Read መ/ቅዱስ ትግርኛ, Tigrigna Bible, 1 ምሳሌ 14 Bible Online

ምሳሌ 14 - መ/ቅዱስ ትግርኛ, Tigrigna Bible, 1 bible

ምሳሌ 14

¹ለባም ሰበይቲ ቤታ ትሃንፅ፤ ዓሻ ግና በገዛ ኢዳ ተፍርሶ።

²ንእግዚኣብሄር ዝፈርሕ ብቕንዕና ይኸይድ፤ መንገዲ ዘቐይንን ግና ይንዕቖ።

³ኣብ ኣፍ ዓሻ በትሪ ትዕቢት ኣሎ፤ ለባማት ግና ብኸንፈሮም ይሕለዉ።

⁴ብዕራይ ኣብ ዘይብሉ ቦታ እኽሊ ኣይርከብን፤ ብዙሕ ሲሳይ ግና ብሓይሊ ብዕራይ እዩ።

⁵እሙን ምስክር ኣይሕሱን፤ ሓሳዊ ምስክር ግና ሓሰት እዩ ዝዛረብ።

⁶መላገፂ ሰብ ንጥበብ ይደልያ እሞ ኣይረኽባን፤ ንለባም ግና ፍልጠት ምርካብ ኣየሸግሮን።

⁷ካብ ቅድሚ ዓሻ ረሓቕ፤ ካብኡ ኸንፈር ፍልጠት ኣይትረክብን ኢኻ።

⁸ናይ ለባም ጥበብ፥ መንገዱ ምስትብሃሉ እዩ፤ ናይ ዓሻ ዕሽነት ግና፥ ጥበራ እዩ።

⁹ዓያሹ ብሓጢኣት የላግፁ፤ ኣብ ማእኸል ቅኑዓት ግና ሕያዋይነት ኣሎ።

¹⁰ልቢ ንምረቱ ባዕሉ ይፈልጦ፤ ኣብ ሓጐሱ ኸዓ ኻልእ ኣይሕወስን።

¹¹ቤት ክፉኣት ይዓኑ፤ ድንኳን [2] ቅኑዓት ግና ይፀንዕ።

¹²ንሰብ ቅንዕቲ እትመስሎ መንገዲ ኣላ፤ መወዳእታኣ ግና መንገዲ ሞት እዩ።

¹³እናሰሓቕካውን፥ ልቢ ይጕሂ እዩ፤ መወዳእታ ሓጐስ ከዓ ሓዘን እዩ።

¹⁴ንልቡ ኻብ ፅድቂ ዝመልስ ሰብ፥ ካብ ፍረ መንገዱ ይፀግብ፤ ፃድቕ ሰብ ግና ኻብ ባዕሉ እዩ።

¹⁵ገርሂ ሰብ ንዅሉ ቓል ይኣምን፤ ለባም ግና ነካይዳኡ ይጥንቀቕ።

¹⁶ለባም ሰብ ይፈርሕ፤ ካብ ክፉእ ድማ ይርሕቕ፤ ሰነፍ ግና ደፋርን ኣማኒ ርእሱን እዩ።

¹⁷ቍጡዕ ሰብ ስራሕ ዕሽነት ይሰርሕ፤ መስተውዓሊ ግና ይዕገስ።

¹⁸ደናቝር ዕሽነት ይወርሱ፤ ለባማት ግና ዘውዲ ፍልጠት ይደፍኡ።

¹⁹ዓመፅቲ ሰባት ኣብ ቅድሚ ሕያዎት፥ ሓጥኣን ድማ ኣብ ኣፍ ደገ ፃድቃን ይንብርከኹ።

²⁰ንድኻ ብፃዩ እኳ ይፀልኦ፤ ፈተውቲ ሃብታም ግና ብዙሓት እዮም።

²¹እቲ ንብፃዩ ዝንዕቕ ሓጢኣት ይገብር፤ ዝርህርሀሉ ግና ቡሩኽ እዩ።

²²ክፉእ ዝሓስቡ ይጋገዩ፤ ምሕረትን ሓቅን ግና ነቶም ሰናይ ዝሓስቡ እየን።

²³ብስራሕ፥ ኵሉ ሃፍቲ ይርከብ፤ ብዙሕ ዘረባ ዝዛረባ ኸናፍር ግና ናብ ስእነት የብፅሓ።

²⁴ሃብቲ ንጠቢባን ዘውዶም እዩ፤ ዕሽነት እቶም ዓያሹ ግና ዅልሻዕ ዕሽነት እዩ።

²⁵ሓቀኛ ምስክር ህይወት የድሕን፤ ሓሳዊ ምስክር ግና ጠባሪ እዩ።

²⁶ንእግዚኣብሄር ዝፈርሕ ሰብ ፅኑዕ እምባ ኣለዎ፤ ንደቁውን መዕቘቢ ይረክብ።

²⁷ንእግዚኣብሄር ምፍራሕ ናይ ህይወት ፍልፍል እዩ፤ ንሰብ ከዓ ኻብ መፃወዲያ ሞት የድሕኖ።

²⁸ክብሪ ንጉስ ኣብ ብዝሒ ህዝቢ እዩ፤ ምውሓድ ህዝቢ ግና ጥፍኣት ገዛኢ እዩ።

²⁹ንዕጉስ ሰብ ብዙሕ ምስትውዓል ኣለዎ፤ ቍጡዕ ግና ንዕሽነቱ ይገልፃ።

³⁰ትሑት ልቢ፥ ንስጋ ህይወቱ እዩ፤ ቅንኢ ግና፥ ቍንቍነ ኣዕፅምቲ እዩ።

³¹ንድኻ ዝጭቍን ንፈጣሪኡ ይደፍር፤ ንስኡን ዝርህርህ ግና ንፈጣሪኡ የኽብር።

³²ሓጥእ ብኽፍኣቱ ይግምጠል፤ ፃድቕ ግና እንተ ሞተ እኳ መዕቘቢ ኣለዎ።

³³ጥበብ ኣብ ልቢ መስተውዓሊ ትሓድር፤ ኣብ ልቢ ዓያሹ ግና ኣይትፍለጥን።

³⁴ፅድቂ ንህዝቢ ልዕል የብሎ፤ ሓጢኣት ግና ውርደት ህዝቢ እዩ።

³⁵ብልሂ ሓሽከር ኣብ ቅድሚ ንጉስ ሞገስ ይረክብ፤ ነውሪ ኣብ ልዕሊ ዝገብር ሓሽከር ግና ቝጥዓ ንጉስ ይወርድ።