Read መ/ቅዱስ ትግርኛ, Tigrigna Bible, 1 ዳዊት 138 Bible Online

ዳዊት 138 - መ/ቅዱስ ትግርኛ, Tigrigna Bible, 1 bible

ዳዊት 138

¹ኦ ጐይታ፥ ብምሉእ ልበይ አመስግነካ ኣለኹ፤ ንዅሉ ቓል ኣፈይ ሰሚዕኻኒ ኢኻሞ፥ ኣብ ቅድሚ መላእኽቲ እዝምረልካ ኣለኹ።

²ንቕዱስ ስምካ ኣብ ልዕሊ ዅሉ ልዕል ልዕል ኣቢልካዮ ኢኻሞ፥ ናብ ቅዱስ መቕደስካ ኽሰግድ እየ፤ ስለ ምሕረትካን ስለ ሓቅኻን ንስምካ ኸመስግን እየ።

³በታ ዝፀዋዕኩኻ መዓልቲ ቐልጢፍካ ስምዐኒ፤ ንነፍሰይውን ብሓይልኻ ብብዙሕ ኣፅናዕኻያ።

⁴ኦ ጐይታ፥ ቃል ኣፍካ ሰሚዖም እዮምሞ፥ ኵሎም ነገስታት ምድሪ ኸመስግኑኻ እዮም።

⁵ክብሪ እግዚኣብሄር ዓብዪ እዩ እሞ፥ ብመንገዲ እግዚኣብሄር ክዝምሩ እዮም።

⁶እግዚኣብሄር ልዑል እዩሞ፥ ነቶም ትሑታን ይምልከቶም እዩሞ፥ ንትዕቢተኛታትውን ካብ ርሑቕ ይፈልጦም።

⁷ብማእኸል መከራ እኳ እንተ ኸድኩ፥ ንስኻ ህያው ትገብረኒ፤ ኣብ ልዕሊ ቝጥዓ ፀላእተይ ኢድካ ትዝርግሕ፤ የማነይቲ ኢድካውን ክተድሕነኒ እያ።

⁸እግዚኣብሄር ክፈድየለይ እዩ፤ ኦ ጐይታ፥ ምሕረትካውን ንዘለኣለም እዩ፤ ኦ ጐይታ፥ ንተግባር ኣእዳውካውን ሸለል ኣይትበል።