Read መ/ቅዱስ ትግርኛ, Tigrigna Bible, 1 ዳዊት 73 Bible Online

ዳዊት 73 - መ/ቅዱስ ትግርኛ, Tigrigna Bible, 1 bible

ዳዊት 73

¹እግዚኣብሄር ልቦም ቅኑዕ ንዝኾነ፥ ንእስራኤል ከመይ ሰናይ እዩ።

²ኣነ ግና ኣእጋረይ ክሰናኸላ፥ ኣካይዳይውን ከንደልህፅ ቀሪበ ነበርኩ።

³ሰላም ሓጢኣተኛታት ሪአ፥ ብዓመፀኛታት ቀኒአ ነይረ እየሞ።

⁴ንሞቶም ፃዕሪ የብሉን፤ ሓይሎምውን ጥንኩር እዩ።

⁵ከም ሰብ ኣብ ድኻም ኣይኮኑን፤ ምስ ሰብውን ኣይተገረፉን።

⁶ስለዙይ ትዕቢት ሓዞም፤ ንሓጢኣትን ንበደልን ከም ክዳን ተወንዘፍዋ።

⁷ኣዒንቶም ስብሒ ስለ ዝኾነ ወፀ፤ ልቦምውን ካብ ዝምነይዎ ንላዕሊ ረኸበ።

⁸ሓሲቦም ክፉእ ነገር ተናገሩ፤ ልዕል ልዕል ኢሎምውን ብዓመፃ ተናገሩ።

⁹ኣፎም ኣብ ሰማይ ኣንበሩ፤ መልሓሶምውን ኣብ ውሽጢ ምድሪ ተመላለሰ።

¹⁰ስለዙይ ህዝበይ ናብዙይ ይምለሱ፤ ፍፁም ጊዜ ኣብ ልዕሊኣቶም ይርከብ።

¹¹“እግዚኣብሄር ከመይ ይፈልጥ? እቲ ልዑልከ ፍልጠትዶ ኣለዎ?” ይብሉ።

¹²እንሆ፥ እዞም ሓጥኣን እዚኣቶም ይሕጐሱ ኣለዉ፤ ኵልሻዕውን ሃብቶም የብዝሑ ኣለዉ።

¹³ከምዙይውን በልኩ፦ ኣነ ብኸንቱ እየ ንልበይ ዘፅደቕክዋ፤ ነእዳወይውን ብኸንቱ ብንፅህና ሓፀብኩ።

¹⁴ኵልሻዕውን ዝተገረፍኩ ኾንኩ፤ ፀርፈይውን በብንግሆ እዩ።

¹⁵ከምዙይ ኢለ እንተ ዝናገር ነይረስ፥ ንትውልዲ ደቅኻ ምበደልኩ ነይረ።

¹⁶ንኽፈልጥ ኢለውን ሓሰብኩ፤ እዙይ ግና ኣብ ቅድመይ ኣፀጋሚ ነበረ።

¹⁷ናብ መቕደስ እግዚኣብሄር ክሳዕ ዝኣቱ፥ ንፍፃሜኣቶምውን ክሳዕ ዘስተውዕል ተሸገርኩ።

¹⁸ኣብ መንደልሃፂ ስፍራ ኣንበርካዮም፤ ናብ ጥፍኣትውን ደርበኻዮም።

¹⁹ከመይ ንጥፍኣት ኮኑ? ብድንገት ሃለቑ፤ ብሓጢኣቶም ድማ ጠፍኡ።

²⁰ካብ ሕልሚ ኸም ዝነቅሕ፥ ኦ ጐይታ፥ ምስ ነቓሕኻ ንምልክቶም ተነውሮ።

²¹ልበይ ነዲዱ ኢዩሞ፤ ኰላሊተይውን መኺኹ እዩሞ።

²²ኣነ ዝተንዓቕኩ እየ፤ ኣይፈለጥኩንውን፤ ኣብ ቅድሜኻ ኸም እንስሳ ኾንኩ።

²³ግና ኣነ ዅልሻዕ ምሳኻ እየ፤ የማነይቲ ኢደይ ሓዝካኒ።

²⁴ብምኽርኻ መራሕኻኒ፤ ምስ ክብሪውን ተቐበልካኒ።

²⁵ኣብ ሰማይ ብዘይ ንስኻ መን ኣለኒ? ኣብ ምድሪኸ እንትርፊ ንኣኻ ዝደልዮ እንታይ ኣለኒ?

²⁶ኦ ናይ ድሕነተይ ኣምላኽ፥ ልበይን ስጋይን ሃለቐ፤ እግዚኣብሄር ግና ንዘለኣለም ዕድለይ እዩ።

²⁷እንሆ፥ እቶም ካባኻ ዝርሕቑ ኽጠፍኡ እዮም፤ ነቶም ካባኻ ርሒቆም ዘመንዝሩ፥ ኣጥፋእኻዮም።

²⁸ንኣይ ግና ናብ እግዚኣብሄር ምቕራብ ይሕሸኒ፤ ብበርታት ጓል ፅዮን ኵሉ ምስጋናኻ ምእንቲ ኽናገር፥ መተኣማመንየይ እግዚኣብሄር እዩ።