ፤ ፍርድታትካ ድማ ይርድአኒ።

¹⁷⁶ከም ዘጠፍአ በጊዕ ኰለል እብል ኣለኹ፤ ትእዛዛትካ ኣይረሳዕኹንሞ፥ ንባርያኻ ድለዮ።