Read መ/ቅዱስ ትግርኛ, Tigrigna Bible, 1 ዳዊት 147 Bible Online

ዳዊት 147 - መ/ቅዱስ ትግርኛ, Tigrigna Bible, 1 bible

ዳዊት 147

¹ንእግዚኣብሄር ኣመስግንዎ፤ መዝሙር ሰናይ እዩሞ፤ ንኣምላኽና ብመዝሙር ምምስጋንውን ፅቡቕ እዩ።

²እግዚኣብሄር ንኢየሩሳሌም ክሃንፃ እዩ፤ ነቶም ዝተበተኑ ህዝቢ እስራኤል ከዓ ኽእክቦም እዩ።

³ነቶም ልቦም ዝቘሰለውን ይፍውሶም፤ ንቝስሎምውን ይፅግን።

⁴ንብሙሉኦም ከዋኽብቲ ይቘፅሮም፥ ንዅሎምውን በብስሞም ይፅውዖም።

⁵ጐይታና ዓብዪ እዩ፤ ሓይሉውን ዓብዪ እዩ፤ ንጥበቡውን ወሰን የብሉን።

⁶እግዚኣብሄር ንየዋሃን ልዕል የብሎም፤ ንሓጥኣን ግና ኽሳዕ ምድሪ የዋርዶም።

⁷ንእግዚኣብሄር ብምስጋና ዘምሩ፤ ንኣምላኽናውን ብመሰንቆ ዘምሩሉ።

⁸ንሰማያት ብደመና የጐልብብ፤ ንምድሪ እውን ዝናብ የዳሉ፤ ኣብ እምባታት ድማ ሳዕሪ የብቍል፤ ለምለምውን ንደቂ ሰባት ጥቕሚ ይህብ።

⁹ነቶም ዝፅውዕዎ ጫቚታት ኳዃት፥ ንእንስሳትውን ምግቦም ይህቦም።

¹⁰ንሓይሊ ፈረስ ኣይብህጎን፤ በእጋር ሰብውን ኣይሕጐስን።

¹¹እግዚኣብሄር በቶም ዝፈርሕዎን፥ በቶም ብምሕረቱ ዝእመኑን ይሕጐስ።

¹²ኦ ኢየሩሳሌም፥ ንእግዚኣብሄር ኣመስግኒ፤ ኦ ፅዮን፥ ንኣምላኽኪ ወድሲ።

¹³መሸጐሪ መዓፁኺ ኣፅኒዑ እዩሞ፥ ንደቅኺውን ኣብ ውሽጥኺ ባሪኹዎም እዩሞ።

¹⁴ኣብ ወሰናትኪ ሰላም ገበረ፤ ብስብሒ ስርናይውን ኣፅገበኪ።

¹⁵ትእዛዙ ናብ ምድሪ ይሰድድ፤ ቃሉውን ቀልጢፉ ይጐዪ።

¹⁶ንበረድ ከም ፀምሪ ይህብ፤ ንግመ ኸዓ ኸም ሓመድ ይብትኖ።

¹⁷ንበረድውን ከም ርፍራፍ የውርድ፤ ንቝሩኸ መን ክቃወሞ ይኽእል?

¹⁸ቃሉ ይልእኽ እሞ፥ የምክኾ፤ ንፋስ የንፍስ እሞ፥ ማያት የውሕጅ።

¹⁹ቃሉ ንያእቆብ፥ ስርዓታቱን ፍርድታቱን ድማ ንእስራኤል ይነግር።

²⁰ንኻልኦት ኣህዛብ ከምዙይ ከቶ ኣይገበረሎምን፤ ፍርዱውን ኣይገለፀሎምን። ሃሌ ሉያ።