Read መ/ቅዱስ ትግርኛ, Tigrigna Bible, 1 ዳዊት 67 Bible Online

ዳዊት 67 - መ/ቅዱስ ትግርኛ, Tigrigna Bible, 1 bible

ዳዊት 67

¹እግዚኣብሄር ይምሓረና ይባርኸናውን፤ ገፁውን ኣብ ልዕሌና የብርህ።

²መንገድኻ ኣብ ምድሪ ምእንቲ ኽንፈልጥ፥ ምድሓንካውን ኣብ ማእኸል ኵሎም ኣህዛብ ክፍለጥስ፥ ገፅካ ኣብርሀልና።

³ኦ ጐይታ፥ ኣህዛብ የመስግኑኻ፤ ኵሎም ኣህዛብውን የመስግኑኻ።

⁴ንኣህዛብ ብቕንዕና ትፈርደሎም ኢኻሞ፥ ኣብ ምድሪ እውን ንኣህዛብ እትመርሖም ንስኻ ኢኻ እሞ፥ ኣህዛብ ይተሓጐሱ፤ ሓሴትውን ይግበሩ።

⁵ኦ ጐይታ፥ ኣህዛብ የመስግኑኻ፤ ኵሎም ኣህዛብውን የመስግኑኻ።

⁶ምድሪ ፍረኣ ሃበት፤ እግዚኣብሄር ኣምላኽና ድማ ኽባርኸና እዩ።

⁷እግዚኣብሄርውን ክባርኸና እዩ፤ ኵሎም ወሰናት ምድሪ ኸዓ ኽፈርሕዎ እዮም።