Read መ/ቅዱስ ትግርኛ, Tigrigna Bible, 1 ምሳሌ 30 Bible Online

ምሳሌ 30 - መ/ቅዱስ ትግርኛ, Tigrigna Bible, 1 bible

ምሳሌ 30

¹እዙይ ቃል ኣጉር ወዲ ያቄ፥ ሰብ ናይ ሃገር ማሳ እዩ፤ ንሱውን ንኢቲኤልን ንኡካልን ከምዙይ ይብል፦

²ኣነ ብርግፅ ካብ ኵሉ ሰብ ዝደንቈርኩ እየ፤ ምስትውዓል ወዲ ሰብውን የብለይን።

³ጥበብ ኣይተምሃርኩን፤ ብዛዕባ እቲ ቅዱስውን ዝፈልጦ የብለይን።

⁴ናብ ሰማይ ዝደየበ እሞ ዝወረደኸ መን እዩ? ንንፋስከ ኣኪቡ ብኢዱ ዝዓመዀ መን እዩ? ንማይከ ኣብ ክዳኑ ዝቛፀሮ መን እዩ? ንዅሉ ወሰናት ምድሪ ዘፅንዐኸ መን እዩ? እዙይ ትፈልጥ እንተ ዄንካ መን እዩ ስሙ? ስም ወዱኸ መንዩ?

⁵“ኵሉ ቓል እግዚኣብሄር ኵሉዕ እዩ፤ ንሱ ንዝእመንዎ ዋልታኦም እዩ።

⁶ከይግስፀካ፥ ሓሳዊ ዄንካ ኸዓ ኸይትርከብስ፥ ናብ ቃሉ ሓንቲ እኳ ኣይትወስኽ።”

⁷“ኦ እግዚኣብሄር፥ ኣነ ኽልተ ነገር ካባኻ እደሊ ኣለኹ፤ ክሳዕ ዕለተ ሞተይ ንኣኣተን ኣይትኽልአኒ፤

⁸ካብ ምትላልን ሓሰትን ሓልወኒ፤ ፀጊበ ኸይክሕደካ እሞ ‘እግዚኣብሄር መን እዩ?’ ኸይብል፥ ወይ ደኽየ ኸይሰርቕ እሞ ስምካ፥ ስም ኣምላኸይ ከየፅርፍስ፥ ድኽነትን ሃብትን ኣይትሃበኒ፤ ግና እቲ ዘድልየኒ እንጀራ ሃበኒ።”

¹⁰“ምእንቲ ኸይፀርፈካ፥ በዳሊ ኸዓ ኸይትኸውንስ፥ ንባርያ ኣብ ቅድሚ ጐይታኡ ኣይትሕመዮ።”

¹¹“ነቦኡ ዝረግሞ፥ ንኖኡ ኸዓ ዘየመስግን ትውልዲ ኣሎ፤

¹²ካብ ርኽሰት እንተይነፅሀ፥ ‘ኣነ ንፁህ እየ’ ዝብል ትውልዲ ኣሎ፤

¹³ልዕል ልዕል ዝበሉ ኣዒንቲ ዘለውዎ፥ ቀራንብቱውን ንላዕሊ ዝሪኣ ትውልዲ ኣሎ፤

¹⁴ንምስኪናት ካብ ምድሪ፥ ንድኻታት ካብ ማእኸል ደቂ ሰብ ምእንቲ ኸጥፍእን ክጭርስን፥ ሰይፊ ዘስናኑ፥ ካራ ዝዀራርምቱ ትውልዲ ኣሎ።”

¹⁵“ዓለቕቲ ‘ሃበና፤ ሃበና’ ዝብላ ኽልተ ኣዋልድ ኣለዋኦ።” “ሰለስተ ዘይፀግቡ፥ አረ ይኣኽለና ዘይብሉ፥ ኣርባዕተ ነገራት ኣለዉ፤

¹⁶እዚኣቶም ከዓ፥ ሲኦል፥ ዘይትወልድ ማህፀን፥ ማይ ሰትያ ዘይትፀግብ መሬት፥ ይኣኽለኒ ዘይብል ሓዊ እዮም።”

