Read መ/ቅዱስ ትግርኛ, Tigrigna Bible, 1 ዳዊት 38 Bible Online

ዳዊት 38 - መ/ቅዱስ ትግርኛ, Tigrigna Bible, 1 bible

ዳዊት 38

¹ኦ ጐይታ፥ ብቝጥዓኻ ኣይትቕሰፈኒ፤ ብመዓትካውን ኣይትገስፀኒ።

²ፍላፃታትካ ወጊአናኒ እየንሞ፤ ኢድካውን ኣኽቢድካለይ ኢኻሞ።

³ካብ ቝጥዓኻ ዝተልዓለ ንስጋይ ጥዕና የብሉን፤ ካብ ሓጢኣተይ ዝተልዓለውን ነዕፅምተይ ሰላም የብሎምን።

⁴ሓጢኣተይ ኣብ ልዕሊ ርእሰይ ልዕል ልዕል ኢሉ እዩሞ፥ ከም ከቢድ ሸኽሚውን ኣብ ልዕለይ የመና ኸቢዱኒ እዩ።

⁵ብሰንኪ ስንፍናይ፥ ቍስለይ በስበሰ፤ ሸተተውን።

⁶እምብዛ ዓበርኩ፤ ተዋረድኩውን፤ ኵልሻዕ ብትካዘ እመላለስ ኣለኹ።

⁷ነፍሰይ ብፀርፊ መሊኣ እያሞ፤ ንስጋይውን ጥዕና የብሉንሞ።

⁸ኣነ ሰንሰንኩ፤ እምብዛውን ተሸገርኩ፤ ካብ ሓዘን ልበይ ዝተልዓለ እግዕር ኣለኹ።

⁹ኦ ጐይታ፥ ኵሉ ሃረርታይ ኣብ ቅድሜኻ እዩ፤ እህህታይውን ካባኻ ዝተሰወረ ኣይኮነን።

¹⁰ልበይ ደንገፀኒ፤ ሓይለይውን ጠለመኒ፤ ብርሃን ኣዒንተይ ፈዘዘ።

¹¹ካብ ቍስለይ ዝተልዓለ፥ ፈተውተይን ኣዕርኽተይን ካብ ቍስለይ ይርሕቁ፤ ኣዝማደይውን ርሒቖም ቆሙ።

¹²እቶም ንነፍሰይ ዝደልዩዋ በርትዑኒ፥ እቶም መከራይ ዝደልዩ፥ ከንቱ ተናገሩ፤ ኵልሻዕውን ብጥበራ ይመኽሩለይ ኣለዉ።

¹³ኣነ ግና ኸም ዘይሰምዕ ፀማም፥ ኣፉ ኸም ዘይኸፍት በሃም ኮንኩ።

¹⁴እወ፥ ከም ዘይሰምዕ ሰብ፥ ብኣፉውን ክናገር ከም ዘይኽእል ሰብ ኮንኩ።

¹⁵ኦ ጐይታ፥ ብኣኻ እእመን ኣለኹሞ፤ ኦ ኣምላኸይ፥ ንስኻ ትሰምዐኒ ኢኻ።

¹⁶ፀላእተይ ብኣይ ደስ ከይብሎም ኢለ ኣለኹሞ፥ እግረይ ሰንከልከል እንተበለውን ርእሶም ኣብ ልዕለይ ልዕል ልዕል ከብሉ እዮም።

¹⁷ኣነስ ንምሕንካስ ቀሪበ እየሞ፥ ቍስለይውን ኵልሻዕ ኣብ ቅድመይ እዩሞ።

¹⁸በደለይ እናዘዝ ኣለኹ፤ ብሓጢኣተይውን እጕሂ ኣለኹ።

¹⁹ፀላእተይ ህያዋን እዮም፤ ይብርትዑኒውን እዮም፤ ብዘይ ምኽንያት ዝፀልኡኒ ብዙሓት እዮም።

²⁰ንፅድቂ ስለ ዝተኸተልኩ፥ ክንዲ ሰናይ ክፉእ ዝምልሱ ይፀልኡኒ ኣለዉ።

²¹ኦ ጐይታ፥ ንስኻ ኣይትደርብየኒ፤ ኣምላኸይ፥ ካባይ ኣይትርሓቕ።

²²ኦ መድሓኒየይ፥ ንኣይ ንምርዳእ ፍጠን።