Read መ/ቅዱስ ትግርኛ, Tigrigna Bible, 1 ዳዊት 135 Bible Online

ዳዊት 135 - መ/ቅዱስ ትግርኛ, Tigrigna Bible, 1 bible

ዳዊት 135

¹ሃሌ ሉያ። ንስም እግዚኣብሄር ኣመስግኑ፤ ኣቱም ኣገልገልቲ እግዚኣብሄር፥ ኣመስግንዎ።

²ኣቱም ኣብ ቤት እግዚኣብሄር፥ ኣብ ዓፀድ ቤት ኣምላኽና እትቖሙ፥

³ሕያዋይ እዩሞ፥ ንእግዚኣብሄር ኣመስግኑ፤ ሰናይ እዩ እሞ ንስሙ ዘምሩ።

⁴እግዚኣብሄር፥ ንያእቆብ ንባዕሉ፥ ንእስራኤል ከዓ ንርስቱ ሓርይዎ እዩ እሞ።

⁵እግዚኣብሄር ዓብዪ ኸም ዝኾነ፥ ጐይታና ኸዓ ኻብ ኵሎም ኣማልኽቲ ኸም ዝበልፅ ፈሊጠ ኣለኹሞ።

⁶ንሱ ኣብ ሰማይን ኣብ ምድርን፥ ኣብ ባሕርን ኣብ መዓሙቝን ዝደለዮ ዅሉ ገበረ።

⁷ካብ ወሰን ምድሪ ንደመናት የውፅእ፤ ብጊዜ ዝናም መብረቕ ይገብር፤ ንንፋሳትውን ካብ መዛግብቱ የውፅኦም።

⁸ኣብ ግብፂ ኻብ በዅሪ ሰብ፥ ክሳዕ በኵሪ እንስሳ ቐተለ።

⁹ኦ ግብፂ፥ ኣብ ማእኸልኪ፥ ኣብ ልዕሊ ፈርዖንን ኣብ ልዕሊ ዅሎም ኣገልገልቱን፥ ተኣምራትን ድንቅን ሰደደ።

¹⁰ብዙሓት ኣህዛብ ኣጥፍአ፤ ንብርቱዓት ነገስታትውን ቀተለ።

¹¹ንሴዎን ንጉስ ኣሞራውያንን ንኣግ ንጉስ ባሳንን፥ ንዅሎም ነገስታት ከነዓንን ቀተለ።

¹²ንምድሮም ርስቲ ገይሩ፥ ንህዝቡ እስራኤል ርስቲ ሃበ።

¹³ኦ ጐይታይ፥ ስምካ ንዘለኣለም እዩ፤ መዘከርታኻውን ንውሉድ ወለዶ እዩ።

¹⁴እግዚኣብሄር ንህዝቡ ኽፈርደሎም እዩ እሞ፤ ንኣገልገልቱ ድማ ኽረድኦም እዩሞ።

¹⁵ጣዖታት ኣህዛብ ብኢድ ሰብ ዝተሰርሑ፥ ስራሓት ብሩርን ወርቅን እዮም።

¹⁶ኣፍ ኣለዎም፥ ኣይዛረቡን፤ ዓይኒ ኣለዎም፥ ኣይሪኡን፤

¹⁷እዝኒ ኣለዎም፥ ኣይሰምዑን፤ ኣብ ኣፎም ድማ እስትንፋስ የለን።

¹⁸ እቶም ዝሰርሕዎምን፥ ኵሎም ኣብኣቶም ዝዕቘቡን ከምኣቶም ይኹኑ።

¹⁹ኣቱም ቤት እስራኤል፥ ንእግዚኣብሄር ባርኽዎ፤ ኣቱም ቤት ኣሮን፥ ንእግዚኣብሄር ባርኽዎ።

²⁰ኣቱም ቤት ሌዊ፥ ንእግዚኣብሄር ባርኽዎ፤ ኣቱም ንእግዚኣብሄር እትፈርሑ፥ ንእግዚኣብሄር ባርኽዎ።

²¹ኣብ ኢየሩሳሌም ዝሓድር እግዚኣብሄር ካብ ፅዮን ይባረኽ። ሃሌ ሉያ።