Read መ/ቅዱስ ትግርኛ, Tigrigna Bible, 1 ዳዊት 68 Bible Online

ዳዊት 68 - መ/ቅዱስ ትግርኛ, Tigrigna Bible, 1 bible

ዳዊት 68

¹እግዚኣብሄር ይተስእ፤ ፀላእቱውን ይበተኑ፤ እቶም ዝፀልእዎ ኸዓ ኻብ ገፁ ይህደሙ።

²ትኪ ኸም ዝበንን፥ ከምኡ ይብነኑ። ሽምዒ፥ ኣብ ቅድሚ ሓዊ ኸም ዝመክኽ፥ ከምኡውን ሓጥኣን ካብ ቅድሚ እግዚኣብሄር ይጥፍኡ።

³ፃድቃን ግና ይተሓጐሱ፤ ኣብ ቅድሚ እግዚኣብሄርውን ሓሴት ይግበሩ፤ ብደስታውን ደስ ይበሎም።

⁴ንእግዚኣብሄር ተቐነዩ፤ ንስሙውን ዘምሩ፤ ነቲ ናብ ምድረ በዳ ዝወፀውን መንገዲ ግበሩ፤ ስሙ እግዚኣብሄር እዩ፤ ኣብ ቅድሚኡውን ተሓጐሱ፤ ኣብ ቅድሚ ገፁውን ደስ ይበልኩም።

⁵እግዚኣብሄር ኣብቲ ቅዱስ ቦታኡ፥ ንደኽታማት ኣቦ፥ ንመበለታት ድማ ዳኛ እዩ።

⁶እግዚኣብሄር ነቶም በይንቶም ዝኾኑ ኣብ ስድራ የሕድሮም፤ ንእሱራትውን ብሓይሉ የውፅኦም፤ ዓመፀኛታት ግና ኣብ ምድረ በዳ ይነብሩ።

⁷ኦ ጐይታ፥ ቀቅድሚ ህዝብኻ ምስ ወፃእኻ፥ ብምድረ በዳውን ኽትሓልፍ እንተለኻ፥ ምድሪ ተናወፀት፤

⁸ ኣብ ቅድሚ ኣምላኽ ሲና፥ ኣብ ቅድሚ ኣምላኽ እስራኤል፥ ሰማያትውን ኣንጠብጠቡ።

⁹ኦ ጐይታ፥ ዝናም ሞገስ ንርስትኻ ኣዝነምካ፤ ምስ ደኸመውን ንስኻ ኣፅናዕኻዮ።

¹⁰እንስሳትካውን ኣብኡ ይሓድሩ፤ ኦ ጐይታ፥ ብሕያዋይነትካ ንድኻታት ኣዳሎኻሎም።

¹¹እግዚኣብሄር ቃሉ ሃበ፤ እቶም ዘውርዩ ድማ ብዙሓት ሰራዊት እዮም።

¹²ናይ ሰራዊት ነገስታት ቀልጢፎም ይሃድሙ፤ እታ ኣብ ገዛ እትነብርውን ምርኮ ተኻፈለት።

¹³ኣብ ማእኸል ርስትታት እንተ ሓደርኩም፥ ካብ ብሩር ከም ዝተሰርሑ ኣኽናፍ ርግቢ፥ ብቘፅሊ ወርቂ ኸም ዝተለበጡ፥ ክንቲታት ኢኹም።

¹⁴ሰማያዊ ንጉስ ኣብ ልዕሊኣ ምስ ኣዘዘ፥ ኣብ ልዕሊ ሰልሞን በረድ ይዘንም።

¹⁵እምባ እግዚኣብሄር ዝለምለመ እምባ እዩ፤ ፅኑዕ እምባን ዝለመለመ እምባን እዩ።

¹⁶እቶም ፅኑዓት እምባታት ንምንታይ ይለዓሉ? ነዝ እምባ እዙይ እግዚኣብሄር መሕደሪኡ ክኸውን ፈተዎ፤ ብሓቂ እግዚኣብሄር ንዘለኣለም ኣብኡ ኽሓድረሉ እዩ።

