Read መ/ቅዱስ ትግርኛ, Tigrigna Bible, 1 ዳዊት 35 Bible Online

ዳዊት 35 - መ/ቅዱስ ትግርኛ, Tigrigna Bible, 1 bible

ዳዊት 35

¹ኦ ጐይታ፥ ነቶም ዝገፍዑኒ ግፍዓዮም፤ ነቶም ዝዋግኡኒውን ተዋግኣዮም።

²ዋልታን ኲናትን ሓዝ፤ ንኣይ ንምርዳእውን ተልዓል።

³ሰይፍኻ ምዘዝ፤ ነቶም ዘሳጕጉኒ መንገዶም ዕፆ፤ ንነፍሰይውን “መድሓኒኺ ኣነ እየ” በላ።

⁴ንነፍሰይ ዝደልዩ ዅሎም ይሕፈሩን ይዋረዱን፤ እቶም ኣብ ልዕለይ ክፍኣት ዝሓስቡ ይሕፈሩ፤ ንድሕሪኣቶምውን ይመለሱ።

⁵ከምቲ ኣብ ቅድሚ ንፋስ ዘሎ በነንታ ይኹኑ፤ መልኣኽ እግዚኣብሄር የጨንቆም።

⁶መንገዶም ፀልማትን መንደልሃፅን ይኹን፤ መልኣኽ እግዚኣብሄር ድማ የሳጕጎም።

⁷ብኸንቱ ኸጥፍኡኒ መፈንጠሮም ብሕቡእ ዘርጊሖምለይ እዮም እሞ፥ ንነፍሰይውን ብኸንቱ ኣበሳጭዮምዋ እዮም እሞ።

⁸ዘይፈልጥዎ መፈንጠር ይምፅኣዮም፤ እቲ ዝሓብእዎ መፈንጠር ይሓዞም፤ ናብቲ ውሽጢ መፈንጠርውን ይውደቑ።

⁹ነፍሰይ ግና ብእግዚኣብሄር ደስ ይብላ፤ ብምድሓኑውን ትሕጐስ።

¹⁰ኵሎም ኣዕፅምተይ ከምዙይ ይብሉኻ፦ “ኦ ጐይታ፥ ከማኻ ዝበለ መን እዩ? ንስኻ ነቲ ድኻ ኻብ ኢድ ዝኸትሮ፤ ንምስኪንን ንድኻን ድማ ኻብ ኢድ ነጣቒ ተናግፎም።”

¹¹መሰኻኽር ዓመፃ ተልዓሉኒ፤ ዘይፈልጦ ነገርውን ኣብ ልዕለይ ተናገሩ።

¹²ክንዲ ሰናይ ክፉእ ፈደዩኒ፤ ንነፍሰይውን ውሉድ ኣስኣንዋ።

¹³ኣነ ግና ንሳቶም ምስ ሓመሙ፥ ወጮ ተኸደንኩ፤ ንነፍሰይውን ብፆም ኣድከምኩዋ፤ ፀሎተይ ናብ ሕቝፈይ ተመለሰ።

¹⁴ንፈታውየይን ንሓወይን ከም ዝገብሮ ገበርኩ፤ ንኖኡ ኸም ዝበኪውን ርእሰይ ትሕት ትሕት ኣበልኩ።

¹⁵ኣብ ልዕለይ ተኣከቡ፤ ደስ ድማ በሎም፤ ግፍዐኛታት ኣብ ልዕለይ ተኣከቡ፤ ኣነ ግና ኣይፈለጥኩን፤ ሰላልዑኒ፤ ኣይሓደጉንንውን።

¹⁶ፈተኑኒ ብስሓቕውን ሓጨጩለይ፤ ኣስናኖምውን ኣብ ልዕለይ ሓርቀሙለይ።

¹⁷ኦ ጐይታ፥ ክሳዕ መኣዝ ኢኻ እትሪአለይ? ንነፍሰይ ካብ ክፉእ ስራሖም፥ ንብሕትነተይውን ካብ ኣናብስ ኣናግፋ።

¹⁸ኦ ጐይታ፥ ኣብ ማእኸል ዓብዪ ጉባኤ ኽግዝአልካ እየ፤ ኣብ ማእኸል ብዙሕ ህዝቢ እውን ከመስግነካ እየ።

¹⁹ እቶም ብግፍዒ ዝፀልኡኒ ኣብ ልዕለይ ደስ ኣይበሎም፤ እቶም ብኸንቱ ዝፃልኡኒውን በዒንቶም ኣይጠቓቐሱለይ።

²⁰ንኣይስ ሰላም እዮም ዝናገሩኒሞ፤ ብቝጥዓ ድማ ጥበራ ይመኽሩ።

²¹ኣፎም ኣብ ልዕለይ ሃህ ኣበሉ፤ “እሰይ፥ እሰይ፥ እንኳዕ ብዓይንና ረአናዮ” ይብሉ ኣለዉ።

²²ኦ ጐይታ፥ ንስኻ ረአኻዮ፤ ስቕውን ኣይትበል፤ ኦ ጐይታ፥ ካባይ ኣይትርሓቕ።

²³ኦ ኣምላኸይን ጐይታይን፥ ናብ ፍርደይ ተልዓል፤ ኦ ጐይታ፥ ናብ ፍርደይ ፅን በል።

²⁴ኦ ኣምላኸይ፥ ከም ፅድቅኻ ፍረደለይ፤ ፀላእተይውን ብኣይ ኣይተሓጐሱ።

²⁵ብልቦም “እሰይ፥ እሰይ እንቋዕ ንነፍስና ደስ በላ” ኣይበሉ፤ “እንኳዕ ወሓጥናዮ” እውን ኣይበሉ።

²⁶እቶም ብመከራይ ዝሕጐሱ፥ ብሓባር ይዋረዱ፤ እቶም ኣብ ልዕለይ ዝዕበዩ፥ ሕፍረትን ውርደትን ይልበሱ።

²⁷እቶም ንፅድቀይ ዝፈትውዋ ደስ ይበሎም፤ ይተሓጐሱውን፤ ኵልሻዕውን “ሰላም ባርያኡ ዝደሊ፥ እግዚኣብሄር፥ ዓብዪ እዩ” ይበሉ።

²⁸ኣንደበተይ ንፅድቅኻ፥ ኵልሻዕውን ንምስጋናኻ ይናገር።