Read መ/ቅዱስ ትግርኛ, Tigrigna Bible, 1 ዳዊት 71 Bible Online

ዳዊት 71 - መ/ቅዱስ ትግርኛ, Tigrigna Bible, 1 bible

ዳዊት 71

¹ኦ ጐይታ፥ ንኣኻ ተኣሚነ ኣለኹ፤ ንዘለኣለም ኣይሕፈር።

²ብፅድቅኻ ኣድሕነንን ኣናግፈንን፤ እዝንኻ ናባይ ፅን ኣብል፤ ኣድሕነኒውን።

³ኣብ ፅኑዕ ቦታ ምእንቲ ኽተድሕነኒ፥ ኣምላኽን መሕብእን ኩነኒ፤ ሓይለይን መፀግዕየይን ንስኻ ኢኻሞ፥ ንምድሓነይ ኣዘዝካ።

⁴ኦ ኣምላኸይ፥ ካብ ኢድ ሓጥኣን፥ ካብ ኢድ ዓማፅን ገፋዕንውን ኣናግፈኒ።

⁵ኦ ጐይታ፥ ንስኻ ተስፋይ ኢኻሞ፥ ኦ እግዚኣብሄር፥ ካብ ንእስነተይ ጀሚርካ መተኣማመኒየይ ኢኻሞ።

⁶ካብ ከርሲ እኖይ ጀሚረ ብኣኻ ተደገፍኩ፤ ካብ ማህፀን ወላዲተይ ጀሚሩውን ንስኻ ተስፋይ ኢኻ፤ ኵልሻዕውን ምስጋናይ ንኣኻ እዩ።

⁷ንስኻ ብርቱዕ መዕቘቢ ስለ ዝኾንካኒ፥ ንብዙሓት መደነቒ ኾንክዎም።

⁸ኵልሻዕ ኽብርኻን ግርማኻን ንኽዝምር፥ ንኣፈይ ምስጋናኻ ምላእ።

⁹ኣምላኸይ ብጊዜ እርግናይ ኣይትደርብየኒ፤ ሓይለይ ምስ ተወድአውን ኣይትሕደገኒ።

¹⁰ፀላእተይ ኣብ ልዕለይ ይዛረቡ ኣለዉ፤ እቶም ንነፍሰይ ዝደልዩዋውን፥ ከምዙይ ኢሎም ሓቢሮም ተማኸሩ፦

¹¹“ኣምላኽ ሓዲግዎ እዩ፤ ዘናግፎ የለን እሞ ተኸቲልኩም ሓዝዎ።”

¹²ኦ ኣምላኽ፥ ካባይ ኣይትርሓቕ፤ ኦ ኣምላኸይ፥ ንኣይ ንምርዳእ ፍጠን።

¹³እቶም ንነፍሰይ ዝፃረሩዋ ይሕፈሩን ይጥፍኡን፤ እቶም ጕድኣተይ ዝደልዩውን ሕፍረትን ሓሳርን ይከደኑ።

¹⁴ኣነ ግና ዅልሻዕ ተስፋ እገብር ኣለኹ፤ ኣብ ልዕሊ ዅሉ ምስጋናኻውን ክውስኽ እየ።

¹⁵ቍፅሩ ኣይፈልጦንሞ፥ ኣፈይ ፅድቅኻ፥ ኵሉ ጊዜውን ምድሓንካ ይናገር

¹⁶ብሓይሊ እግዚኣብሄር ክኣቱ እየ፤ ኦ ጐይታ፥ ንፅድቅኻ ጥራሕ ክዝክር እየ።

¹⁷ኦ ኣምላኸይ፥ ካብ ንእስነተይ ጀሚርካ መሃርካኒ፤ ክሳዕ ሕዚ እውን ተኣምራትካ እናገር ኣለኹ።

¹⁸ነቲ ዝመፅእ ትውልዲ፥ ቅልፅምካን ሓይልኻን ፅድቅኻን፥ ክሳዕ ዝነግር፥ ክሳዕ ዝኣርግን ዝሽምግልን፥ ኦ ጐይታ ኣይትሕደገኒ።

¹⁹ኦ ጐይታ፥ ክሳዕ ኣርያም ዓበይቲ ነገራት ገበርካ፤ ኦ ኣምላኽ፥ ከማኻ ዝበለ መን እዩ?

²⁰ብዙሕ ጭንቀትን መከራን ኣርአኻኒ፤ ግና ተመሊስካ ህያው ገበርካኒ፤ ካብ ውሽጢ ምድሪ እውን መሊስካ ኣውፃእኻኒ።

²¹ንፅድቅኻውን ኣብዛሕኻዮ፤ ተመሊስካውን ኣሐጐስካኒ፤ ካብ መዓሙቕውን መሊስካ ኣውፃእኻኒ።

²²ኣነውን ብበገና፥ ስለ ሓቅኻ ኸመስግነካ እየ፤ ኣታ ኣምላኽ ናይ እስራኤል ቅዱስ፥ ብመሰንቆ ኽዝምረልካ እየ።

²³ክዝምረልካ እንተለኹ ኸናፍረይን፥ እታ ዘድሓንካያ ነፍሰይን ደስ ይብለን።

²⁴እቶም ጕድኣተይ ዝደልዩ ምስ ሓፈሩን ምስ ተዋረዱን፥ መልሓሰይ ኵልሻዕ ፅድቅኻ ኽትናገር እያ።