Read መ/ቅዱስ ትግርኛ, Tigrigna Bible, 1 ምሳሌ 13 Bible Online

ምሳሌ 13 - መ/ቅዱስ ትግርኛ, Tigrigna Bible, 1 bible

ምሳሌ 13

¹ለባም ውሉድ ተግሳፅ ኣቦኡ ይሰምዕ፤ መላገፂ ግና ተግሳፅ ኣይሰምዕን።

²ሰብ ካብ ፍረ ኣፉ ሰናይ ይምገብ፤ ነፍሲ ዓመፀኛታት ግና ግፍዒ ትምገብ።

³ኣፉ ዝገትእ፥ ህይወቱ ይሕሉ፤ ከንፈሩ ዝኸፍት ግና፥ ጥፍኣት ይረኽቦ።

⁴ነፍሲ ሃካይ ሰብ ትምነ፥ ግና ሓንቲኳ ኣይትረክብን፤ ነፍሲ ትጉሃት ግና የመና ትፀግብ።

⁵ፃድቕ ንዘረባ ሓሰት ይፀልኦ፤ ሓጥእ ግና የሕፍርን የነውርን።

⁶ፅድቂ ነቲ ብመንገዱ ቕኑዕ ዝኾነ ይሕልዎ፤ ሓጢኣት ግና ንሓጥእ የውድቖ።

⁷ንባዕሉ ሃብታም ኣምሲሉ ዝረአ ኣሎ፤ ግና ሓደኳ የብሉን፤ ንባዕሉ ድኻ ዘምስል ከዓ ኣሎ፤ ግና የመና ሃብቲ ኣለዎ።

⁸ሰብ ንህይወቱ ብገንዘቡ ይቢዜዋ፤ ድኻ ግና ዘስግኦ የብሉን።

⁹ንፃድቃን ኵልሻዕ ብርሃን እዩ፤ መብራህቲ ሓጥኣን ግና ይጠፍእ።

¹⁰ትዕቢት፥ ባእሲ ጥራሕ እዩ ዘምፅእ፤ ጥበብ ግና ምስቶም ምኽሪ ዝቕበሉ እያ።

¹¹ብኸንቱ ዝተረኽበ ገንዘብ እናጐደለ ይኸይድ፤ ብፃዕሪ ዝተረኽበ ገንዘብ ግና እናበዝሐ ይኸይድ።

¹²ዝደንጐየ ተስፋ ንልቢ የሕዝኖ፤ ዝተፈፀመ ትምኒት ግና ኦም ህይወት እዩ።

¹³ንትእዛዝ ዝንዕቕ ብትእዛዛት ተትሒዙ ይጠፍእ፤ ትእዛዝ ዝፈርሕ ግና ብዳሓን ይነብር።

¹⁴ሰብ ካብ መፃወድያ ሞት ምእንቲ ኸምልጥ፥ ትምህርቲ ጠቢብ ፍልፍል ህይወት እያ።

¹⁵ሰናይ ፍልጠት ሞገስ ይህብ፤ መንገዲ ዓመፀኛታት ግና ሓርፋፍ እዩ።

¹⁶ብልሂ ሰብ ብምስትውዓል ይሰርሕ፤ ዓሻ ግና ዕሽነቱ ይገልፅ።

¹⁷ክፉእ ልኡኽ ኣብ ክፉእ ይወድቕ፤ እሙን ልኡኽ ግና ፈውሲ እዩ።

¹⁸ተግሳፅ ንዘይቕበል ሰብ፥ ድኽነትን ነውርን ይፀንሖ፤ ተግሳፅ ዝቕበል ግና ይኸብር።

¹⁹ዝተፈፀመ ትምኒት ንነፍሲ የሐጕሳ፤ ንዓያሹ ግና ኻብ ክፉእ ምርሓቕ ርኽሰቶም እዩ።

²⁰ምስ ለባም ዝመላለስ ለባም ይኸውን፤ ምስ ዓያሹ ዝተዓራረኽ ግና መከራ ይቕበል።

²¹ንሓጥኣን ክፉእ ነገር የሳጕጎም፤ ፃድቃን ግና ሰናይ ዓስቢ ይቕበሉ።

²²ፃድቕ ሰብ ንደቂ ደቁ የውርስ፤ ሃብቲ ሓጥእ ግና ንፃድቕ ይዕቈረሉ።

²³ኣብ ግራት ድኻታት ብዙሕ ሲሳይ ይርከብ፤ ግና ኻብ ምጕዳል ፍርዲ ዝተልዓለ ይጠፍእ።

²⁴ንውሉዱ ብጨንገር ከይቐፅዕ ዝርህርህ ሰብ ንውሉዱ ይፀልእ፤ እቲ ንውሉዱ ዘፍቅሮ ግና ተጠንቂቑ ይቐፅዖ።

²⁵ፃድቕ ክሳዕ ዝፀግብ ይበልዕ፤ ከብዲ ሓጥኣን ግና ይጠሚ።