Read መ/ቅዱስ ትግርኛ, Tigrigna Bible, 1 ዳዊት 59 Bible Online

ዳዊት 59 - መ/ቅዱስ ትግርኛ, Tigrigna Bible, 1 bible

ዳዊት 59

¹ ኦ ኣምላኸይ፥ ካብ ፀላእተይ ኣድሕነኒ፤ ኣብ ልዕለይ ካብ ዝተስኡውን ኣናግፈኒ።

²ካብ ገበርቲ ኽፉእ ኣድሕነኒ፤ ካብ ናይ ደም ሰባት ኣድሕነኒ።

³እንሆ፥ ንነፍሰይ ይሃድንዋ ኣለዉ፤ ሓያላትውን ኣብ ልዕለይ ተኣከቡ፤ ኦ ጐይታ፥ ብበደለይ ኣይኮነን፤ ብሓጢኣተይውን ኣይኮነን።

⁴ብዘይ በደል ጐየኹ፤ ተዳለኹውን፤ ተስእ፤ ተቐበለኒ፤ ረአውን።

⁵ንስኻውን ኦ ጐይታ፥ ኣምላኽ ሓያላት፥ ኣምላኽ እስራኤል፥ ንዅሎም ኣህዛብ ክትምልከቶም ተልዓል፤ ዓመፅ ንዝገብሩ ዅሎም ኣይትምሓሮም።

⁶ምሸት ይመለሱ፤ ከም ኣኽላባት ድማ ይጥመዩ፤ ኣብ ከተማ ኸዓ ይዙሩ።

⁷እንሆ ብኣፋቶም ኣስሚዖም ይናገሩ ኣለዉ፤ ሰይፊ ኣብ ከንፈሮም ኣሎ፤ “መንከ ኸይሰምዐና?” ድማ ይብሉ።

⁸ንስኻ ግና ኦ ጐይታ ትስሕቆም፤ ንዅሎም ኣህዛብውን ትንዕቖም።

⁹እግዚኣብሄር መፀግዕየይ እዩሞ፥ ንሓይለይ ናባኻ ኣዕቝቦ ኣለኹ።

¹⁰ሕያዋይነት ኣምላኸይ ይርከበኒ፤ ኣምላኸይ፥ ኣብ ፀላእተይ የርእየኒ።

¹¹ሕግኻ ኸይርስዑስ ኣይትቕተሎም፤ ኦ ዋልታይ፥ ብሓይልኻ በትኖምን ኣውርዶምን።

¹²ስለ ሓጢኣት ኣፎም ስለ ቓል ከንፈሮም መርገምን ሓሰትን ስለ ዝናገሩ፥ ብትዕቢቶም ይፃወዱ።

¹³ብቝጥዓኻ ኣጥፍኣዮም፤ ከም ዘይርከቡ ጌርካ ድማ ኣጥፍኣዮም፤ ኣምላኽ ያእቆብውን ክሳዕ ወሰን ምድሪ ኸም ዝገዝእ ይፍለጡ።

¹⁴ምሸት ይመለሱ፤ ከም ኣኽላባትውን ይጥመዩ፤ ኣብ ከተማውን ይዙሩ።

¹⁵ንሳቶም ዝብላዕ ደልዮም ይዙሩ፤ እንተ ዘይፀገቡ ድማ የጕረምርሙ።

¹⁶ኣነ ግና ስለ ሓይልኻ ኽዝምር እየ፤ ብምሕረትካውን ንጉሆ ደስ ይብለኒ፤ ብመዓልቲ መከራይ መፀግዕየይን እምባይን ኴንካኒ ኢኻሞ።

¹⁷ኦ ኣምላኸይ፥ ንስኻ መፀግዕየይን ምሕረተይን ኢኻሞ፥ ኦ ረዳእየይ፥ ንኣኻ ንኣምላኸይ ክዝምር እየ።