Read መ/ቅዱስ ትግርኛ, Tigrigna Bible, 1 ዳዊት 18 Bible Online

ዳዊት 18 - መ/ቅዱስ ትግርኛ, Tigrigna Bible, 1 bible

ዳዊት 18

¹ኦ ሓይለይ እግዚኣብሄር፥ እፈትወካ እየ።

²እግዚኣብሄር ከውሐይ፥ ዕርደይን መድሓኒየይን እዩ፤ ኣምላኸይ፥ ብእኡውን ዝእመነሉ ረዳእየይ፥ መተኣማመኒየይን ቀርኒ ምድሓነይን መፀግዕየይን እዩ።

³ምስጋና ንዝግብኦ እግዚኣብሄር ክፅውዕ እየ፤ ካብ ፀላእተይውን ክድሕን እየ።

⁴ፃዕሪ ሞት ሓዘኒ፤ ውሕጅ ዓመፅውን ኣፍርሐኒ፤

⁵ፃዕሪ ሲኦል ከበበኒ፤ መፈንጠር ሞት ኣርከበኒ።

⁶ብጊዜ መከራይ ንእግዚኣብሄር ፀዋዕኹዎ፤ ናብ ኣምላኸይውን ኣእዌኹ፤ ካብ መቕደሱውን ድምፀይ ሰምዐ፤ ገዓረይውን ኣብ ቅድሚኡ ናብ ኣእዛኑ ኣተወ።

