Read መ/ቅዱስ ትግርኛ, Tigrigna Bible, 1 ዳዊት 37 Bible Online

ዳዊት 37 - መ/ቅዱስ ትግርኛ, Tigrigna Bible, 1 bible

ዳዊት 37

¹በቶም ገበርቲ ኽፉእ ኣይትቕናእ፤ በቶም ዓመፅትውን ኣይትቕናእ።

²ንሳቶም ከም ሳዕሪ ቐልጢፎም ክነቕፁ፥ ከም ልምሉም ቘፅሊውን ክረግፉ እዮም እሞ።

³ብእግዚኣብሄር ተኣመን፤ ሰናይ ድማ ግበር፤ ኣብ ምድሪ ተቐመጥ፤ ተኣሚንካውን ውፈር።

⁴ብእግዚኣብሄር ደስ ይበልካ፤ ልብኻ ዝደልዮውን ንሱ ኽህበካ እዩ።

⁵መንገድኻ ንእግዚኣብሄር ሓደራ ሃብ፤ ብእኡውን ተኣመን፤ ንሱ ድማ ኽገብረልካ እዩ።

⁶ንፅድቅኻ ኸም ብርሃን፥ ንፍርድኻውን ከም ቀትሪ ኸምፅአልካ እዩ።

⁷ንእግዚኣብሄር ተገዛእ፤ ንእኡውን ተስፋ ግበር፤ መንገዱ ብዝቐንዐሉ፥ ክፍኣትውን ብዝኣልም ሰብ ኣይትቕናእ።

⁸ካብ ቍጥዓ ረሓቕ፤ መዓትውን ሕደግ፤ ከይትብድል ኣይትቕናእ።

⁹ገበርቲ እከይ ክጠፍኡ እዮም እሞ፥ ንእግዚኣብሄር ተስፋ ዝገብሩ ግና፥ ንሳቶም ንምድሪ ኽወርሱ እዮም።

¹⁰ድሕሪ ቑሩብ ጊዜ ኽፉእ ሰብ ኣይህሉን፤ ትደልዮ፤ ቦታኡውን ኣይትረኽቦን።

¹¹ ለዋሃት ግና ንምድሪ ኽወርስዋ እዮም፤ ብብዙሕ ሰላም ድማ ደስ ይብሎም።

¹²ሓጢኣተኛ ነቲ ፃድቕ ይፍሕሰሉ፤ ኣስናኑውን ኣብ ልዕሊኡ ይሕርቅም።

¹³እግዚኣብሄር ግና፥ ይስሕቖ፤ መዓልቱ ኸም ዝበፅሕ ይፈልጥ እዩሞ።

¹⁴ሓጢኣተኛታት ንድኻታትን ንፅጉማትን ከውድቑ፥ ነቶም ቅኑዓት ልቢውን ክወግኡ፥ ሰይፎም መዘዙ፤ ቀስቶምውን ገተሩ።

¹⁵ሰይፎም ናብ ልቦም ይእቶ፤ ቀስቶምውን ይሰበር።

¹⁶ካብ ብዙሕ ሃብቲ ሓጢኣተኛታት፥ ውሑድ ሃብቲ ፃድቃን ይበልፅ።

¹⁷ሓይሊ ኽፉኣት ክትስበር እያ፤ ንፃድቃን ግና እግዚኣብሄር ክድግፎም እዩ።

¹⁸እግዚኣብሄር ንመንገዲ ንፁሃን ይፈልጥ፤ ርስቶምውን ንዘለኣለም እዩ።

¹⁹ብኽፉእ ዘመን ኣየሓፍሩን እዮም፤ ብዘመን ጥሜትውን ክፀግቡ እዮም።

²⁰ሓጢኣተኛታት ግና ኽጠፍኡ እዮም፤ ፀላእቲ እግዚኣብሄር ብዝኸበሩን ልዕል ልዕል ብዝበሉን ከም ትኪ ይጠፍኡ።