¹⁷ሰረገላታት እግዚኣብሄር ክልተ እልፊ፥ ኣሽሓት ጊዜ ኣሽሓት እዮም፤ ጐይታ ኣብ መቕደሱ ኣብ ሲና፥ ኣብ ማእኸሎም እዩ።

¹⁸ ምርኮ ማሪኽካ ናብ ኣርያም ዓረግካ፤ ውህብቶውን ንደቂ ሰብ ሃብካ፤ [4] ኣብኡ ምእንቲ ኽሓድሩስ፥ ንዓመፀኛታትውን ሃብካ።

¹⁹እግዚኣብሄር ኣምላኽ ቡሩኽ እዩ፤ እግዚኣብሄር በብመዓልቱ ብሩኽ እዩ፤ ኣምላኽ መድሓኒትና ይረድአና።

²⁰ኣምላኽና ኣምላኽ ምድሓን እዩ፤ ካብ ሞት ምድሓንውን ካብ እግዚኣብሄር እዩ።

²¹ግና እግዚኣብሄር ኣራእስ ፀላእቱ ይሰብር፤ ነቲ ብበደሉ ዝመላለስ፥ ጐታን መንበስበስታኡ ኽጭፍልቕ እዩ።

²²እግዚኣብሄር ከምዙይ በለ፦ ካብ ባሳን ከምፅኦም እየ፤ ካብ መዓሙቝ ባሕሪ እውን ክምልሶም እየ፤

²³ኣእጋርካ ኣብ ደም ምእንቲ ኽረግፃ፥ መልሓስ ኣኽላባትካ ኣብ ልዕሊ ፀላእትኻ ምእንቲ ክኸውን እዩ።

²⁴ናይ ኣምላኸይ ናይ ንጉስ መንገዲ ኣብ መቕደሱ እዩ፤ ኦ ጐይታ፥ መንገድኻ ተገለፀ።

²⁵ኣሕሉቕ ቀደሙ፤ መዘምራንውን ሰዓቡ፤ ከበሮ ዝወቕዓ ደናግል ኣብ ማእኸል ነበራ።

²⁶ንእግዚኣብሄር ብማሕበር፥ ንጐይታናውን ካብ ዓይኒ ማይ እስራኤል ኣመስግንዎ።

²⁷መንእሰይ ብንያም ብሓይሉ ኣብኡ ኣሎ፤ ገዛእቶም ኣሕሉቕ ይሁዳን፥ ኣሕሉቕ ዛብሎንን፥ ኣሕሉቕ ንፍታሌምን ኣለዉ።

²⁸ኦ ጐይታ፥ ንሓይልኻ ኣዝዝ፤ ኦ ጐይታ፥ ነቲ ንኣና ዝሰራዕኻዮ ኣፅንዓዮ።

²⁹ስለ እቲ ኣብ ኢየሩሳሌም ዘሎ ቤተ መቕደስካ፥ ነገስታት ንኣኻ ውህብቶ ኸምፅኡ እዮም።

³⁰ነቶም ኣብ ውሽጢ ሻምበቆ ዘለዉ ኣራዊት፥ ነቶም ኣብ ውሽጢ ኣህዛብ ዘለዉ፥ ማሕበር ኣብዑርን ምራኹትን ገስፆም። እቶም ከም ብሩር ዝተፈተኑ ኣህዛብ ከይዕፀዉ፥ ነቶም ውግእ ዝፈትዉ ኣህዛብ በትኖም።

³¹መኳንንቲ ኻብ ግብፂ ኽመፁ እዮም፤ ኢትዮጵያ ኸዓ ቐልጢፋ ኣእዳዋ ናብ እግዚኣብሄር ክትዝርግሕ እያ።

³²ኵልኻትኩም ነገስታት ምድሪ፥ ንእግዚኣብሄር ኣመስግንዎ፤ ንጐይታውን ዘምሩ።

³³ብወገን ምብራቕ ብዘሎ ሰማይ ኣቢሉ፥ ናብ ሰማየ ሰማያት ንዝዓረገ እግዚኣብሄር ዘምሩ። እንሆ፥ ቃል ሓይሊ ዝኾነ ቓሉ ይህብ ኣሎ።

³⁴ንእግዚኣብሄር ክብሪ ሃቡ፤ ግርማኡ ኣብ ልዕሊ እስራኤል፥ ሓይሉውን ኣብ ልዕሊ ደበናታት እዩ።

³⁵እግዚኣብሄር ኣብ ልዕሊ ቕዱሳኑ ዘደንቕ እዩ፤ ኣምላኽ እስራኤል፥ ንህዝቡ ሓይልን ፅንዓትን ይህብ። እግዚኣብሄር ይመስገን።