⁷ሽዑ ምድሪ ኣንቀጥቀጠትን ተናወፀትን፤ መሰረታት እምባታትውን ተነቓነቑ፤ እግዚኣብሄር ስለ ዝተቘጥዐ ኸዓ ተንቀጥቀጡ።

⁸ካብ ቍጥዓኡ ትኪ ወፀ፤ ካብ ቅድሚኡ ዝባላዕ ሓዊ ነደደ፤ ፍሕሚውን ኻብኡ በርሀ።

⁹ንሰማያት ትሕት ትሕት ኣቢሉ ወረደ፤ ኣብ ትሕቲ ኣእጋሩውን ጣቓ ነበረ።

¹⁰ኣብ ልዕሊ ኪሩቤል ተቐሚጡ በረረ፤ በኽናፍ ንፋስ ከዓ በረረ።

¹¹መሰወሪኡ ድማ ፀልማት ገበረ፤ ኣብ ዙርያኡውን ድንኳኑ ገበረ፤ ኣብ ውሽጢ ደመናት ናይ ፀልማት ማይ ነበረ።

¹²ኣብ ገፁ ኻብ ዘሎ ነፀብራቕ ዝተልዓለ፥ ደመናን በረድን ጓህሪ ሓዊን ሓለፉ።

¹³እግዚኣብሄር ካብ ሰማይ ኣንጐድጐደ፤ ልዑልውን ቃሉ ሃበ።

¹⁴ፍላፃታቱ ወርዊሩ በተኖም፤ ብርቱዕ መብረቕ ሰዲዱውን ሃወኾም።

¹⁵ኦ ጐይታ፥ ካብ ቍጥዓኻ፥ ካብ እስትንፋስ መንፈስ መዓትካውን ዝተልዓለ፥ ዓይኒ ማያት ተርኣዩ፤ መሰረታት ምድሪ እውን ተገለፁ።

¹⁶እግዚኣብሄር ካብ ኣርያም ኢዱ ዘርጊሑ ሓዘኒ፤ ካብ ብዙሕ ማያትውን ኣውፅአኒ።

¹⁷ካብቶም ብርቱዓት ፀላእተይ፥ በርቲዖምኒ ነይሮም እዮምሞ፥ ካብቶም ዝፀልኡኒ ፀላእተይውን ኣድሓነኒ።

¹⁸ብመዓልቲ መከራይውን በፅሑኒ፤ ግና እግዚኣብሄር ደገፈይ ኮነኒ።

¹⁹ናብ ሰፊሕ ቦታውን ኣውፅአኒ፤ ፈትዩኒ እዩሞ ኣድሓነኒ።

²⁰እግዚኣብሄር ከም ፅድቀይ ክኸፍለኒ እዩ፤ ከም ንፅህና ኢደይውን ክፈድየኒ እዩ።

²¹መንገዲ እግዚኣብሄር ሓሊየ እየሞ፤ ኣብ ኣምላኸይውን ኣይዓመፅኩን።

²²ኵሉ ፍርዱ ኣብ ቅድመይ እዩሞ፤ ስርዓታቱውን ካባይ ኣየርሓቕኩን።

²³ኣብ ቅድሚኡ ቅኑዕ ነበርኩ፤ ካብ ሓጢኣተይውን ተዓቀብኩ።

²⁴እግዚኣብሄር ከም መጠን ፅድቀይ፥ ክህበኒ እዩ፤ ኣብ ቅድሚኡውን ከም ንፅህና ኢደይ ክፈድየኒ እዩ።

²⁵ምስ ፃድቕ፥ ፃድቕ ትኸውን፤ ምስ ቕኑዕ፥ ቅኑዕ ትኸውን።

²⁶ምስ ንፁህ፥ ንፁህ ትኸውን፤ ምስ ጠዋይ፥ ጠዋይ ትኸውን።

²⁷ንስኻ ንጥቑዕ ህዝቢ ተድሕኖ ኢኻሞ፤ ንዓይኒ ትዕቢተኛታት ግና ተዋርዶ።

²⁸ኦ ጐይታ፥ ንስኻ መብራህተይ ተብርህ፤ ኣምላኸይ እግዚኣብሄር፥ ንፀልማተይ የብርህ።

²⁹ብኣኻ ኻብ ጥፍኣት እድሕን፤ ብኣምላኸይውን ንቕፅሪ እዘሎ።

³⁰መንገዲ ኣምላኸይ ፍፁም እዩ፤ ቃል እግዚኣብሄር ፅሩይ እዩ፤ ንሱ ነቶም ንእኡ ዝእመኑ ዅሎም ዋልታኦም እዩ።

³¹ብዘይ እግዚኣብሄር፥ ኣምላኽ መን እዩ? እንትርፊ ኣምላኽናኸ እግዚኣብሄር መን እዩ?

³²ሓይሊ የዕጥቐኒ፥ ንመንገደይውን የቕንዐለይ፤

³³ ነእጋረይ ከም እግሪ ሰስሓ ዘፅንዐን፤ ኣብ እምባታት ከዓ ዘቑመኒ፥ እግዚኣብሄር እዩ።

³⁴ነእዳወይ ውግእ ይምህረን፤ ንቐላፅመይውን ቀስቲ ነሃስ ገበረን።

³⁵ንድሕነተይውን መተኣማመኒ ሂብካኒ፤ የማነይትኻውን ትድግፈኒ፤ ትምህርትኻውን ንዘለኣለም የፅንዐኒ፤ ዝምህረኒውን ተግሳፅካ እዩ።

³⁶ንኣካይዳይ ኣብ ትሕተይ ኣስፋሕኻለይ፤ ኣእጋረይውን ኣይተሰናኸላን።

³⁷ንፀላእተይ ከሳጕጎም፤ ክሕዞምውን እየ፤ ክሳዕ ዘጥፍኦምውን ኣይምለስን።

³⁸ከጨንቖም እየ፤ ምቛምውን ኣይኽእሉን፤ ኣብ ትሕቲ እግረይ ክወድቑ እዮም።

³⁹ብጊዜ ሰልፊ ሓይሊ ተዕጥቐኒ፤ ንዅሎም እቶም ኣብ ልዕለይ ዝቖሙ ኣብ ትሕተይ ተግዝኦም።

⁴⁰ዝባን ፀላእተይ ሃብካኒ፤ ነቶም ዝፀልኡኒ ኸዓ ኣጥፋእኻዮም።

⁴¹ዝረድኦም ደልዮም ኣእወዩ፤ ዘናግፎም ግና ኣይረኸቡን፤ ናብ እግዚኣብሄር ከዓ ኣእወዩ፤ ንሱውን ኣይሰምዖምን።

⁴²ኣብ ቅድሚ ንፋስ ከም ዘሎ ሓመድ ክጥሕኖም እየ፤ ከም ጭቃ መንገዲውን ክረግፆም እየ።

⁴³ካብ ክርክር ኣህዛብ ተድሕነኒ፤ ርእሲ ኣህዛብ ጌርካ ድማ ትሸመኒ፤ ዘይፈልጦ ህዝቢ እውን ተገዝአለይ።

⁴⁴ብእዝኒ ሰሚዖም ተገዝኡለይ፤ ደቂ ጓና እናሰገዱ ናባይ መፁ።

⁴⁵ደቂ ጓና ኣረጉ፤ ብመንገዶምውን ተሰናኸሉ።

⁴⁶እግዚኣብሄር ህያው እዩ፤ ኣምላኸይውን ብሩኽ እዩ፤ ኣምላኽ መድሓኒተይውን ልዕል ልዕል ይበል።

⁴⁷እቲ በቐለይ ዝምልሰለይ ኣምላኽ፤ ንኣህዛብውን ኣብ ትሕተይ ከግዝአለይ እዩ።

⁴⁸ካብ ፀላእተይ ዘናግፈኒ ንሱ እዩ፤ ኣብ ልዕለይ ካብ ዝቖሙ ልዕል ልዕል ተብለኒ፤ ካብ ገፋዒ ሰብ ተድሕነኒ ኢኻ።

⁴⁹ ኦ ጐይታ ስለዙይ ኣብ ማእኸል ኣህዛብ ከመስግነካ እየ፤ ንስምካውን ክዝምር እየ።

⁵⁰ዓብዪ ድሕነት ንንጉስ ይገብረሉ፤ ምሕረቱውን ንዝቐብኦ ንዳዊትን ንዘርኡን ክሳዕ ዘለኣለም ይህብ።