Read መ/ቅዱስ ትግርኛ, Tigrigna Bible, 1 ምሳሌ 19 Bible Online

ምሳሌ 19 - መ/ቅዱስ ትግርኛ, Tigrigna Bible, 1 bible

ምሳሌ 19

¹ብኸናፍሩ ኻብ ዝውስልት ሰነፍ፥ ብዘይ ነውሪ ዝመላለስ ድኻ ይሐይሽ።

²ነፍሲ፥ ብዘይ ፍልጠት ክትከውን ሰናይ ኣይኮነን፤ ቅልጡፍ እግሪ ኸዓ መንገዲ ይስሕት።

³ሰብ ብስንፍናኡ መንገዱ የቐይንን፤ ልቡ ኸዓ ኣብ እግዚኣብሄር የንፀርፅር።

⁴ሃብቲ፥ ብዙሓት ፈተውቲ ይውስኽ፤ ንድኻ ግና ፈታዊኡ እኳ ይርሕቖ።

⁵ሓሳዊ ምስክር እንተይተቐፅዐ ኣይተርፍን፤ እቲ ሓሰት ዝዛረብ ከዓ ኻብ መቕፃዕቲ ኣየምልጥን።

⁶ንለጋስ ሰብ ብዙሓት የቀባጥሩሉ፤ ነቲ ውህብቶ ዝህብ ድማ ዅሎም ፈተውቱ ይኾኑ።

⁷ንድኻ ዅሎም ኣሕዋቱ ይፀልእዎ፤ ፈተውቱ ግዳ ኻብኡ ኽንደይ ዘይርሕቑ! ብቓላት ይስዕቦም፥ ግናኸ ኣይረብሕዎን።

⁸ጥበብ ዘጥሪ ንነፍሱ የፍቅራ፤ ንምስትውዓል ዝሕልዋ ኸዓ ሰናይ ይረክብ።

⁹ሓሳዊ ምስክር እንተይተቐፅዐ ኣይተርፍን፤ ሓሰት ዝዛረብ ከዓ ይጠፍእ።

¹⁰ንሰነፍ ሕንቃቐ ኣይግብኦን፤ ብሕልፊ እኳ ንባርያ፥ ኣብ ልዕሊ መሳፍንቲ ምስልጣን ኣይግብኦን።

¹¹ምስትውዓል፥ ንሰብ ካብ ኵራ ደንጓዪ ይገብሮ፤ ምሕዳግ በደል ከዓ ኽቡር ይገብሮ።

¹²ቍጥዓ ንጉስ ከም ምጕዛም ኣንበሳ እዩ፤ ሞገሱ ግና ኣብ ሳዕሪ ኸም ዝወርድ ኣውሊ እዩ።

¹³ሰነፍ ውሉድ ነቦኡ ሓዘን እዩ፤ ተጓያቚት ሰበይቲ ኸዓ ኸምቲ እንተየቋረፀ ዘንጥብ ናሕሲ እያ።

¹⁴ቤትን ሃብትን ካብ ወለዲ ይውረስ፤ ለባም ሰበይቲ ግና ኻብ እግዚኣብሄር እያ።

¹⁵ስራሕ ምፍታሕ ድቃስ የምፅእ፤ ነፍሲ ሃካይ ከዓ ትጠሚ።

¹⁶ትእዛዝ ዝሕሉ ንነፍሱ ይሕሉ፤ መንገዱ ሸለል ዝብል ከዓ ይመውት።

¹⁷እቲ ንድኻ ዝህብ፥ ንእግዚኣብሄር የለቅሕ፤ እግዚኣብሄር ከዓ፥ በቲ ሰናይ ግብሩ ኽፈድዮ እዩ።

¹⁸ገና ተስፋ እንተሎ ንወድኻ ቕፅዓዮ፤ ምሟቱውን ኣይትድለ።

¹⁹ቍጡዕ ሰብ ቅፅዓቱ ይኸፍል፤ እንተናገፍካዮ ድማ መሊስካ ተግድዶ።

²⁰ምኽሪ ስማዕ፥ ተግሳፅውን ተቐበል፤ ኣብ መወዳእታኻ ኸዓ ጥበበኛ ኽትከውን ኢኻ።

²¹ኣብ ልቢ ሰብ ብዙሕ ሓሳብ ኣሎ፤ ምኽሪ እግዚኣብሄር ግና ፀኒዑ ይነብር።

²²ንሰብ ርህራሄኡ እዩ ገይፁ፤ ካብ ሓሳዊ ሃብታም ሓቀኛ ድኻ ይሐይሽ።

²³ንእግዚኣብሄር ምፍራሕ፥ ናብ ህይወት ይመርሕ፤ እቲ ዝፈርሖውን ፀጊቡ ይሓድር፤ ክፉእ ከዓ ኣይረኽቦን።

²⁴ሃካይ ንኢዱ ናብ ፃሕሊ የእትዋ፤ ግናኸ ናብ ኣፉ እኳ ኣይመልሳን።

²⁵እቲ ገርሂ ምእንቲ ኽጥንቀቕ፥ ንመላገፂ ቕፅዓዮ፤ ንመስተውዓሊ እንተ ገሰፅካዮ፥ ፍልጠት ይረክብ።

²⁶እቲ ነቦኡ ዝገፍዕ፥ ንኖኡውን ዝሰጒጕ መሕፈርን ነውራምን ውሉድ እዩ።

²⁷ወደይ፥ ነቲ ኻብ ፍልጠት ዘርሕቐካ ምኽሪ ኣይትስምዓዮ።

²⁸ወስላታ ምስክር ኣብ ፍትሒ የባጩ፤ ኣፍ ሓጥእ ከዓ በደል ይውሕጥ።

²⁹ንመላገፅቲ ፍርዲ፥ ንዝባን ዓያሹ ኸዓ በትሪ ተዳልዩሎም ኣሎ።