Read መ/ቅዱስ ትግርኛ, Tigrigna Bible, 1 ዳዊት 36 Bible Online

ዳዊት 36 - መ/ቅዱስ ትግርኛ, Tigrigna Bible, 1 bible

ዳዊት 36

¹ ሓጢኣተኛ ንባዕሉ፥ ዘስሕት ነገር ይናገር፤ ኣብ ቅድሚ ኣዒንቱ ፍርሓት እግዚኣብሄር የለን።

²ብመልሓሱ ጠቢሩ እዩ እሞ፥ ሓጢኣቱ ምስ ረኸበቶ ይፀልኣ።

³ቃል ኣፉ ግፍዕን ጥበራን እዩ፤ ምስትውዓልን ሰናይ ምግባርንውን ሓደገ።

⁴ኣብ ምድቃሱ ጠዋይ ነገር ሓሰበ፤ ቅንዕቲ ብዘይኮነት መንገዲ ቖመ፤ ንኽፍኣትውን ኣይንዕቓን።

⁵ኦ ጐይታ፥ ምሕረትካ ኣብ ሰማይ እዩ፤ ሓቅኻውን ክሳዕ ደመናት ይበፅሕ።

⁶ፅድቅኻ ኸም እምባታት እግዚኣብሄር እዩ፤ ፍርድኻውን እምብዛ ዓሚቝ እዩ፤ ኦ ጐይታ፥ ንሰብን ንእንስሳን እተድሕኖም ንስኻ ኢኻ።

⁷ኦ ጐይታ፥ ንምሕረትካ ኽንደይ ኣብዛሕኻ! ኵሎም ደቂ ሰብ ኣብ ትሕቲ ኣኽናፍካ ይእመኑ።

⁸ካብ ቤትካ ጠሊ ይሰትዩ፤ ካብ ወሓዚ በረኸትካ ተርውዮም።

⁹ናይ ህይወት ፍልፍል ካባኻ እዩሞ፥ ብብርሃንካ ብርሃን ንርኢ።

¹⁰ምሕረትካ ኣብ ልዕሊ እቶም ዝፈልጡኻ፥ ንፅድቅኻ ድማ ኣብ ልዕሊ ቕኑዓት ልቢ ዘርግሕ።

¹¹እግሪ ዕቡይ ኣይምፅአኒ፤ ኢድ ሓጢኣተኛውን ኣይትሓውኸኒ።

¹²ኵሎም ገበርቲ ኽፉእ ኣብኡ ወደቑ፤ ወዲቖም እዮም፤ ክቖሙውን ኣይኽእሉን።