²¹ሓጢኣተኛ ሰብ ተለቂሑ ኣይመልስን እዩ፤ ፃድቕ ሰብ ግና ይርህርህ፤ ይህብውን።

²²እቶም ንእግዚኣብሄር ዝባርኹ፥ ንምድሪ ኽወርስዋ እዮም፤ እቶም ዝረግምዎ ግና ኽጠፍኡ እዮም።

²³ኣካይዳ ሰብ ብእግዚኣብሄር ይፀንዕ፤ ንመንገዱውን ይፈቱ።

²⁴እንተ ተዓንቀፈውን ኣይድንግፅን፤ እግዚኣብሄር ኢዱ ሒዙ ይድግፎ እዩ እሞ።

²⁵ጐበዝኩ፤ ኣረግኩውን፤ ፃድቅ እንትድርበ፥ ዘርኡውን እንጀራ እንትልምን ኣይረአኹን።

²⁶ኵልሻዕውን ይርህርህን የለቅሕን፤ ዘርኡ ድማ ብበረኸት ይነብር።

²⁷ካብ ክፉእ ህደም፤ ሰናይ ከዓ ግበር፤ ንዘለኣለምውን ክትነብር ኢኻ።

²⁸እግዚኣብሄር ፍርዲ ይፈቱ እዩሞ፥ ነቶም ቅዱሳኑውን ኣይሓድጎምን እዩሞ፥ ንዘለኣለምውን ይሕልዎም፤ ንንፁሃን ከዓ ይብቀለሎም፤ ዘርኢ ሓጥኣን ግና ይጠፍእ።

²⁹ፃድቃን ንምድሪ ኽወርስዋ እዮም፤ ኣብኣውን ንዘለኣለም ክነብሩ እዮም።

³⁰ኣፍ ፃድቅ፥ ጥበብ የምህር፤ ኣንደበቱውን ፍትሒ ይናገር።

³¹ሕጊ ኣምላኹ ኣብ ውሽጢ ልቡ እዩ፤ በካይዳኡውን ኣይሰናኸልን።

³²ሓጥእ ንፃድቕ ይፀናተዎ፤ ክቐትሎውን ይደሊ።

³³እግዚኣብሄር ግና ኣብ ኢዱ ኣየሓድጎን እዩ፤ ምስተፋረዶውን ኣየሸንፎን።

³⁴ንእግዚኣብሄር ተፀበዮ፤ መንገዱውን ሓሉ፤ ንምድሪ ምእንቲ ኽትወርስ ልዕል ልዕል ከብለካ እዩ፤ ሓጢኣተኛታትውን ክጠፍኡ እንተለዉ ኽትርኢ ኢኻ።

³⁵ሓጥእ ልዕል ልዕል ኢሉ፥ ከም ዝግባ ሊባኖስውን ለምሊሙ ረአኽዎ፤

³⁶ምልስ እንተ በልኩ ግና፥ ሰኣንክዎ፤ ደለኹዎ፤ ቦታኡውን ኣይረኸብኩን።

³⁷ንቕንዕና ሓሉ፤ ንፅድቂውን ረአ፤ ነቲ ናይ ሰላም ሰብ፥ ተረፍ ኣለዎሞ።

³⁸በደለኛታት ሓቢሮም ክጠፍኡ እዮም፤ ናይ ሓጢኣተኛታት ተረፍውን ክጠፍኡ እዮም።

³⁹ድሕነት ፃድቃን ካብ እግዚኣብሄር እዩ፤ ኣብ እዋን ፀገሞምውን መፀግዒኦም ንሱ እዩ።

⁴⁰እግዚኣብሄር ይረድኦምን የናግፎምን እዩ፤ ካብ ኢድ ሓጢኣተኛታትውን የውፅኦም፤ ብእኡ ተኣሚኖም እዮም እሞ፥ ከድሕኖም እዩ።