Read መ/ቅዱስ ትግርኛ, Tigrigna Bible, 1 ዳዊት 88 Bible Online

ዳዊት 88 - መ/ቅዱስ ትግርኛ, Tigrigna Bible, 1 bible

ዳዊት 88

¹ኦ ጐይታ፥ ኣምላኽ ምድሓነይ፥ ኣብ ቅድሜኻ ለይትን መዓልትን አእዊ ኣለኹ፤

²ፀሎተይ ኣብ ቅድሜኻ ትእቶ፤ እዝንኻውን ናብ ልመናይ ፅን ኣብል።

³ነፍሰይ መከራ ፀጊባ ኣላ እሞ፤ ህይወተይውን ናብ መቓብር ቀሪባ ኣላሞ።

⁴ምስቶም ናብ ጕድጓድ ዝወርዱ ተቘፀርኩ፤ ረዳኢ ኸም ዘይብሉ ሰብውን ኮንኩ።

⁵ከምቶም ንዘለኣለም ዘይትዝክሮም፥ ከምቶም ኣብ ጕድጓድ ዝተቐብሩ ቕቱላት፥ ኣብ ማእኸል ምዉታት ተደርበኹ፤ ንሳቶምውን ካብ ኢድካ ርሒቆም እዮም።

⁶ኣብ ፀልማትን፥ ኣብ ፅላሎት ሞትን፥ ኣብ ታሕተዋይ ጕድጓድ ኣንበርካኒ።

⁷ቍጥዓኻ ኣብ ልዕለይ ፀንዐ፤ ኵሉ መቕሰፍትኻውን ኣብ ልዕለይ ኣምፃእኻ።

⁸ነቶም ዝፈልጡኒ ኻባይ ኣርሓቕካዮም፤ ብኣኣቶምውን ርኹስ ገበርካኒ፤ ሓዙኒ፤ መውፅኢውን የብለይን።

⁹ኣዒንተይ ብመከራ ፈዘዛ፤ ኦ ጐይታ፥ ኵሉ መዓልቲ ናባኻ አእዊ ኣለኹ፤ ኵሉ መዓልቲ እውን ኣእዳወይ ናባኻ እዝርግሕ ኣለኹ።

¹⁰ብሓቂዶ ንምዉታት ተኣምራት ትገብር ኢኻ? ዝሞቱኸ ተሲኦምዶ የመስግኑኻ እዮም?

¹¹ኣብ ውሽጢ መቓብር ምሕረትካ፥ ኣብ ቦታ ጥፍኣትከ ሓቅነትካዶ ይንገር እዩ?

¹²ተኣምራትካ ኣብ ፀልማት ይፍለጥ ድዩ? ፅድቅኻኸ ኣብ ምድሪ ተረሲዑ ድዩ?

¹³ጐይታይ ኣነ ግና፥ ናባኻ አእዊ ኣለኹ፤ ፀሎተይ ኣንጊሃ ናባኻ ትብፃሕ።

¹⁴ጐይታ፥ ስለ ምንታይ ንነፍሰይ ትድርብያ? ስለ ምንታይከ ገፅካ ኻባይ ትኽውል?

¹⁵ካብ ንእስነተይ ጀሚረ፥ ፅጉምን ንሞት ዝቐረብኩን እየ፤ ልዕል ልዕል ምስ በልኩ ግና ተዋረድኩ፤ ተንዓቕኩውን።

¹⁶መቕሰፍትኻ ኣብ ልዕለይ ሓለፈ፤ ግርማኻውን ኣደንገፀኒ፤

¹⁷ኵሉ መዓልቲ ኸም ማይ ከበቡኒ፤ ሓቢሮምውን ሓዙኒ።

¹⁸ንፈተውተይን ንብፆተይን፥ ካባይ ኣርሓቕካዮም፤ ነዝማደይውን ካብ መከራ ዝተልዓለ ኻባይ ኣርሓቕካ።