Read መ/ቅዱስ ትግርኛ, Tigrigna Bible, 1 ዳዊት 139 Bible Online

ዳዊት 139 - መ/ቅዱስ ትግርኛ, Tigrigna Bible, 1 bible

ዳዊት 139

¹ኦ ጐይታ፥ ንስኻ መርመርካኒ፤ ፈለጥካኒውን።

²ንስኻ ምቕማጠይን ምትስአይን ትፈልጥ፤ ንዅሉ ሓሳብ ልበይውን ገና ኻብ ርሑቕ ትፈልጦ።

³ኣሰረይን ዕረፍተይን ንስኻ መርመርካ፤ ንዅሉ መንገደይውን ኣቐዲምካ ፈለጥካዮ።

⁴ቃል ዓመፅ ኣብ ኣንደበተይ ከም ዘየለ ፈለጥካዮ።

⁵ኦ ጐይታ እንሆ ናይ ቀዳማይን ናይ ዳሕረዋይን ንስኻ ትፈልጥ ኢኻ፤ ንስኻ ፈጠርካኒ፤ ኢድካውን ኣብ ልዕለይ ኣንበርካ።

⁶ፍልጠትካ ኻባይ ብዝበለፀ ተደነቐት፤ በርትዐት፥ ናብኣ ኽበፅሕውን ኣይኽእልን።

⁷ካብ መንፈስካ ናበይ ክኸይድ እየ? ካብ ገፅካኸ ናበይ ክሃድም እየ?

⁸ንሰማይ እንተ ደየብኩ፥ ንስኻ ኣብኡ ኣለኻ፤ ኣብ ሲኦል እንተ ወረድኩውን፥ ኣብኡ ኣለኻ።

⁹ከም ንስሪ ኣኽናፍ ወጋሕታ እንተ ወሰድኩ፥ ክሳዕ መወዳእታ ባሕሪ እውን እንተ በረርኩ፥

¹⁰ኣብኡውን ኢድካ ኽትመርሐኒ፥ የማንካውን ክትሕዘኒ እያ።

¹¹ብርግፅ ፀልማት ክትሽፍነኒ እያ እንተ በልኩ፥ ለይቲ ኣብ ዙርያይ ብርሃን ትኸውን።

¹²ፀልማት ኣባኻ ኣይፅልምትን እዩሞ፥ ለይቲ እውን ከም መዓልቲ ተብርህ እያሞ፥ ከም መጠን ፀልማታ ብርሃና ኸምኡ እዩ።

¹³ኦ ጐይታ፥ ንዀላሊተይ ንስኻ ፈጠርካ፤ ኣብ ማህፀን ወላዲተይውን ንስኻ ሰወርካኒ።

¹⁴ግሩምን ዘደንቕን ጌርካ ፈጢርካኒ ኢኻ እሞ፥ ከመስግነካ እየ፤ ስራሕኻ ዘደንቕ እዩ፤ ነፍሰይውን ነዙይ ብሓቂ ትፈልጦ እያ።

¹⁵ኣነ ብስውር እንትስራሕ፥ ኣካለይውን ኣብ ትሕቲ ምድሪ እንትስራሕ፥ ኣዕፅምተይ ካባኻ ኣይተሰወሩን።

¹⁶ነቲ ገና ዘይተሰርሐ ኣካለይ፥ ኣዒንትኻ ረአያ፤ እቶም ዝተፈጠሩ መዓልትታተይ ሓደኳ እንተይነበረ፥ ኣብ መፅሓፍካ ተፅሓፉ

¹⁷ኦ ኣምላኽ፥ ሓሳባትካ ንኣይ ከመይ የመና ኽቡር እዩ! ቍፅሮምከ ክንደይ ብዙሕ እዩ!

¹⁸እንተ ቘፀርክዎም ኻብ ሑፃ የመና ይበዝሑ፤ ተሳእኹውን፥ ኣነ ገና ምሳኻ እየ ዘለኹ።

¹⁹ኦ ጐይታ፥ ነቶም ሓጥኣን ትቐትሎም እንተ ደኣ ዄንካ፥ ኣቱም ናይ ደም ሰባት፥ ካባይ ረሓቑ!

²⁰ንሳቶም ብተንኰል ይዛረቡልካ እዮም፤ ፀላእትኻውን ብኸንቱ ይዕምፁኻ።

²¹ኦ ጐይታ፥ ነቶም ዝፀልኡኻዶ ኣይፀላእኹዎምን? ስለ ፀላእትኻኸ ኣይተሰቀቕኩንዶ?

²²ፍፁም ፅልኢ ፀላእኽዎም፤ ፀላእትውን ኮኑኒ።

²³ኦ ጐይታ፥ መርምረኒ፤ ንልበይውን ፍለጥ፤ ፈትነኒ፤ መንገደይውን ፍለጥ፤

²⁴በደልውን ኣባይ ዝርከብ እንተ ደኣ ኾይኑ ረአ፤ በቲ ናይ ዘለኣለም መንገድውን ምርሐኒ።