Read መ/ቅዱስ ትግርኛ, Tigrigna Bible, 1 ዳዊት 64 Bible Online

ዳዊት 64 - መ/ቅዱስ ትግርኛ, Tigrigna Bible, 1 bible

ዳዊት 64

¹ኦ ኣምላኽ፥ ናባኻ ዝለመንኩዎ ፀሎተይ ስምዐኒ፤ ንፀላኢ ኻብ ምፍራሕ፥ ንነፍሰይ ኣድሕና።

²ካብ ሻራ ኽፉኣትን፥ ካብ ብዝሒ ገበርቲ ዓመፅን ሰውረኒ።

³ንሳቶም መሪር ነገር ንምግባር፥ መልሓሶም ከም ሰይፊ ኣብልሑ፤

⁴ንንፁህውን ብስውር ንምውጋእ ቀስቶም ገተሩ፤ ድንገት ይነድፍዎ፤ ኣይፈርሑንውን።

⁵ንኣኣቶም ንባዕላቶም ክፉእ ነገር ኣፅንዑ፤ ሕቡእ መፃወድያ ኸፃውዱ ተማኸሩ፤ “መንከ ይሪአና” ድማ ይብሉ።

⁶ንዓመፃ ደለዩ፤ እናፈተኑውን ሃለቑ፤ ናይ ሰብ ሓሳቡን ልቡን ዓሚቝ እዩ!

⁷እግዚኣብሄር ልዕል ልዕል ይብል፤ ድንገትውን ብፍላፃ ይቘስሉ።

⁸ኣንደበቶም ድማ የሰናኽሎም፤ ኵሎም ዝርኢዎምውን ይድንግፁ።

⁹ኵሎም ሰባትውን ፈርሑ፤ ግብሪ እግዚኣብሄር ድማ ተናገሩ፤ ስራሑውን ኣስተውዓሉ።

¹⁰ፃድቕ ብእግዚኣብሄር ይሕጐስ፤ ብእኡ ኸዓ ይእመን፤ ኵሎም ቅኑዓት ልቢ ዕልል ክብሉ እዮም።