Read መ/ቅዱስ ትግርኛ, Tigrigna Bible, 1 ዳዊት 72 Bible Online

ዳዊት 72 - መ/ቅዱስ ትግርኛ, Tigrigna Bible, 1 bible

ዳዊት 72

¹ኦ ጐይታ! ፍትሕኻ ንንጉስ፥ ፅድቅኻ ድማ ንወዲ ንጉስ ሃብ።

²ንሱ ንህዝብኻ ብፅድቂ፥ ንነዳያንካውን ብፍትሒ ኽፈርድ እዩ።

³እምባታትን ኰረብታታትን፥ ብፅድቂ ንህዝብኻ ሰላም ይቀበሉ።

⁴ንዝተሸገሩ ህዝብኻ ብሓቂ ትፈርደሎም፤ ንደቂ ምስኪናትካ ድኻታትውን ተድሕኖም፤ ነቲ ዕቡይ ድማ ኽተዋርዶ ኢኻ።

⁵ፀሓይ ብዝነብረሉ ዅሉ ዘመን፥ ኣብ ቅድሚ ወርሒውን ንውሉድ ወለዶ ኽነብር እዩ።

⁶ንሱ ኸም ህቦ ኣብ ልዕሊ ሰውሒ፥ ኣብ ልዕሊ ምድሪ ኸም ዘንጠብጥብ ነጠብጣብውን ይወርድ።

⁷ብዘመኑ ፅድቂ ይዕምብብ፤ ወርሒ ክሳዕ እትሓልፍውን ብዙሕ ሰላም ክህሉ እዩ።

⁸ ካብ ባሕሪ ኽሳዕ ባሕሪ፥ ካብ ፈለግውን ክሳዕ ወሰን ምድሪ ኽገዝእ እዩ።

⁹ኣብ ቅድሚኡ ኢትዮጵያ ኽሰግዱ እዮም፤ ፀላእቱ ኸዓ ሓመድ ክቝሕሙ እዮም።

¹⁰ነገስታት ተርሴስን [5] ደሴታትን ውህብቶ ኸምፅኡሉ እዮም፤ ነገስታት ሳባን ዓረብን ድማ ገፀ በረኸት ከቕርቡሉ እዮም።

¹¹ኵሎም ነገስታት ምድሪ ኸዓ ኽሰግዱሉ፥ ኵሎም ኣህዛብውን ክግዝኡሉ እዮም።

¹²ንሱ ረዳኢ ንዘይብሉ ምስኪንን፤ ንድኻን ካብ ኢድ ዝዕምፆ የድሕኖ።

¹³ንምስኪናትን ንድኻታትን ይርህርሀሎም፤ ንነፍሲ ድኻታትውን የድሕን።

¹⁴ንነፍሶምውን ካብ ጥቕዓትን ካብ ግፍዕን የድሕን፤ ስሙውን ኣብ ቅድሚኣቶም ክቡር እዩ።

¹⁵ንሱ ብህይወት ይነብር፤ ካብ ዓረብውን ወርቂ ይህብዎ፤ ኵሉ ጊዜውን ናብኡ ይፅልዩ፤ ኵሉ መዓልቲ እውን ክባርኽዎ እዮም።

¹⁶ኣብ ውሽጢ ምድሪ ኣብ ልዕሊ እምባታት መፀግዒ ክኸውን እዩ፤ ፍረኡውን ካብ ኦም ሊባኖስ ልዕል ልዕል ክብል እዩ፤ ከም ሳዕሪ ምድሪ ኽበቍል እዩ።

¹⁷ስሙ ንዘለኣለም ቡሩኽ ይኸውን፤ ቅድሚ ፀሓይ ስሙ ኣሎ፤ ኵሎም ኣህዛብ ምድሪ ብእኡ ኽባረኹ እዮም፤ ኵሎም ኣህዛብ ድማ ኸመስግንዎ እዮም።

¹⁸በይኑ ዘደንቕ ተግባራት ዝገብር፥ ኣምላኽ እስራኤል እግዚኣብሄር ይመስገን።

¹⁹ስም ምስጋናኡውን ንዘለኣለመ ኣለም ይባረኽ፤ ኵላ ምድሪ እውን ብኽብሩ ትምላእ። ኣሜን! ኣሜን!

²⁰ፀሎት ዳዊት ወዲ እሴይ ኣብዙይ ተፈፀመ።