Read መ/ቅዱስ ትግርኛ, Tigrigna Bible, 1 ዳዊት 80 Bible Online

ዳዊት 80 - መ/ቅዱስ ትግርኛ, Tigrigna Bible, 1 bible

ዳዊት 80

¹ንዮሴፍ ከም መጓሰ ኣባጊዕ እትመርሕ፥ ኦ ጓሳ እስራኤል፥ ፅን በል። ኣታ ኣብ ልዕሊ ኪሩቤል እትቕመጥ፥ ተገለፅ።

²ኣብ ቅድሚ ኤፍሬምን ብንያምን ምናሴን፥ ሓይልኻ ኣልዕል፤ ንምድሓንናውን ነዓ።

³ኦ ኣምላኽ፥ ምለሰና፤ ምእንቲ ኽንድሕን ድማ ገፅካ ኣብርሀልና።

⁴ኦ ኣምላኽ ሰራዊት እግዚኣብሄር፥ ክሳዕ መኣዝ ኢኻ፥ ኣብ ልዕሊ ፀሎት ባርያኻ እትቝጣዕ?

⁵እንጀራ ንብዓት ኣብላዕኻና፤ ብመስፈሪ ኸዓ ንብዓት ኣስተኻና።

⁶ንጐረባብትና መካትዒ ገበርካና፤ ፀላእትናውን ይሳለቑና ኣለዉ።

⁷ኦ ኣምላኽ ጐይታ ሰራዊት፥ ምለሰና፤ ክንድሕን ድማ ገፅካ ኣብርሀልና።

⁸ተኽሊ ወይኒ ካብ ግብፂ ኣምፃእኻ፤ ንኣህዛብ ሰጒጕካ ድማ ንኣኣ ተኸልካያ።

⁹ኣብ ቅድሚኣ መንገዲ ፀረግካ፤ ሰራውራ ተኸልካ፤ ንምድሪ እውን መልአት።

¹⁰ፅላላ ንእምባታት ከደነ፤ ጨናፍራ ድማ ኸም ዝግባ እግዚኣብሄር ኮኑ።

¹¹ጨናፍራ ኽሳዕ ባሕሪ፥ ውልዶታታ ኸዓ ኽሳዕ ፈለግ ዘርግሐት።

¹²ስለ ምንታይ ሓፁራ ኣፍረስካ? እንሆ ሕዚ ዅሎም ሓለፍቲ መንገዲ ይቕንጥብዋ ኣለዉ።

¹³ናይ ዱር መፍለስ ኣርከሳ፤ መውፈሪ እንስሳ በረኻውን ኮነት።

¹⁴ኦ ኣምላኽ ሰራዊት፥ በይዛኻ ተመለስ፤ ካብ ሰማይ ኣንቈልቊልካ ተመልከት፤ ረአውን፤ ነዛ ዓፀደ ወይኒ እዚኣ ብፅሐላ።

¹⁵ብወዲ ሰብ ንኣኻ ዘፅናዕኻዮውን፥ የማንካ ንዝተኸለታ ኣልዕላ።

¹⁶ብሓዊ ተቓፂላ ኣላ፤ ተነቒላውን ኣላ፤ ካብ ተግሳፅ ገፅካ ዝተልዓለ ይጠፍኡ ኣለዉ።

¹⁷ኢድካ ኣብ ልዕሊ እቲ ናይ የማናይካ ሰብ፥ ኣብ ልዕሊ እቲ ንኣኻ ኢልካ ዘፅናዕኻዮ ወዲ ሰብ ትኹን።

¹⁸ካባኻ ኣይንርሓቕ፤ ኣሕውየና ስምካውን ክንፅውዕ ኢና።

¹⁹ኦ ጐይታ ኣምላኽ ሰራዊት፥ ምለሰና፤ ንኽንድሕን ድማ ገፅካ ኣብርሀልና።