Read መ/ቅዱስ ትግርኛ, Tigrigna Bible, 1 ዳዊት 22 Bible Online

ዳዊት 22 - መ/ቅዱስ ትግርኛ, Tigrigna Bible, 1 bible

ዳዊት 22

¹ ኣምላኸይ፥ ኣምላኸይ፥ ንምንታይ ሓደግካኒ? ንኣይ ካብ ምድሓን፥ ካብ ቃል ገዓረይውን ርሑቕ ኢኻ።

²ኦ ኣምላኸይ፥ ብመዓልቲ ናባኻ እጠርዕ፥ ግና ኣይመለስካለይን፤ ብለይቲ እኳ ዕረፍቲ የብለይን።

³ብእስራኤል ዝተመስገንካ ንስኻ ግና፥ ብቕድስና ትነብር።

⁴ኣቦታትና ኣባኻ ተኣመኑ፤ ተኣመኑ፤ ንስኻውን ኣናገፍካዮም።

⁵ናባኻ ኣእወዩ፤ ኣምለጡውን፤ ኣባኻውን ተኣመኑ፤ ኣይሓፈሩንውን።

⁶ኣነ ግና ሓሰኻ እምበር ሰብ ኣይኮንኩን፤ ናይ ሰብ መላገፂ ብህዝቢ እውን ዝተንዓቕኩ እየ።

⁷ኵሎም ዝሪኡኒ የባጭዉለይ፤ ርእሶም እናነቕነቑ ብኸናፍሮም፦ “ኣብ እግዚኣብሄር ተኣማመነ፤ እስኪ የናግፎ፤ እንተ ፈትዩዎስ እስኪ የድሕኖ” ይብሉ።

⁹ግና ንስኻ ኻብ ማህፀን ኣውፃእኻኒ፤ ኣብ ጡብ እኖይ እንተለኹውን ኣባኻ ተዓቘብኩ።

¹⁰ካብ ማህፀን ጀሚሩ ኣባኻ ተደርበኹ፤ ካብ ከብዲ እኖይ ጀሚርካ ንስኻ ኣምላኸይ ኢኻ።

¹¹ጭንቂ ቐሪቡ ኣሎሞ፥ ዝረድአኒውን የለንሞ፥ ካባይ ኣይትርሓቕ።

¹²ብዙሓት ኣብዑር ከበቡኒ፤ ስቡሓት ሽደናትውን ሓዙኒ።

¹³ከምቲ ዝምንዝዕን ዝጓዝምን ኣንበሳ፥ ኣብ ልዕለይ ኣፎም ከፈቱ።

¹⁴ከም ማይ ፈሰስኩ፤ ኵሉ ኣዕፅምተይውን ተፈላለየ፤ ልበይ ከም ሽምዒ ኾነ፤ ኣብ ማእኸል ኣምዑተይውን መኸኸ።

¹⁵ሓይለይ ከም ገልዒ ነቐፀ፤ ልሳነይ ኣብ ትሕናገይ ጠበቐ፤ ናብ መሬት ሞትውን ኣውረድካኒ።

¹⁶ብዙሓት ኣኽላባት ከቢቦምኒ እዮም እሞ፥ ማሕበር ክፉኣትውን ሓዙኒ፤ ኣእዳወይን ኣእጋረይን ሸንከሩኒ።

¹⁷ኵሎም ኣዕፅምተይ ተቘፀሩ፤ ንሳቶምውን ይጥምቱንን ይዕዘቡንን ኣለዉ።

¹⁸ ክዳውንተይ ንባዕላቶም ተማቐልዎ፤ ንቐምሸይውን ዕፃ ተዋደቑሉ።

¹⁹ኦ ጐይታይ! ንስኻ ግና ኻባይ ኣይትርሓቕ፤ ኣታ ሓይለይ፥ ንኣይ ንምርዳእ ፍጠን።

²⁰ንነፍሰይ ካብ ሰይፊ ኣድሕና፤ ንብሕትነተይውን ካብ ኢድ ኣኽላባት ኣናግፋ።

²¹ካብ ኣፍ ኣንበሳ ኣድሕነኒ፤ ካብ ሓደ ዝቐርኑ ጐባይ ኣናግፈኒ።

²² ስምካ ነሕዋተይ ክነግሮም እየ፤ ኣብ ማእኸል ማሕበርውን ከመስግነካ እየ።

²³“ኣቱም ንእግዚኣብሄር እትፈርሑ ኣመስግንዎ፤ ኣቱም ዘርኢ ያእቆብ ኵልኻትኩም ኣኽብርዎ፤ ኵልኻትኩም ዘርኢ እስራኤልውን፥ ፍርሕዎ።

²⁴ናይ ውፁዕ ሽግር ኣይነዓቐንሞ፥ ሸለልውን ኣይበለንሞ፤ ገፁውን ካባይ ኣይሰወረንሞ፥ ናብኡ ምስ ኣእዌኹውን ሰምዐኒ።”

²⁵ኣብ ማእኸል ዓብዪ ጉባኤ ምስጋናይ ካባኻ እዩ፤ ኣብ ቅድሚ እቶም ዝፈርሕዎ መብፅዓይ ክህብ እየ።

²⁶ድኻታት በሊዖም ክፀግቡ እዮም፤ እቶም ንእግዚኣብሄር ዝደልይዎውን ከመስግንዎ እዮም፤ ልቦምውን ንዘለኣለም ህያው ይኸውን።

²⁷ኵሎም ወሰናት ምድሪ ይሕሰቡ፤ ናብ እግዚኣብሄርውን ይመለሱ፤ ኵሎም ነገድ ኣህዛብውን ኣብ ቅድሚኡ ክሰግዱ እዮም።

²⁸መንግስቲ ናይ እግዚኣብሄር እያ እሞ፥ ንሱውን ንኣህዛብ ክገዝእ እዩ።

²⁹ኵሎም ተረርቲ ምድሪ ክበልዑን፥ ክሰግዱን እዮም፤ ኵሎም እቶም ናብ መሬት ዝወርዱ፥ ኣብ ቅድሚኡ ኽንብርከኹ እዮም፤ ነፍሰይውን ስሌኡ ብህይወት ክትነብር እያ።

³⁰ዘርአይ ክግዝአሉ እዩ፤ ዝመፅእ ትውልዲውን ንእግዚኣብሄር ክነግር እዩ።

³¹ፅድቁውን ነቲ ገና ዝውለድ ህዝቢ፥ እግዚኣብሄር ዝገበሮን ፅድቁን ክነግሩ እዮም።