Read መ/ቅዱስ ትግርኛ, Tigrigna Bible, 1 ዳዊት 148 Bible Online

ዳዊት 148 - መ/ቅዱስ ትግርኛ, Tigrigna Bible, 1 bible

ዳዊት 148

¹ሃሌ ሉያ። ንእግዚኣብሄር ካብ ሰማያት ኣመስግንዎ፤ ብኣርያም ኣመስግንዎ።

²ኵልኹም መላእኽቱ፥ ኣመስግንዎ፤ ኵልኹም ሰራዊቱ፥ ኣመስግንዎ።

³ፀሓይን ወርሕን፥ ኣመስግናኦ፤ ኵልኹም ከዋኽብትን ብርሃናትን ኣመስግንዎ።

⁴ሰማየ ሰማያትን ኣብ ልዕሊ ሰማያት ዘለኹም ማያትን፥ ንስም እግዚኣብሄር ኣመስግንዎ።

⁵ንሱ ኢሉ እዩሞ ኾኑ፤ ንሱውን ኣዚዙ እዩሞ ተፈጠሩ፤ ንስም እግዚኣብሄር የመስግንዎ።

⁶ንዘለኣለመ ኣለምውን ኣቖሞም፤ ትእዛዝ ሃቦም፤ ኣይሓልፉንውን።

⁷ኵልኻትኩም ገበላት መዓሙቝ ማያት፥ ንእግዚኣብሄር ካብ ምድሪ ኣመስግንዎ።

⁸ሓዊን በረድን ኣስሓይታን ሑመድያን ንቓሉ ዝእዘዝ ንፋስ ኣውሎን፥

⁹ኵልኻትኩም እምባታትን ኰረብታታትን፥ ኵሉ ዘፍሪ ኦምን ዝግባን፥

¹⁰ኣራዊትን ኵልኻትኩም እንስሳን፥ ለመም እትብሉን፥ ነፈርቲ ኣዕዋፍን፥

¹¹ነገስታት ምድርን፥ ኵልኻትኩም ህዝብታትን፥ ኣሕሉቕን፥ ኵልኻትኩም ገዛእቲ ምድርን፥

¹²ኣጓብዝን ደናግልን፥ ዓበይትን ህፃናትን፥

¹³ንስም እግዚኣብሄር የመስግኑ፤ ስሙ ንበይኑ ልዕል ልዕል ኢሉ እዩሞ፥ ምስጋናኡውን ኣብ ሰማይን ኣብ ምድርን እዩ።

¹⁴ቀርኒ ህዝቡ ልዕል ልዕል ከብል እዩ፤ ምስጋና ዅሎም ቅዱሳኑውን፥ እቶም ናብኡ ዝቐረቡ ህዝቢ ደቂ እስራኤል፥ ልዕል ልዕል ከብል እዩ። ሃሌ ሉያ።