Read መ/ቅዱስ ትግርኛ, Tigrigna Bible, 1 ዳዊት 96 Bible Online

ዳዊት 96 - መ/ቅዱስ ትግርኛ, Tigrigna Bible, 1 bible

ዳዊት 96

¹ንእግዚኣብሄር ሓድሽ ምስጋና ኣመስግኑ፤ ኵልኻትኩም ኣብ ምድሪ እትነብሩ ንእግዚኣብሄር ኣመስግኑ።

²ንእግዚኣብሄር ኣመስግኑ፥ ንስሙውን ባርኹ፤ መዓልቲ መዓልቲ እውን ምድሓኑ ተናገሩ።

³ክብሩ ንኣህዛብ፥ ተኣምራቱውን ንዅሎም ወገናት ንገሩ።

⁴እግዚኣብሄር ዓብዪ፥ ምስጋናኡውን ብዙሕ እዩሞ፤ ካብ ኵሎም ኣማልኽቲ ድማ ዝፍራሕ እዩ።

⁵ኵሎም ኣማልኽቲ ኣህዛብ፥ ኣጋንንቲ እዮም፤ እግዚኣብሄር ግና ንሰማያት ፈጠረ።

⁶ግርማን ክብርን ኣብ ቅድሚኡ፥ ቅድስናን ግርማን ኣብ ውሽጢ መቕደሱ እዮም።

⁷ወገናት ኣህዛብ ንእግዚኣብሄር ኣምፅኡ፤ ክብርን ምስጋናን ንእግዚኣብሄር ኣምፅኡ።

⁸ንስሙ ዝግባእ ክብሪ፥ ንእግዚኣብሄር ሃቡ፤ መስዋእቲ ሒዝኩም ናብ ኣደባባያቱ እተዉ።

⁹ ኣብ ዓፀድ ቅድስናኡ፥ ንእግዚኣብሄር ስገዱ፤ ኵላ ምድሪ ኣብ ቅድሚኡ ትንቀጥቀጥ።

¹⁰ኣብ ማእኸል ኣህዛብ “እግዚኣብሄር ነገሰ” በሉ፤ ከይትናወፅ ንዓለም ንሱ ኣፅንዓ፤ ንኣህዛብ ከዓ ብቕንዕና ይፈርድ።

¹¹ሰማያት ይተሓጐሱ፤ ምድሪ እውን ደስ ይበላ፤ ባሕርን ምልኣታን ትናወፅ።

¹²በረኻን ኣብ ውሽጣ ዘሎ ዅሉን ደስ ይበሎም፤ ሽዑ ዅላቶም ኣእዋም ዱር፥ ኣብ ቅድሚ እግዚኣብሄር ደስ ክብሎም እዩ።

¹³ክመፅእ እዩ፤ ኣብ ልዕሊ ምድሪ ኽፈርድ ክመፅእ እዩ እሞ፤ ንሱ ንዓለም ብፅድቂ፥ ንኣህዛብ ድማ ብቕንዕና ኽፈርድ እዩ።