Read መ/ቅዱስ ትግርኛ, Tigrigna Bible, 1 ዳዊት 98 Bible Online

ዳዊት 98 - መ/ቅዱስ ትግርኛ, Tigrigna Bible, 1 bible

ዳዊት 98

¹ንእግዚኣብሄር ሓድሽ ምስጋና ኣመስግኑ፤ እግዚኣብሄር ተኣምራት ገይሩ እዩ እሞ፥ የማናይ ኢዱን፥ ቅዱስ ቅልፅሙንውን ንእኡ ምድሓን ገበረ።

²እግዚኣብሄር ምድሓኑ ኣፍለጠ፤ ፅድቁ ድማ ኣብ ቅድሚ ኣህዛብ ገለፀ።

³ንያእቆብ ምሕረቱ፥ ንቤት እስራኤልውን ሓቁ ዘከረ፤ ኵሎም ኣብ ወሰናት ምድሪ ዘለዉ፥ ምድሓን ኣምላኽና ረአዩ።

⁴ኣቲ ምድሪ ዅልኺ ንእግዚኣብሄር ዕልል በሊ፤ ኣመስግኑ፥ ደስ ይበልኩም ዘምሩውን።

⁵ንእግዚኣብሄር ብመሰንቆ፥ ብመሰንቆን ብድምፂ በገናን ዘምሩሉ።

⁶ብእምብልታን ብድምፂ መለኸትን፥ ኣብ ቅድሚ እቲ ንጉስ እግዚኣብሄር ዕልል በሉ።

⁷ባሕርን ኣብኣ ዘሎ ዅሉን፥ ዓለምን ኣብኣ ዝነብሩ ዅሎምን ይናወፁ።

⁸ወሓይዝ ኣፍላግውን ሓቢሮም በእዳዎም የጣቕዑ፤ እምባታትውን ደስ ይበሎም፤

⁹ንሱ ኣብ ምድሪ ኽፈርድ ክመፅእ እዩ እሞ፤ ንሱ ንዓለም ብፅድቂ፥ ንኣህዛብውን ብቕንዕና ኽፈርድ እዩ።