Read መ/ቅዱስ ትግርኛ, Tigrigna Bible, 1 ዳዊት 145 Bible Online

ዳዊት 145 - መ/ቅዱስ ትግርኛ, Tigrigna Bible, 1 bible

ዳዊት 145

¹ኦ ኣምላኸይን፥ ንጉሰይን፥ ልዕል ልዕል አብለካ ኣለኹ፤ ስምካውን ንዘለኣለመ ኣለም ክባርኽ እየ።

²ኵሉ መዓልቲ ኽባርኸካ እየ፤ ስምካውን ንዘለኣለመ ኣለም ክውድስ እየ።

³እግዚኣብሄር ዓብዪ እዩ፤ ምስጋናኡውን ብዙሕ እዩ፤ ንዕቤቱ ወሰን የብሉን።

⁴ውሉድ ወለዶ ንግብርታትካ ኽንእዱ እዮም፤ ሓይልኻውን ከውርዩ እዮም።

⁵ንኽቡር ግርማ ቅድስናኻ ኽናገሩ እዮም፤ ተኣምራትካውን ክነጋገሩ እዮም።

⁶ግርማ ሓይልኻውን ክናገሩ እዮም፤ ልዕልናኻውን ክነጋገሩ እዮም፤ ብርታዐኻውን ክነጋገሩ እዮም።

⁷ብዝሒ ሕያዋይነትካ ብሓጐስ ከውፅኡ፥ ብፅድቅኻውን ሓሴት ክገብሩ እዮም።

⁸እግዚኣብሄር ርሕሩሕን መሓርን እዩ፤ ንቝጥዓ ዝድንጒ ምሕረቱውን ዝበዝሐ እዩ።

⁹እግዚኣብሄር ንዝዕገስዎ ሕያዋይ እዩ፤ ምሕረቱውን ኣብ ልዕሊ ዅሉ ስራሑ እዩ።

¹⁰ኦ ጐይታ፥ ኵሉ ስራሕኻ የመስግነካ፤ ቅዱሳንካውን ይባርኹኻ።

¹¹ክብሪ መንግስትኻ ይነጋገሩ፤ ሓይልኻውን ይናገሩ።

¹²ሓይልኻን ክብሪ መንግስትኻን፥ ንደቂ ሰባት ምእንቲ ኸፍልጡ እዩ።

¹³መንግስትኻ መንግስቲ ዘለኣለም እያ፤ ግዝኣትካውን ካብ ትውልዲ ናብ ትውልዲ እዩ።

¹⁴እግዚኣብሄር ብዅሉ ቓሉ እሙን እዩ፤ ብዅሉ ስራሑውን ፃድቕ እዩ። እግዚኣብሄር ነቶም ሰንከልከል ዝብሉ ዅሎም ይድግፎም፤ ነቶም ዝወደቑ ድማ የልዕሎም።

¹⁵ናይ ኵሉ ዓይኒ፥ ንኣኻ ተስፋ ይገብር፤ ንስኻውን ብእዋኑ ምግቦም ትህቦም።

¹⁶ኢድካ ትዝርግሕ እሞ፥ ንዅሉ ህይወት ዘለዎ፥ ብሰናይ ተፅግቦ።

¹⁷እግዚኣብሄር ብዅሉ መንገዱ ፃድቕ እዩ፤ ብዅሉ ስራሑውን ሕያዋይ እዩ።

¹⁸እግዚኣብሄር ንዝፅውዕዎ ዅሎም፥ ብሓቂ ንዝፅውዕዎ ዅሎም ቀረባ እዩ።

¹⁹ድልየት እቶም ዝፈርሕዎ ይፍፅም፤ ኣውያቶም ይሰምዕ፤ የድሕኖምውን።

²⁰እግዚኣብሄር ንዅሎም ዝፈትውዎ ይሕልዎም፤ ንዅሎም ሓጥኣን ግና የጥፍኦም።

²¹ኣፈይ ምስጋና እግዚኣብሄር ይዛረብ፤ ኵሉ ስጋ ዝለበሰ ካብ ዘለኣለም ክሳዕ ዘለኣለም፥ ንቕዱስ ስሙ ይባርኽ።