Read መ/ቅዱስ ትግርኛ, Tigrigna Bible, 1 ምሳሌ 7 Bible Online

ምሳሌ 7 - መ/ቅዱስ ትግርኛ, Tigrigna Bible, 1 bible

ምሳሌ 7

¹ወደይ፥ ንቓለይ ሓልዎ፤ ንትእዛዛተይውን ኣብ ልብኻ ዕቘሮ።

²ንትእዛዛተይ ሓልዎ እሞ ብህይወት ክትነብር ኢኻ፤ ንሕገይውን ከም መርዓት ዓይንኻ ሓልዎ።

³ኣብ ኣፃብዕትኻ እሰሮ፤ ኣብ ፅላት ልብኻውን ፀሓፎ።

⁴ንጥበብ “ንስኺ ሓፍተይ ኢኺ” በላ፤ ንምስትውዓልውን “እምንቲ ፈታዊተይ ኢኺ” በላ።

⁵ንሳተን ከዓ ኻብ ሰበይቲ እማትካ፥ ካብታ መስሓቲ ቓል እትዛረብ ካልእ ሰበይቲ ኸናግፋኻ እየን።

⁶ኣብ መስኮት ቤተይ ኮይነ፥ ብዓይኒ ርግቢ ኣማዕዱ ነበርኩ።

⁷ኣብኡ ብዙሓት ዓያሹ መናእሰይ ረአኹ፤ ኣብ ማእኸሎም ከዓ ሓደ ልቢ ዘይብሉ ጐበዝ ተመልከትኩ።

⁸ንሱ ብኣደባባይ ኣብ ጥቓ ቐራና መንገዲ ሓሊፉ፥ ናብታ ናብ ቤት ኣመንዝራ እትወስድ መንገዲ ኣምርሐ።

⁹ምድሪ መስዩ፥ ፅልግልግታ ኾይኑ፥ ድቕድቕ ፀልማትውን ነበረ።

¹⁰እንሆ ኽዳን ምንዝርና ዝተኸደነት፥ ነፍሳት ንምፅዋድ ዝተዳለወት ሰበይቲ ተራኸበቶ።

¹¹ንሳ ህውከተኛን ቀላልን ነበረት፤ ኣእጋራውን ኣብ ገዛኣ ኣይዓርፋን ነበራ።

¹²ሓደ ጊዜ ኣብ ኣደባባይ፥ ሓደ ጊዜ ኣብ ዕዳጋ፥ ሓደ ጊዜ ኸዓ ኣብ ቀራና መንገዲ ኣድብያ ትፅበ።

¹³ነቲ መንእሰይ ድማ ሓዘቶ፤ ሰዓመቶውን፤ ብዘይ ምሕፋር ገፁ እናጠመተት ከዓ፦

¹⁴መስዋእቲ ምስጋና ከቕርብ ተመባፂዐ ነይረ፤ ሎሚ መብፅዓይ ፈፂመ ኣለኹ።

¹⁵ስለዙይ ገፅካ እደሊ ስለ ዝነበርኩ ኽቕበለካ ወፃእኹ፤ እንሆ ኸዓ ረኸብኩኻ።

¹⁶ኣብ ዓራተይ ብፈትሊ ግብፂ ዝተጠልፈ፥ ዝንጕርጕር ምንፃፍ ኣንፂፈ ኣለኹ።

¹⁷ነቲ ምድቃሰይ ከርበን፥ ዓልወን፥ ቀረፋን ነፂገሉ ኣለኹ።

¹⁸ነዓ፥ ክሳዕ ዝወግሕ ብፍቕሪ ንርወ፤ ብምትሕቝቛፍውን ንተሓጐስ።

¹⁹ሰብኣየይ ናብ ርሑቕ ስለ ዝገሸ፥ ኣብ ገዛ የለን።

²⁰ብኢዱውን ዝተቛፀረ ኸረጢት ብሪ ሒዙ ኸይዱ ኣሎ፤ ወርሒ ምሉእ ምስ ኮነት እዩ ዝምለስ በለቶ።

²¹ብብዙሕ ጥበራኣ ኣስሓተቶ፤ ብልዙብ ከናፍራውን ኣታለለቶ።

²²ከምቲ ናብ ማሕረዲ ዝኹብኰብ ብዕራይ፥ ከምቲ ናብ ማእሰር ዝኸይድ ከልቢ፥ ከምቲ ፍላፃ ንኸብዱ ኽሳዕ ዝስንጥቖ፥ ብመፃወድያ ዝተሓዝ ሜዳቝ፥ ከምቲ ይጠፍእ ከም ዘሎ እንተይፈለጠ፥ ናብ መፈንጠር ዝህወኽ ዒፍ ኮይኑ፥ ሽዑ ንሽዑ ሰዓባ።

²⁴እምበኣር ደቀይ፥ ስምዑኒ፤ ናብ ዘረባይ ድማ ኣቕልቡ።

²⁵ልብኻ ናብ መንገዳ ኣየዘምብል፤ ብመንገዳውን ኣይትስሓት።

²⁶ወጊኣ ዘውደቐቶም ብዙሓት እዮም፤ ዝቐተለቶምውን የመና ብዙሓት እዮም።

²⁷ገዛኣ መንገዲ ሲኦል እዩ፤ ናብ ውሻጠ ሞትውን ዘውርድ እዩ።