¹⁷“ናይቲ ነቦኡ ዘባጭወሉ፥ ንኖኡ ኸዓ ዝንዕቓን ዘይእዘዛን ኣዒንቲ፥ ኳዃት ሩባ ኽጕጥጕጥወን፥ ጨቃውቲ ንስሪ ኸዓ ኽበልዕወን እዮም።”

¹⁸“የመና ዝገርሙኒ ሰለስተ ነገራት ኣለዉ፤ ነቲ ራብዓይ ግና ፈፂመ ኣየስተውዕሎን፤

¹⁹ንሳቶም ከዓ፥ መንገዲ ንስሪ ኣብ ሰማይ፥ መንገዲ ተመን ኣብ ኰዅሒ፥ መንገዲ መርከብ ኣብ ማእኸል ባሕሪ፥ መንገዲ ሰብኣይ ምስ ቆንጆ እዮም።”

²⁰“ግብሪ ዘማዊት ሰበይቲ ኸዓ ኸምኡ እዩ፤ ከምኡውን በሊዓ ኣፋ እትሕብስሞ፥ ‘ሓደ ኽፉእ ነገር ኣይገበርኩን’ እትብል፥ መንገዲ ኣመንዝራ ሰበይቲ እያ።”

²¹ምድሪ ብሰለስተ ነገር ትንቅጥቀጥ፤ አረ ነቲ ራብዓይስ ክትፆሮ ኣይትኽእልን፤

²²እዙይ ከዓ፥ ባርያ እንተ ነገሰ፥ ሰነፍ እንጀራ እንተ ፀገበ፥

²³ዝተፀልአት ሰበይቲ፥ ሰብኣይ እንተ ረኸበት፥ ገረድ ንምበይታኣ እንተ ወረሰታ እዩ።

²⁴“ኣብ ምድሪ ኣርባዕተ ደቀቕቲ፥ ፍጥረታት ኣለዉ፤ ግናኸ ንሳቶም የመና ጥበበኛታት እዮም፦

²⁵ፃፀ ሓይሊ ዘይብሉ ፍጥረት እዩ፤ ግና ምግቡ ብሓጋይ ይእክብ።

²⁶ጊሔታት ሓይሊ ዘይብለን ፍጥረት እየን፤ ግና ሰፈረን ኣብ ውሽጢ ኣኻውሕ ይገብራ።

²⁷ኣንበጣ ንጉስ የብሉን፤ ግና ብስነ ስርዓት ሓቢሩ ይጕዓዝ።

²⁸ምጭልቚት ብኢድካ ምሓዝ ዝከኣል እዩ፤ ግና ኣብ ኣዳራሽ ነገስታት ይነብር።”

²⁹ሰናይ ኣካይዳ ዝኸዱ፥ ሰለስተ ፍጥረታት ኣለዉ፤ እቲ ራብዓይውን ፅቡቕ ኣካይዳ ይኸይድ፤

³⁰ደቦል ኣንበሳ ኻብ ኵሉ እንስሳ ዝበርትዐ፥ ዘይምለስ፥ ንእንስሳውን ዘይፈርሕ፥

³¹ኣብ ማእኸል ኣንስትዮ፥ ብድፍረት ዝኸይድ ኣውራ ደርሆ፥ ንመጓሰ ዝመርሕ ኣውራ ጤል፥ ኣብ ቅድሚ ህዝቢ ብግልፂ ዝናገር ንጉስ እዮም።

³²“ርእስኻ ልዕል ልዕል ኣቢልካ ስንፍና እንተ ገበርካ፥ ወይ ክፉእ ክትገብር እንተ ሓሰብካ፥ ኣፍካ ብኢድካ ዕበስ።

³³ፀባ እንተ ተሓቘነ፥ ጠስሚ የውፅእ፤ ኣፍንጫ እንተ ተወቕዐ፥ ደም የውፅእ፤ ከምኡ ኸዓ ቝጥዓ እንተ ኣለዓዓልካ፥ ባእሲ ይፍጠር።”