Read መ/ቅዱስ ትግርኛ, Tigrigna Bible, 1 ዳዊት 81 Bible Online

ዳዊት 81 - መ/ቅዱስ ትግርኛ, Tigrigna Bible, 1 bible

ዳዊት 81

¹ ብዝረድአና ብእግዚኣብሄር ደስ ይበልኩም፤ ንኣምላኽ ያእቆብውን ዕልል በሉ።

²መዝሙር ኣልዕሉ፤ ከበሮ ውቕዑ፤ ዘሐጕስ በገና ምስ መሰንቆ፥

³ ብሰርቂ ወርሒ፥ በታ ዓባይ ፍልጥቲ በዓልና፥ መለኸት ንፍሑ።

⁴እዙይ ንእስራኤል ስርዓት እዩ፤ ናይ ኣምላኽ ያእቆብ ፍርዲውን እዩ።

⁵ካብ ምድሪ ግብፂ ምስ ወፀ፤ ንዮሴፍ ምስክር ኣቖመ፤ ዘይፈልጦ ቛንቋ ሰምዐ።

⁶“ዝባኑ ኻብ ሸኽሚ፥ ኣእዳዉውን ካብ ተገዛእነት ከፈር ኣርሓቕኩ።

⁷ ብመከራኻ ፀዋዕኻኒ፤ ኣድሓንኩኻውን፤ ብዝተሰወረ ኣውሎ መለስኩልካ፤ ኣብ ማይ መሪባ ፈተንኩኻ።

⁸ህዝበይ፥ ክነግረካስ ስምዐኒ፤ ኦ እስራኤል ኣሰምዐልካ ኣለኹ።

⁹ እንተ እትሰምዐንስ፥ ካልእ ኣምላኽ ኣይምኾነልካን፤ ንባዕዲ ኣምላኽውን ኣይምሰገድካን።

¹⁰ካብ ምድሪ ግብፂ ዘውፃእኩኻ ኣምላኽካ እግዚኣብሄር ኣነ እየ፤ ኣፍካ ኽፈት፤ ኣነውን ክመልኦ እየ።”

¹¹“ህዝበይ ግና ቓለይ ኣይሰምዑንን፤ እስራኤልውን ኣየዳመፁንን።

¹²ከም ስራሕ ልቦም ሓደግክዎም፤ ብሓሳብ ልቦምውን ከዱ።

¹³ህዝበይ ቃለይ ሰሚዖም እንተ ዝኾኑ! እስራኤልውን ብመንገደይ እንተ ዝኸዱ!

¹⁴ንዅሎም ፀላእቶም ቀልጢፈ መዋረድክዎም፤ ኣብ ልዕሊ እቶም ዘጨንቕዎምውን ኢደይ መልዓልኩ ነይረ።

¹⁵ፀላእቲ እግዚኣብሄር ምተገዝእዎ ነይሮም፤ ጊዜኦምውን ክሳዕ ዘለኣለም ምኾነ ነይሩ።

¹⁶ስብሒ ስርናይውን መብልዖም ነይሩ፤ ካብ ኰዅሒውን መዓር መፅገቦም ነይሩ።”