Read መ/ቅዱስ ትግርኛ, Tigrigna Bible, 1 ዳዊት 95 Bible Online

ዳዊት 95 - መ/ቅዱስ ትግርኛ, Tigrigna Bible, 1 bible

ዳዊት 95

¹ንዑ፥ ብእግዚኣብሄር ደስ ይበለና፤ ንኣምላኽናን፥ ንመድሓኒናን ዕልል ንበል።

²ብምስጋና ኣብ ቅድሚኡ ንብፃሕ፤ ብመዝሙር ንእኡ ዕልል ንበል።

³እግዚኣብሄር ዓብዪ ኣምላኽ እዩ እሞ፤ ኣብ ልዕሊ ዅሎም ኣማልኽቲ ድማ ዓብዪ ንጉስ እዩ።

⁴እግዚኣብሄር ንህዝቡ ኣይድርብዮምን፤ ወሰናት ምድሪ ኸዓ ኣብ ውሽጢ ኢዱ እዮም፤ ነዋሕቲ እምባታትውን ናቱ እዮም።

⁵ባሕሪ ናቱ እያ፤ ንሱውን ፈጠራ፤ ንንቑፅ ምድሪ እውን ኣእዳዉ ሰርሖ።

⁶ንዑ፥ ንስገድ፤ ንእኡውን ንገዛእ፤ ኣብ ቅድሚ እግዚኣብሄር ፈጣሪና ንምበርከኽ።

⁷ንሱ ኣምላኽና እዩ እሞ፤ ንሕና ድማ ህዝቢ መጓሰኡ፥ ናይ ኣእዳዉ ኣባጊዕ ኢናሞ።

⁸ ከምቲ ኣብ ምድረ በዳ ዝተፈታተንዎን፥ ዘቘጥዕዎን፥ ሎሚ ድምፁ እንተ ሰሚዕኹም፥ ልብኹም ኣይተትርሩ።

⁹ዝተፈታተኑኒ ኣቦታትኩም፥ ፈተኑኒ፤ ስራሐይውን ረአዩ።

¹⁰ነታ ትውልዲ እቲኣ ኣርብዓ ዓመት ተቘጢዐያ ነይረ፤ “ኵልሻዕ ልባቶም ይስሕት፤ ንሳቶም መንገደይ ኣይፈለጡን” በልኩ።

¹¹ስለዙይ “ናብ ዕረፍተይ ከይኣትዉ፥ ብቝጥዓይ መሓልኩ።”