Read መ/ቅዱስ ትግርኛ, Tigrigna Bible, 1 ምሳሌ 22 Bible Online

ምሳሌ 22 - መ/ቅዱስ ትግርኛ, Tigrigna Bible, 1 bible

ምሳሌ 22

¹ፅቡቕ ስም ካብ ብዙሕ ሃብቲ ይምረፅ፤ ሞገስ ከዓ ኻብ ብሩርን ወርቅን ይበልፅ።

²ሃብታምን ድኻን ተራኸቡ፤ ንዅላቶም ዝፈጠሮም እግዚኣብሄር እዩ።

³መስተውዓሊ ሰብ ክፉእ ሪኡ ይሕባእ፤ ገርህታት ግና ይሓልፉሞ ብእኡ ይጕድኡ።

⁴ንእግዚኣብሄር ምፍራሕን ትሕትናን፥ ሃብትን ክብርን ህይወትን እዩ።

⁵ኣብ መንገዲ ቐይናን እሾዅን መፈንጠርን ኣሎ፤ ነፍሱ ዝሕሉ ግና ኻብኡ ይርሕቕ።

⁶ንቘልዓ እታ ክኸደላ ዝግብኦ መንገዲ ምርሓዮ፤ ምስ ዓበየውን፥ ካብኣ ኣየግልስን እዩ።

⁷ንድኻ ሃብታም ይገዝኦ፤ ተላቃሒ ኸዓ፥ ባርያ መለቅሒ እዩ።

⁸ሓጢኣት ዝዘርእ መከራ ይዓፅድ፤ በትሪ ቝጥዓኡ ድማ ይጠፍእ።

⁹ካብ እንጀራኡ ንድኻ ኣካፊሉ እዩሞ፥ ርህሩህ ዝተባረኸ ይኸውን።

¹⁰ንመላገፂ ስጐጎሞ ጐይቊ ኽውገድ እዩ፤ ባእስን ፀርፍን ከዓ ኽውዳእ እዩ።

¹¹ንፅህና ልቢ ዝፈቱ፥ ሞገስ ኣብ ከናፍሩ ዘለዎ፥ ንጉስ ፈታዊኡ ይኸውን።

¹²ኣዒንቲ እግዚኣብሄር ንጥበብ ይሕልዋኣ፤ ንሱ ግና ንቓላት ጠለምቲ ይግልብጦ።

¹³ሃካይ “ኣብ ወፃኢ ኣንበሳ ኣሎ፤ ኣብ ማእኸል መንገዲ ኽመውት እየ” ይብል።

¹⁴ኣፍ ኣመንዝራ ሰበይቲ ዓሚቝ ጕድጓድ እዩ፤ እግዚኣብሄር ዝተቘጥዖ ኸዓ ኣብኣ ይወድቕ።

¹⁵ስንፍና ኣብ ልቢ ህፃን ተኣሲሩ ኣሎ፤ በትሪ መቕፃዕቲ ግና ኻብኡ የርሕቖ።

¹⁶ክህብትም ኢሉ ንድኻ ዝጭቍን፥ ንሃብታምውን ዝህብ፥ ኣብ ድኽነት ይወድቕ።

¹⁷እዝንኻ ፅን ኣቢልካ ቓላት ጠቢባን ስማዕ፤ ልብኻውን ናብ ትምህርተይ ኣቕልብ፤

¹⁸ንኣኣተን ኣብ ልብኻ ኣፅኒዕኻ እንተ ሒዝካየን፥ ኣብ ከንፈርካውን ዝተዳለዋ እንተ ኾይነን፥ ሰናይ ነገር ክኾነልካ እዩ።

¹⁹እምነትካ ኣብ እግዚኣብሄር ምእንቲ ክኸውን፥ እንሆ ሎሚ ኣነ ንኣኻ ኣፍልጠካ ኣለኹ።

²⁰ንዝጥይቑኻውን ቃል ሓቂ፥ ምምላስ ምእንቲ ኽትክእል ብምኽርን ብፍልጠትን፥ ዝኸበረ ነገርዶ ኣይፀሓፍኩልካን?

²¹እዚኣተን፥ ሓቂ እንታይ ከም ዝኾነ፥ ክምህራኻ እየን።

²²ንድኻ፥ ኣይተገድዶ፥ ድኻ እዩሞ፤ ንፅጉም ድማ ኣብ በሪ ኣይትድፍኣዮ።

²³እግዚኣብሄር ነቲ ፍርዶም ክፋረደሎም እዩሞ፤ ነቶም ዝገፈፍዎም ከዓ ህይወቶም ክገፎም እዩሞ።

²⁴መንገዶም ምእንቲ ኸይትመሃር እሞ፥ ንነፍስኻ ኸይተፃውደላ፥ ምስ ኰራዪ ሰብ ኣይትመሓዞ፤ ምስ ቍጡዕ ኸዓ ኣይትኺድ።

²⁶ከምቶም ኢዶም ዝጠቕዑ፥ ንበዓል ዕዳውን ዝወሓሱ ኣይትኹን፤ ምፍዳይ ምስ ሰኣንካ፥ ንምንታይ መንፀፍካ ኻብ ትሕቴኻ ዝውሰድ?

²⁸ኣቦታትካ ዘቖምዎ፥ ናይ ቀደም ደረት ኣይትድፋእ።

²⁹ብሞያኡ ኽኢላ ንዝኾነ ሰብዶ ርኢኻ ትፈልጥ? ኣብ ቅድሚ ነገስታት እዩ ዝቐውም እምበር፥ ኣብ ቅድሚ ታሕተዎት ሰባት ኣይቐውምን።