Read መ/ቅዱስ ትግርኛ, Tigrigna Bible, 1 ዳዊት 25 Bible Online

ዳዊት 25 - መ/ቅዱስ ትግርኛ, Tigrigna Bible, 1 bible

ዳዊት 25

¹ኦ ጐይታ፥ ነፍሰይ ናባኻ ኣልዕል ኣለኹ።

²ኣምላኸይ፥ ኣባኻ እእመን ኣለኹ፥ ኣይሕፈር፤ ፀላእተይውን በኣይ ኣይስሓቑ።

³እቶም ኣባኻ ተስፋ ዝገብሩ፥ ኣይሓፍሩን እዮም፤ እቶም ብኸንቱ ዝተናዀሉ ግና ኽሓፍሩ እዮም።

⁴ኦ ጐይታ፥ መንገድኻ ኣመልክተኒ፤ ኣሰርካውን መሃረኒ።

⁵ንስኻ ናይ ምድሓነይ ኣምላኽ ኢኻ እሞ፥ ብሓቅኻ ምርሐኒ፤ መሃረኒውን፤ ኵልሻዕ ኣባኻ ተስፋ እገብር ኣለኹ።

⁶ኦ ጐይታ፥ ምሕረትካን ሕያዋይነትካን፥ ካብ ጥንቲ እየንሞ ዘክረን።

⁷ኦ ጐይታ፥ ነቲ ብንእስነተይ ዝገበርክዎ ሓጢኣተይን በደለይን ኣይትዘክሮ፤ ስለ ብዝሒ ለውሃትካ፥ ከም ምሕረትካ ዘክረኒ።

⁸እግዚኣብሄር ሕያዋይን ቅኑዕን እዩ፤ ስለዙይ ንሓጥኣን መንገዲ ይመርሖም።

⁹ንሱ ንየዋሃን ብፍርዲ ይመርሖም፤ ንገርህታትውን መንገዲ ይምህሮም እዩ።

¹⁰ነቶም ቃል ኪዳኑን ምስክሩን ዝሕልዉ፥ ኵሉ መንገዲ እግዚኣብሄር ሕያዋይነትን ሓቅን እዩ።

¹¹ኦ ጐይታ፥ ሓጢኣተይ ብዙሕ እዩ እሞ፥ ምእንቲ ስምካ ይቕረ በለለይ።

¹²ንእግዚኣብሄር ዝፈርሕ ሰብ መን እዩ? በቲ ንሱ ዝመረፆ መንገዲ ይመርሖ።

¹³ነፍሱ ኣብ ሰናይ ትሓድር፤ ዘርኡውን ንምድሪ ይወርስ።

¹⁴እግዚኣብሄር ነቶም ዝፈርሕዎ ሓይሎም እዩ፤ ቃል ኪዳኑውን የፍልጦም።

¹⁵ንሱ ነእጋረይ ካብ መፈንጠር የናግፈን እዩሞ፥ ኣዒንተይ ኵልሻዕ ናብ እግዚኣብሄር እየን።

¹⁶ኦ ጐይታ፥ ኣነ በይነይን ሽግረኛን እየሞ፥ ገፅካ ናባይ ግበር፤ መሓረኒውን።

¹⁷ሽግር ልበይ ብዙሕ እዩ፤ ካብ ጭንቀተይ ኣውፅአኒ።

¹⁸ንድኻመይን መከራይን ረአ፤ ንዅሉ ሓጢኣተይውን ይቕረ በለለይ።

¹⁹ፀላእተይ ከም ዝበዝሑ ረአ፤ ብግፍዒውን ፀልኡኒ።

²⁰ንነፍሰይ ሓልዋ፤ ኣናግፈኒውን፤ ንኣኻ ተኣሚነ እየሞ ኣይሕፈር።

²¹ብኣኻ ተስፋ ገይረ ኣለኹ እሞ፥ ተኣማንነትን ቅንዕናን ይሓልዋኒ።

²²ኦ ጐይታ፥ ንእስራኤል ካብ ኵሉ መከራኡ ኣድሕኖ።