Read መ/ቅዱስ ትግርኛ, Tigrigna Bible, 1 ምሳሌ 8 Bible Online

ምሳሌ 8 - መ/ቅዱስ ትግርኛ, Tigrigna Bible, 1 bible

ምሳሌ 8

¹ብሓቂ ጥበብ ዓው ኢላዶ ኣይትፅውዕን? ፍልጠትከ ድምፃዶ ኣይተስምዕን?

²ኣብ ጫፍ ኰረብታታት ቆይማ፥ ኣብ ቀራናታት መንገዲ ደው ኢላ፥

³ ኣብ ጥቓ ደገታት፥ ኣብ መእተዊ ኸተማ፥ ኣብ ኣፍ በርታት ኮይና ድምፂ ተስምዕ ኣላ፦

⁴ኣቱም ሰባት፥ ንኣኻትኩም እየ ዝፅውዐኩም ዘለኹ፤ ንደቂ ሰብ እየ ዘድህዮም ዘለኹ።

⁵ኣቱም ዓያሹ ፍልጠት ተምሃሩ፤ ኣቱም ሰነፋትውን ኣስተውዕሉ።

⁶ክቡር ነገር ክዛረብ እየ እሞ ስምዑ፤ ከናፍረይውን ቅኑዕ ነገር ንምንጋር ክኸፍት እየ።

⁷ኣፈይ ሓቂ ኽዛረብ እዩ፤ ከናፍረይውን ንኽፍኣት ይፅየፋ።

⁸ኵለን ቃላት ኣፈይ ሓቂ እየን፤ ቀይናናት ወይ ጥውይዋያት ኣይኮናን።

⁹ንሳተን ንመስተውዓልቲ፥ ቅኑዓት እየን፤ ፍልጠት ምስ ዝረኸቡ ሰባትውን ዝሰማምዓ እየን።

¹⁰ንተግሳፀይ ካብ ብሩር፥ ንፍልጠተይውን ካብ ፅሩይ ወርቂ ምረፅዎ።

¹¹ጥበብ፥ ካብ ክቡር ዕንቍ ትበልፅ እያሞ፥ ክቡር ዝኾነ ዅሉውን ኣይመዓራረያን እዩ።

¹²ኣነ ጥበብ፥ ብብልሓት ተቐሚጠ ኣለኹ፤ ፍልጠትን ምስትውዓልንውን ረኺበ ኣለኹ።

¹³ንእግዚኣብሄር ምፍራሕ ንኽፍኣት ምፅላእ እዩ፤ ኣነውን ትዕቢትን ትምክሕትን፥ ክፉእ ኣካይዳን ዘረባ ሓሰትን እፀልእ እየ።

¹⁴ምኽርን ቅኑዕ ፍርድን ናተይ እዮም፤ ምስትውዓል ኣነ እየ፤ ሓይልውን ኣለኒ።

¹⁵ነገስታት ብኣይ ይነግሱ፤ መሳፍንቲ ብኣይ ቅኑዕ ሕጊ ይሕግጉ።

¹⁶ኣሕሉቕን ክቡራንን፥ ፈረድቲ ምድሪ እውን ብኣይ ይገዝኡ።

¹⁷ኣነ ነቶም ዘፍቅሩኒ ኣፍቅሮም፤ እቶም ተጊሆም ዝደልዩኒ ኸዓ ይረኽቡኒ።

¹⁸ሃብትን ክብረትን፥ ነባሪ ጥሪትን በረኸትን ኣባይ ኣሎ።

¹⁹ፍረይ ካብ ፅሩይ ወርቂ፥ ረብሓይ ካብ ሕሩይ ብሩር ይበልፅ።

²⁰ኣነ ብመንገዲ ፅድቂ እኸይድ፤ ብማእኸል ጐዳና ፍትሒውን እመላለስ።

²¹ንዝፈትዉኒ ርስቲ ኣውርሶም፤ ቤት መዝገቦምውን እመልእ።

²² እግዚኣብሄር መጀመርታ መንገዱ ገበረኒ።

²³ካብ ዘለኣለም ካብ መጀመርታ፥ ምድሪ እንተይተፈጥረት ነበርኩ።

²⁴ገና ባሕርታት እንተይነበረ፥ ዓይኒ ማያት እንተይወሓዘ፥ ኣነ ነበርኩ።

²⁵እምባታት እንተይተሰረቱ፥ ቅድሚ ዀረብታታት ኣነ ነበርኩ።

²⁶ንምድርን ንመይዳን፥ ነቲ መጀመርታ መሬትን እንተይፈጠሮ ነበርኩ።

²⁷ንሰማያት ከቑሞ እንተሎ፥ ንጠፈር ኣብ ልዕሊ ባሕርታት ክዝርግሖ እንተሎ፥

²⁸ንደመና ናብ ላዕሊ ኸቝሞ እንተሎ፥ ንዓይኒ ባሕሪ ክኸፍቶ እንተሎ፥

²⁹ማያት ካብ ትእዛዙ ኸይሓልፍ፥ ንባሕሪ ኽውስኖ እንተሎ፥ ንመሰረታት ምድሪ ኸቕውም እንተሎ፥ ኣብኡ ነበርኩ።

³⁰ሽዑ ኽኢላ ኾይነ ምስኡ ነበርኩ፤ በብመዓልቱ ብኣይ ይሕጐስ፤ ኵልሻዕ ኸዓ ኣብ ቅድሚኡ እሕጐስ ነበርኩ።

³¹በቲ ኣብ ምድሪ ዝፈጠሮ እሕጐስ ነበርኩ፤ ደስታይ ከዓ ብደቂ ሰብ ነበረ።

³²ሕዚ ድማ ደቀይ! መንገደይ ዝሕልዉ ብፁኣን እዮም እሞ ስምዑኒ።

³³ትምህርተይ ስምዑ፤ ለባማት ኩኑ፤ ሸለልውን ኣይትበልዎ።

³⁴እቲ ኣብ ልዳት ደገታተይ በብመዓልቱ፥ ኣብ በርታተይ እናተፀበየ፥ ንኣይ ዝሰምዕ ሰብ ብፁእ እዩ፤

³⁵እቲ ዝረኽበኒ፥ ህይወት ይረክብ፤ ካብ እግዚኣብሄር ድማ ሞገስ ይረክብ።

³⁶ኣብ ልዕለይ ዝብድል ንባዕሉ ይጐድእ፤ ኵሎም እቶም ዝፀልኡኒ ኸዓ ሞት ይፈትዉ።