Read መ/ቅዱስ ትግርኛ, Tigrigna Bible, 1 ዳዊት 33 Bible Online

ዳዊት 33 - መ/ቅዱስ ትግርኛ, Tigrigna Bible, 1 bible

ዳዊት 33

¹ኦ ፃድቃን፥ ብእግዚኣብሄር ተሓጐሱ፤ ንቕኑዓት ምስጋና ይግብኦም እዩ።

²ንእግዚኣብሄር ብመሰንቆ ኣመስግንዎ፤ ዓሰርተ ኣውታር ብዘለዎ በገና ዘምሩሉ።

³ሓድሽ መዝሙር ዘምሩሉ፤ ብዕልልታውን ሰናይ መዝሙር ዘምሩ።

⁴ቃል እግዚኣብሄር ቅኑዕ እዩ እሞ፥ ኵሉ ስራሑውን ብእምነት እዩ።

⁵ፅድቅን ፍትሕን ይፈቱ፤ ሕያዋይነት እግዚኣብሄርውን ንምድሪ መልኦ።

⁶ብቓል እግዚኣብሄር ሰማያት ፀንዑ፤ ኵሉ ሰራዊቶምውን ብእስትንፋስ ኣፉ ፀንዑ።

⁷ንማያት ባሕሪ ኸም ሓርቢ ኣብ ሓደ ይእክቦ፤ ንቓላያትውን ኣብ መዛግብቲ የንብሮም።

⁸ምድሪ ብምልእታ ንእግዚኣብሄር ትፍርሓዮ፤ ኵሎም ኣብ ዓለም ዝነብሩውን ካብኡ ዝተልዓለ ይደንግፁ።

⁹ንሱ ተዛሪቡ እዩሞ ኾኑ፤ ንሱ ምስ ኣዘዘውን ፀንዑ።

¹⁰እግዚኣብሄር ንምኽሪ ኣህዛብ ከንቱ ይገብሮ፤ ንሓሳባት ኣህዛብውን የፍርሶ።

¹¹ምኽሪ እግዚኣብሄር ግና ንዘለኣለም ይነብር፤ ሓሳባት ልቡውን ንውሉድ ወለዶ እዩ።

¹²እግዚኣብሄር ዝኣምላኹ ህዝቢ ብፁእ እዩ፤ እቲ ርስቱ ክኸውን ዝሓረዮ ህዝቢ እውን ብሩኽ እዩ።

¹³እግዚኣብሄር ካብ ሰማይ ተመልከተ፤ ንዅሎም ደቂ ሰብውን ረአየ።

¹⁴ኣብ ማሕደሩ ኾይኑ፥ ነቶም ኣብ ምድሪ ዝነብሩ ዅሎም ተመልከተ።

¹⁵ንሱ በይኑ ንልቦም ዝፈጠረ፥ ንተግባር ኵላቶም ድማ ዝፈልጥ ንሱ እዩ።

¹⁶ንጉስ ብብዝሒ ሰራዊቱ ኣይድሕንን፤ ሓያልውን ብብርትዐ ሓይሉ ኣየምልጥን።

¹⁷ፈረስውን ከንቱ እዩ፤ ኣየድሕንን፤ ብብዝሒ ሓይሉውን ኣየምልጥን።

¹⁸እንሆ ኣዒንቲ እግዚኣብሄር ናብቶም ዝፈርሕዎ እየን፤ ብምሕረቱውን ናብ ዝእመንኦ እየን።

¹⁹ንሱ ንነፍሶም ካብ ሞት የድሕን፤ ብዘመን ጥሜትውን ይምግቦም።

²⁰ነፍስና ንእግዚኣብሄር ተስፋ ትገብር፤ ረዳኢናን መፀግዕናን ንሱ እዩሞ።

²¹ልብና ብእኡ ይሕጐስ ኣሎሞ፥ ብቅዱስ ስሙ ተኣሚንና ኢናሞ።

²²ኦ ጐይታ፥ ከምቲ ብኣኻ ዝተኣመንና፥ ምሕረትካ ኣብ ልዕሌና ትኹን።