Read መ/ቅዱስ ትግርኛ, Tigrigna Bible, 1 ዳዊት 144 Bible Online

ዳዊት 144 - መ/ቅዱስ ትግርኛ, Tigrigna Bible, 1 bible

ዳዊት 144

¹ነእዳወይ ውግእ፥ ነፃብዕተይ ሰልፊ ዝመሃረን እግዚኣብሄር ኣምላኸይ ይባረኽ።

²ንሱ መሓሪየይን መዕቘብየይን ዕርደይን፥ መድሓኒየይን፤ ረድኤተይን መተኣማመንየይን፥ ንህዝበይውን ኣብ ትሕተይ ዘግዝአለይ ንሱ እዩ።

³ኦ ጐይታ፥ ንስኻ ኽትፈልጦ ሰብ እንታይ እዩ? ንስኻ ኽትዝክሮኸ ወዲ ሰብ እንታይ እዩ?

⁴ሰብ ከንቱ ይመስል፤ መዓልትታቱ፥ ድማ ኸም ፅላሎት ይሓልፍ።

⁵ኦ ጐይታ፥ ንሰማያትካ ትሕት ትሕት ኣብሎም፤ ውረድውን፤ ንእምባታትውን ዳህስሶም፤ ክትክዩ እዮም።

⁶መባርቕትካ ብልጭ ኣብል፤ በትኖምውን፤ ፍላፃታትካ ወርውር፤ ሃውኮምውን።

⁷ኢድካ ኻብ ኣርያም ለኣኽ፤ ካብ ብዙሕ ማይ፥ ካብ ኢድ ደቂ ጓናውን ኣድሕነኒ።

⁸ኣንደበቶም ከንቱ ነገር ካብ ዝናገር፥ የማኖምውን የማን ዓመፅ ካብ ዝኾነ ኣድሕነኒ።

⁹ኦ ኣምላኽ፥ ሓድሽ መዝሙር ክዝምረልካ እየ፤ ዓሰርተ ኣውታር ብዘለዎ በገና ኽዝምረልካ እየ።

¹⁰ንነገስታት መድሓኒት ዝህቦም፥ ንዳዊት ባርያኡ ኻብ ክፉእ ዂናት ዘድሓኖ ንሱ እዩ።

¹¹ኣንደበቶም ከንቱ ኻብ ዝናገር፥ የማኖምውን የማን ዓመፅ ካብ ዝኾነ፥ ካብ ኢድ ደቂ ጓኖት ኣናግፈኒ፤ ኣድሕነኒውን፤

¹²ደቆም ብጕብዝናኣቶም ከም ሓድሽ ኣታኽልቲ ዝኾኑ፥ ኣዋልድ ደቆምውን ከም ሕልፍኚ ዘጌፃን ዝተሸለማን ዝኾና፥

¹³ኣባይቶምውን ዝመልኡ፥ በብዓይነቱ እኽሊ ዝህቡ፥ ኣባጊዖምውን ብዙሓት ዝወልዳ፥ ኣብ መውፈሪአንውን ዝበዝሓ፥

¹⁴ኣብዑሮም የመና ዝሰብሑ፥ ንቕፅራቶምውን መፍረስን መውፅእን ዘይብሉ፥ ኣብ ኣደባባያቶምውን ኣውያት ዘየለ፥

¹⁵ከምዙይ ዝበለ ህዝቢ ብሩኽ እዩ፤ እግዚኣብሄር ኣምላኹ ዝኾነ ህዝቢ ብሩኽ እዩ።