Read መ/ቅዱስ ትግርኛ, Tigrigna Bible, 1 ምሳሌ 5 Bible Online

ምሳሌ 5 - መ/ቅዱስ ትግርኛ, Tigrigna Bible, 1 bible

ምሳሌ 5

¹ወደይ፥ ምኽሪ ኽተፅንዕ፥ ከናፍርካውን ፍልጠት ምእንቲ ኽሕዛ፥ ናብ ጥበበይ ኣድምፅ፤ እዝንኻውን ናብ ትምህርተይ ምለስ።

³ከናፍር ኣመንዝራ ሰበይቲ መዓር ወለላ የንጠብጥብ፤ ኣፋውን ካብ ዘይቲ ይልስልስ።

⁴መወዳእታኣ ግና ኸም ዕረ መሪር፥ ክልተ ኣፍ ከም ዘለዎ ሰይፊ ኸዓ በሊሕ እዩ።

⁵ኣእጋራ ናብ ሞት፥ ስጕምታ ኸዓ ናብ ሲኦል የውርድ።

⁶ቅኑዕ መንገዲ ህይወት ኣይትረክብን፤ በካይዳኣውን ኰብላሊት እያ፤ ዝፍለጥውን ኣይኮነን።

⁷ኣቱም ደቀይ፥ እምበኣርከስ ሕዚ ስምዑኒ፤ ካብ ቃላት ኣፈይውን ኣይትርሓቑ።

⁸መንገድኻ ኻብኣ ኣርሕቕ፤ ናብ ኣፍ ደገኣ ኣይትቕረብ።

⁹ክብርኻ ንኻልእ፥ ዕድሜኻውን ንጨካን ከይትህብ።

¹⁰ካልኦት ካብ ሃብትኻ ኸይፀግቡ፥ ፍረ ድኻምካውን ናብ ቤት ካልኦት ከይሓልፍ።

¹¹ኣብ መወዳእታ ስጋኻን ሰውነትካን ምስ ተወድአ፥ ክትናሳሕ ኢኻ።

¹²ሽዑ፥ “ከመይከ ንተግሳፅ ፀላእኽዋ? ስለ ምንታይከ ነቶም ዝኣረሙኒ ዝነዓቕክዎም?

¹³“ስለ ምንታይከ ድምፂ መምህራነይ ዘይሰማዕኹ? ስለ ምንታይከ ዘየድሃብኩሎም?

¹⁴“ኣብ ማእኸል ማሕበርን ጉባኤን፥ ናብ ኵሉ ኽፉእ ንምብፃሕ ቁሩብ ተሪፉኒ” ኽትብል ኢኻ።

¹⁵ማይ ካብ ዒላኻ፥ ካብቲ ዝፍልፍል ዓይኒ ማይካ ኸዓ ስተ።

¹⁶ፍልፍል ማይካ ናብ ደገ፥ ሩባታትካ ናብ ኣደባባይዶ ይፈስስ እዩ?

¹⁷ዒላኻን ዓይኒ ማይካን፥ ንኣኻ ጥራሕ ይኹኑ፤ ጓኖትውን ኣይካፈሉኻ።

¹⁸ዒላኻ ብሩኽ ይኹን፤ ምስ ሰበይቲ ንእስነትካውን ደስ ይበልካ።

¹⁹ንሳ ኸም ፍትውቲ ዋልያ፥ ከም ፅብቕቲ ሜዳቝ ትኹነልካ፤ ኣጥባታ ኵልሻዕ የዕግብካ፤ ብፍቕራውን ኵልሻዕ ፅገብ።

²⁰ኣታ ወደይ፥ ስለ ምንታይ ኣመንዝራ ሰበይቲ እተፍቅር? ንምንታይከ ሰበይቲ እማትካ እትሓቍፍ?

²¹እምበኣርከስ መንገዲ ነፍሲ ወከፍ ሰብ፥ ኣብ ቅድሚ ኣዒንቲ እግዚኣብሄር እዩ፤ ነካይዳኡውን ንሱ ይምልከቶ።

²²ሓጥእ ሰብ ብበደሉ ይሕንኰል፤ ብገመድ ሓጢኣቱ ኸዓ ይእሰር።

²³ስለ ዘይተቐፅዐ ንሱ ይመውት፤ ብብዝሒ ድንቍርናኡ ድማ ይጋገ።