Read መ/ቅዱስ ትግርኛ, Tigrigna Bible, 1 ምሳሌ 23 Bible Online

ምሳሌ 23 - መ/ቅዱስ ትግርኛ, Tigrigna Bible, 1 bible

ምሳሌ 23

¹ምስ በዓል ስልጣን ኣብ ማእዲ እንተ ተሰሪዕኻ፥ ኣብ ቅድሜኻ መን ከም ዘሎ፥ ኣፀቢቕካ ኣስተብህል፤

²ህንፉፍ እኳ እንተ ኾንካ፥ ኣብ ጐረሮኻ ኻራ ግበር።

³እንጀራ ሓሰት እዩሞ፥ ንጥዑም ብልዒ ኣይትብሃጎ።

⁴ድልየትካ ንምግታእ ጥበብ ይሃሉኻ እምበር፥ ሃብታም ክኸውን እየ ኢልካ ኣይትድከም።

⁵ሃብቲ፥ ናብ ሰማይ ከም ዝበርር ንስሪ፥ ንባዕሉ ኽንፊ የውፅእ እዩሞ፥ ኣብ ልዕሊኡ ዓይንኻ እንተውደቕካሉ ይጠፍእ።

⁶እንጀራ ስሱዕ ኣይትብላዕ፤ ጣዕሚ ብልዑ ኸዓ ኣየብህግካ፤

⁷ብልቡ ኸም ዝሓሰበልካ፥ “ብላዕ፥ ስተ” ይብለካ፤ ግና ልቡ ምሳኻ ኣይኮነን፤

⁸ነቲ ዝበላዕኻዮ ምግቢ ኽትተፍኦ ኢኻ፤ ነቲ ፅቡቕ ዘረባኻውን ክተጥፍኦ ኢኻ።

⁹ነቲ ጥበብ ዝመልኦ ቓልካ ይንዕቖ እዩሞ፤ ኣብ እዝኒ ዓሻ፥ ቁም ነገር ዘለዎ ዘረባ ኣይትዛረብ።

¹⁰ናይ ቀደም ደረት ኣይትድፋእ፤ ናብ ግራት ደኽታማት ከዓ ኣይትእቶ።

¹¹ተቤዛዊኦም እግዚኣብሄር፥ ብርቱዕ እዩ እሞ፤ ባዕሉ ኽንዳኣቶም ክፋረደካ እዩ።

¹²ልብኻ ንተግሳፅ፥ እዝንኻ ኸዓ ናብ ቃላት ፍልጠት ኣቕልብ።

¹³ንቘልዓ ብጨንገር ምቕፃዕ ኣይቐትሎን እዩሞ፥ ንቘልዓ ኻብ ምቕፃዕ ሸለል ኣይትበል።

¹⁴ብጨንገር ትቐፅዖ፤ ንነፍሱውን ካብ ሲኦል ተድሕና።

¹⁵ወደይ፥ ልብኻ መስተውዓሊ እንተ ኾይኑ፥ ልበይ ይሕጐስ፤

¹⁶ከናፍርካውን ቅንዕና እንትዛረባ፥ ኰላሊተይ ደስ ይብለን።

¹⁷ኵሉ መዓልቲ ደኣ ፍርሓት እግዚኣብሄር፥ ይሃሉኻ እምበር፥ ልብኻ ብሓጢኣተኛታት ኣይቕናእ።

¹⁸እዙይ እንተ ደኣ ጌርካ ብርግፅ ፍፃሜ ኣለካ፤ ተስፋኻ ድማ ኸንቱ ኣይኸውንን እዩ።

¹⁹ኣታ ወደይ፥ ስማዕ ለባምውን ኩን፤ ንልብኻ ኸዓ ብቕኑዕ መንገዲ ምርሓዮ።

²⁰ሰካርን ህሩፍን ይደኽዩ፤ ምብዛሕ ድቃስውን፥ ዝተቀዳደደ ጨርቂ የኽድን እዩሞ፥ ኣብ ማእኸል ሰተይቲ ወይንን፥ ኣብ ማእኸል ህሩፋት በላዕቲ ስጋን ኣይትቀመጥ።

²²ነቲ ዝወለደካ ኣቦኻ ስምዓዮ፤ ንኖኻውን፥ ምስ ኣረገት ኣይትንዓቃ።

²³ንሓቂ ዓድጋ እምበር ኣይትሽጣ፤ ንሓቂ ንጥበብ ንተግሳፅ ንምስትውዓልን ድማ ገንዘብካ ግበረን።

²⁴ኣቦ ፃድቕ ብዙሕ ይሕጐስ፤ ጥበበኛ ውሉድ ዝወለደ ኸዓ ብእኡ ደስ ይብሎ።

²⁵ኣቦኻን እኖኻን ብኣኻ ይተሓጐሱ፤ እታ ንኣኻ ዝወለደት ድማ ደስ ይበላ።

²⁶ወደይ፥ ልብኻ ሃበኒ፤ ኣዒንትኻ ድማ መንገደይ ይፍተዋ።

²⁷ኣመንዝራ ሰበይቲ ዓሚቝ ዓዘቕቲ እያ፤ ዘማዊት ሰበይቲ ድማ ፀባብ ጕድጓድ እያ፤

²⁸ከም ከታሪ ትፀናቶ፤ ብዙሓት ወስላታታትውን ኣብ ማእኸል ደቂ ሰባት ተብዝሕ።

²⁹ዋይዋይታ፥ ንመንዩ? ባእሲ፥ ንመንዩ? ሓዘን፥ ንመንዩ? ብኽያት፥ ንመንዩ? ብዘይ ምኽንያት ምቝሳል፥ ንመንዩ? ምቕያሕ ዓይኒ፥ ንመን እዩ? ነቶም ኣብ ምስታይ ወይኒ ዝድንጕዩ፥ ነቶም ዝደረቐ ወይኒ ኽመርፁ ዝእከቡዶ ኣይኮነን!

³¹ንወይኒ ምቕያሑ፥ ኣብ ብርለ ብርቕርቕ ምባሉ፥ ጥዒሙ ምውራዱ ኣይትመልከት።

³²ኣብ መወዳእታ ኸም ተመን ይነክስ፤ ከም ኣፍዑት ሕንዙ ይነፅግ።

³³ኣዒንትካ ንኣመንዝራታት ይሪኣ፤ ልብኻውን ጠዋይ ነገር ይዛረብ።

³⁴ኣብ ውሽጢ ባሕሪ ለጥ ከም ዝበለ፥ ኣብ ጫፍ ዓምዲ መርከብ፥ ከም ዝደቀሰ ኢኻ እትኸውን።

³⁵“ወቒዖምኒ፥ ግና ኣይተጐዳእኹን፤ ዘቢጦምኒ እዮም፤ ግና ኣይተፈለጠንን፤ መሊሰ ኽደልዮ ኸዓ፥ መኣዝ እየ ዝነቅሕ?” ክትብል ኢኻ።